¿Dej̈uajitsia meta nej̈ata j̈anepana itsa nanakaetuaname Jehová petotsipaebaponaewijawabelia?

¿Itsajawata meta kanajunatsipa Jehová petotsipaebaponaewi nenanakaetuanaenej̈a? ¿Neauraj̈ae meta aponaponaemü? Jamatabüjumaitsimü meta tsipae: “¿Deitsi meta Jehová petotsipaebaponaewi itsa nakaetuana? ¿Dej̈uajitsia meta bajarapamonae bitso tsitaj̈anepanatsi penakaetuanaejawa? ¿J̈anü ata meta naponaejitsipajü bajarapamonae belia nakaetuana?”, jamatabüjamü. Paliwaisijawataje yapütaename pakuenia kajamatabükueneyawenonaena penakaetuatsikuene tsipaji naimoj̈oyotsianame Diosojawabelia.

1. ¿Dej̈uajitsia meta Jehová petotsipaebaponaewi najuanakaetuanabiaba?

Bibliabaj̈uto peyakinaenü jumaitsi: “Daxita [pecajumecowënëtsiwi] penacaetuatsijawata, xanë tananucaexae, cawajunupaebianatsi daxita papexaniacuene jiwi to-exanabiabame” (Salmo 22:22). Ajena pamatakabianüjawa, Jehová petotsipaebaponaewi ata nakaetuata tsipaji bajaraj̈ua jamatabükuenebarüyayaej̈anatsi. Daj̈itanakuanüjawa nakaetuanabiaba kaesemana kanakujitsia Diosojawabelia jamatabüj̈anepanaeya petonaj̈üanaenej̈a, penajuanawajükaenej̈anua. Bajarapakuenia ata itsi kaewai kanakujitsia, pepo ayaibitsaüto nakaetuanabiaba.

2. ¿Dej̈ua yapütaename patanakaetuanaejawata?

Itsa nakaetuanaenatsi, j̈aniawaetsiakuenia yapütaenatsi Dioso Pejumeliwaisi (lebare Nehemías 8:8). Itsa naponame, yapütaename Jehová yabara, daj̈ita pekuene yabara ata. Bitso itsa yapütaneme Jehová pekaasiwakuene, bitso jitsipaename pijaamigokueniamünej̈a. Yapütaenamenua pakuenia Jehová kayawenona j̈aniawaetsia neponaponaenej̈a (Isaías 48:17, 18).

3. ¿Depakuenia kajamatabükueneyawenonaena pamonae taename penakaetuatsibojawata?

Jehová jitsipa “namataenetsia benayavenonatsi vajanajamatabëcueneitajëtsinexa vajanasivacuene. [...] [Apobekopatsitsi wajanajonenej̈a] vajanacaetuatabiabibojavabelia” (Hebreos 10:24, 25). Patanakaetuanaejawata taename jiwi penaasiwakuene. Pakuenia j̈amükuenia, bajarapamonae ata jitsipa peyapütaejawa Dioso Pejumeliwaisi yabara. Bajarajota, paliwaisi jumetaename kajamatabükueneyawenonaena (lebare Romanos 1:11, 12). Barükuaikuaijamünua tsane pamonae penakojiobiwi, apopenakojiobiwinua. Bajarapamonae barüyaya jinawanapa liwaisi j̈ainae ata. Nej̈ata bajaraj̈uata Jehová jitsipa napüna wajanakaetuanaejawa.

KANAÜJÜTSIANATSI

4. Jehová petotsipaebaponaewi penakaetuanaekuene

Apóstolewi pijamatakabianüjawa, cristianomonae banakaetuanabiaba asiwaya pejumekowünütsij̈ae pakuenia Jehová itoroba (Romanos 16:3-5). Palebare Colosenses 3:16, panelebikujinae panabarükuaikuaijamü tsane paliwaisi yabaraje:

• ¿Depakuenia baitsi tsabiabi bajayata cristianomonae itsa nakaetuanabiaba?

VIDEOJAWA: ¿Dej̈ua paitsinü tsabiabi itsa panakaetuanajü? (2:12)

• Pakuenia baja yapütaneme Jehová pijajiwi penakaetuanaekuene yabara, ¿dej̈ua jüpa pakuenia jumaitsi Colosenses 3:16?

• Itsa taneme video, pejumape penakaetuanaekuene yabara, ¿dej̈ua katsitaj̈anepana?

Palebare 2 Corintios 9:7, panelebikujinae panabarükuaikuaijamü tsane paliwaisi yabaraje:

• ¿Dej̈uajitsia palata apowajükae Jehová petotsipaebaponaewi penakaetuatsijawata?

Pekakujarubijiwiyo yajawa pataemabeje j̈ua yapütaejitsiatsi pasemanataje penakaetuanaejawata.

• ¿Depaliwaisi bitso katsitaj̈anepana neyapütaenej̈a?

¿Yapütaneme baja?

Internet-jawata jw.org, yapütaename jota, pakujinae, panakaetuanaejitsianü daj̈itanakuajawa.

1. A. Daj̈ita patanakaetuanaejawa Dioso Pejumeliwaisi panamuj̈unaewetabiabajü, pataebiabajünua videojawanü. Wajita taj̈uj̈uaba, j̈uakujinae nawajüta Diosojawabelia. Bajarapijinia kopiaweretabiaba.

2. B. Itsajawata penapatsiwi nakuaikuaijai tsabiabi penakaetuatsijawata.

3. D. Daj̈itajiwi penapatsiwi pej̈aniakuenia pakawajünaekopiapitatsi: pebijiwi, petiriawi, penaweretsiwi, pejewaj̈ijiwij̈i ata.

4. E. Jehová petotsipaebaponaewi penakaetuatsibojawata palata apowajükae. Amoneya najonejitsipame.

5. Benajamatabükuenesaütatsi wajanakaetuanabiabinej̈a

Kanaüjütsianatsi Jesús pijamonae yabara. Bajarapamonae bajinawanapabiaba Nazaret tomarata. Kaewai kanakujitsia peponaenej̈a templobojawabelia Jerusalén tomarajawabelia, banajetabiabarubena petsutonüjawa akueyabi pamatakabibeje. Palebare Lucas 2:39-42, panelebikujinae panabarükuaikuaijamü tsane paliwaisianü yabaraje:

• ¿Ayapübeje meta nej̈ata pepatsinej̈a Jerusalén tomarabelia bajarapakujinae?

• ¿Jika j̈amü? ¿J̈amü ata meta nej̈ata najamatabükuenesaütsipame nenanakaetuatsinej̈a? ¿Nej̈ata deitsimü tsipae?

• ¿J̈anepana meta nej̈ata nenajamatabükuenesaütsijawa? ¿Dej̈uajitsia?

• ¿Dej̈uajitsia meta nej̈ata napüna benakaetuanatsi?

PALIWAISI BAJA YAPÜTANETSI

Itsa nanakaetuatsianame, bitso yapütaename Jehová yabara, bajarapakuenia naimoj̈oyotsianame bajaraponüjawabelia. Asiwaya tonakuenebabiabianame itsamonae yajawa.

Najamatabünapire

• ¿Dej̈uajitsia Jehová jitsipa wajanakaetuanaejawa?

• ¿Dej̈ua yapütaename itsa naponaename Jehová petotsipaebaponaewi penakaetuatsibojawabelia?

• ¿Depakuenia penakaetuanaejawa kajamatabükueneyawenonaena?

YAPÜTAENAME ITSALIWAISI

¿Auramü meta tsipae nenanakaetuanaejawa? Itsanü piauranü ata, j̈uakujinae tsitaj̈anepanatsi penanakaetuanaejawa. Taema paliwaisije.

“Kaeto ata aponakofünütsinü tsane pakuenia panekopiapita” (4:16)

Yapütaename pewüjüato peliwaisi petsitaj̈anepanaejawatsi penakaetuatsikuene apoyapüj̈anepanae atatsi penaponaenej̈a.

“Netsitaj̈anepana penakaetuatsijawa” (4:33)

Lebianame j̈ua itsamonae jamatabüitsi penakaetuanaekuene yabara.

“¿Dej̈uajitsia meta j̈anepana wajanaponaejawa Jehová pijajiwi penakaetuatsijawabelia?” (Ruka Internet-jawata jw.org)

Yapütaename pakuenia piakuenebejenümi ata nakuenej̈aneta tsipaji naponabiaba penanakaetuatsibojawabelia.

“Tsitekaeya kaponaponabiabajü tajanae” (Peyajiwitaebo, 1 de julio, 2014)