Jehová pijajiwi Pematakaponaewi nakatoyakina paliwaisije

Bitso patakaasiwawi:

Jehová wajaasiwawi bitso yaiyatanetsi Dioso Pejumeliwaisi, Bibliabaj̈uto. Yapütanetsi kajena Bibliabaj̈utota perubenaejawa pej̈aniajailiwaisianü, pej̈aniapemuj̈ujiobiliwaisianü barüyaya wajajinawanapaenej̈a, bajarapijinia yapütanetsinua pakuenia Jehová itsi tsanajetarukae piasiwaj̈ae daj̈itajiwi (Salmo 119:105; Lucas 1:3; 1 Juan 4:19). Waj̈aitsi jitsipatsi wajayawenonaenej̈a itsamonae peyapütaenej̈a penamatamotsiliwaisianü j̈ua rubena Dioso Pejumeliwaisibaj̈utota. Bajaraj̈uata, barüyaya pakarajutatsi pabaj̈utoje: “Yapütaema pej̈aniajailiwaisianü j̈uajawanü rubena Bibliabaj̈utota”, pejaibaj̈uto. Pakatsipaebianatsi j̈ua payapütaename pabaj̈utotaje.

Pabaj̈utoje pitsapa pejewaj̈inej̈a. Itsiata pabaj̈utoje, jamatabükueneyawenonaenanua penaweretsiwi peyapütaenej̈a bebeliayo Bibliabaj̈uto yabara. Pakuenia Bibliabaj̈uto daj̈itajiwinej̈a rubena, itsa kanaüjütsianatsi pepakuene kajena nakajamatabükueneyawenonaena barüyaya wajajinawanapaenej̈a.

Bajarapabaj̈uto nakayapütaeyaej̈ana petaj̈uj̈uabiweliakujinae panakuataje pakuenia jumaitsi Bibliabaj̈utota. Pabaj̈utoje naitsi jiwi j̈aniawaetsiakuenia peyapütaenej̈a, yapüj̈anepanaeya, pakuenia ata Jehová itsi tsanajetarukae petaj̈uj̈uabijawawerenakujinae.

Itsiata baitsi jane, pabaj̈utoje übajayata pijiwi peliwaisianü apoyapütaeyaej̈anae. Biji rajane, paliwaisianü yajawa pejumapejawanü pitsapa pabaj̈utotaje jiwi pejamatabükueneyawenonaenej̈atsi, yapütaeyaej̈ananua pakuenia bajayata pijiwimi bajamatabükueneliwaisi itsi tsabiabi.

Pabaj̈utoje nakayapütaeyaej̈ana bajayata pijiwimi paliwaisinü yabara rubena Bibliabaj̈utota: Dioso pejumekowünütsiwimi, Dioso apopejumekowünütsiwimi ata. Bajarapamonae paliwaisianü pakuenia nakajamatabükueneyawenonanua (Romanos 15:4; 1 Corintios 10:6). Pabaj̈utoje pitsapa 14 pasecciónbeje. Kaesección kanakujitsia bekanaüjütatsi wajayapütaenej̈a penamatamotsiliwaisianü.

Itsa nej̈i j̈ainame, tolebare kaeliwaisi kanakujitsia, barükanaüjürenua papejumapejawanü rubena bajarapabaj̈utojawata. J̈uakujinae palebare paliwaisiyo ruka Bibliabaj̈utota. Yawenonare nej̈i peyapütaenej̈a j̈ua leba Bibliabaj̈utota pejamatabükueneyawenonaenej̈atsinua. Bajarapakuenia ata beyawenonatsi penaweretsiwi peyapütaenej̈a j̈ua Bibliabaj̈utota yapütaeyaej̈ana.

Pajitsipajünua bajarapabaj̈utojawanü peyawenonaejawatsi pamonae jitsipa pejumekowünütsinej̈a Dioso, pejewaj̈ijawaweliakujinae penaweretsiwijawabelia ata, bajarapakuenia peyapütaenej̈a Dioso Pejumeliwaisi, peitsinej̈anua. Bajarapakuenia bajarapamonae peyaiyataenej̈a Jehovájawabelia, nej̈ata benakaemonaekuenia penataenej̈a ata.