Itsa nabautisabame kajena pej̈aniakuene

Itsa cristianowijitsiatsi benabautisabatsi pakuenia Jesús jumaitsi (lebare Mateo 28:​19, 20). Itsiata, ¿dej̈ua meta penabautisabijawa? ¿Debeitsi pajiwi jitsipa penabautisabinej̈a?

1. ¿Dej̈ua meta penabautisabijawa?

“Nabautisaba” pejaijume pitsapa griegojumejawawerena, itsiata yabarajumaitsi “penajabutsijawa”, itsa jume, j̈ua bajabureka merajawabereka. Pakujinae Jesús nabautisaba, jaburekatsi Jordán menejawabereka, j̈uakujinae nonotajuna merajawawetsina (Marcos 1:​9, 10). Bajarapakuenia nabautisababiaba pepo cristianowi, jabutatsi merajawabereka daj̈itaperabüto.

2. ¿Dej̈ua najamatabükueneitajüta pajiwi nabautisaba?

Itsajiwiyo itsa nabautisaba, najamatabükueneitajüta üJehová pejumekowünütsijawa. ¿Debeitsi nej̈ata? Bajarapajiwi penabautisabiwajünaeya benawajüta Diosojawabelia pejumaitsinej̈a pakuenia tonakuenebijitsia übajaraponünej̈a daj̈itamatakabijawabelia. Najumekapanepaeya jumaitsi tsane übajaraponü peyaiyataenej̈a, peitsinej̈a üDioso pejitsipaekuenia. Bajarapakuenianua najamatabükuenewereta pekuenejüpaenej̈a Jesús. Bajaraponü jumaitsi: “Pajivi jitsipa tanepënaponaejava, bajarapajivi copatsi pejitsipaecuenia [...]. Nexata jane baja xuacujinae nepënaponaena” (Mateo 16:24). Bajarapajiwi penabautisabikujinae najamatabükueneimoj̈oyota Jehovájawabelia, yajawaponaponaenanua Jehová pijajiwi.

3. ¿Dej̈ua beitsimü nenabautisabinej̈a?

Itsa jitsipame nenabautisabinej̈a, kopiaya beyapütaneme Jehová, nej̈ata bejumej̈aniataneme bajaraponü (lebare Hebreos 11:6, TNM). Itsa yapütanenajetarukame, itsa jumej̈aniatanemenua Dioso Pejumeliwaisi, nej̈ata asiwamü tsane bitso Jehová. Bajaraj̈ua kayawenonaena pekatsitaj̈anepanaenej̈a Dioso Pejumeliwaisi netsipaebinej̈a itsamonaejawabelia, neponaponaenej̈anua pakuenia Dioso Pejumeliwaisi jumaitsi (2 Timoteo 4:2; 1 Juan 5:3). Itsa ponaponame Jehová pejitsipaekuenia, bajaraj̈ua kayawenonaena nejumekowünütsinej̈a üDioso, bajaraj̈uakujinae nenabautisabinej̈a (Colosenses 1:​9, 10).a

KANAÜJÜTSIANATSI

4. J̈ua nakayapütaeyaej̈ana Jesús itsa nabautisaba

Itsa payapütaejitsiamü bebeliayo Jesús penabautisabijawa yabara, palebare Mateo 3:​13-​17. Panelebikujinae panabarükuaikuaijamü tsane paliwaisibeje yabaraje:

• ¿Pakujinae nabautisaba Jesús, bajaraponü penakuetonüyo?

• ¿Saya baja tsikirimerayo tsimataepanatsi pematabokotota? Nej̈ata, ¿depakuenia nabautisaba?

Pakujinae nabautisaba Jesús taj̈uj̈uaba peitsinej̈a j̈ua Dioso itorobatsi. Palebare Lucas 3:​21-​23; Juan 6:​38, panelebikujinae panabarükuaikuaijamü tsane paliwaisi yabaraje:

• Jesús penabautisabikujinae, ¿dej̈ua siwanajamatabükuenesaüta peitsinej̈a?

5. J̈amü itsa nabautisabame Jehová pej̈aniakuene karajutsiana

¿Junawijitsipame meta netoponaponaejawa üDioso, nenabautisabinej̈anua? Itsiata, itsa bebeliayo yapütaenajetarukame Jehovákuene, nej̈ata apojumeabimü tsane nenabautisabinej̈a. Paneyapütaenej̈a pamonae nabautisaba baja, pataema VIDEOJAWA.

VIDEOJAWA: Najamatabükueneimoj̈oyore Jehovájawabelia (1:​11)

Palebare Juan 17:3; Santiago 1:​5, panelebikujinae panabarükuaikuaijamü tsane paliwaisi yabaraje:

• ¿Dej̈ua jamatabükueneyawenonaejitsipatsi pajiwiyo nabautisabijitsia?

1. Wajanawajütsijawata, najumekapanepaeya jumaitsitsi Jehovájawabelia übajaraponü wajatojinawanapaenej̈a daj̈itamatakabijawabelia.

2. Pakujinae nabautisabatsi baja, najamatabükueneitajütatsi jiwijawabelia wajatojinawanapaenej̈a üDioso.

6. Itsa nabautisabame, Jehová nej̈ata kataena bepijamonaejiwiyokueniamü

Itsa nabautisabatsi, nej̈ata Jehová pijajiwi daj̈itanakuajawa benakaemonaetsi tsane. Itsawiriawi atatsi, bajayata itsa pibisiakuene ej̈anae atatsi, itsiata daj̈itatsi najamatabükuenejüpatsi, najuajumekowünütatsi pakuenia Dioso nakaitoroba Pejumeliwaisibaj̈utota. Palebare Salmo 25:14; 1 Pedro 2:​17, panelebikujinae panabarükuaikuaijamü tsane paliwaisi yabaraje:

• Pakuenia lebame baja, ¿depakuenia nakajamatabükueneyawenonaejitsipa itsa nabautisabatsi?

PALIWAISI BAJA YAPÜTANETSI

Jesús jumaitsi pajiwi pijajiwiyojitsia nej̈ata benabautisaba. Nej̈ata bejumej̈aniatanetsi bitso Jehová, bejumekowünütatsi Pejumeliwaisi, betojinawanapatsi übajaraponünej̈a.

Najamatabünapire

• ¿Dej̈ua yabarajumaitsi penabautisabijawa? ¿Dej̈uajitsia pepo pej̈aniakuene bajaraj̈ua?

• ¿Dej̈ua najamatabükueneitajüta pajiwi nabautisaba?

• ¿Itsajiwiyo debeitsi penabautisabiwajünaeya?

YAPÜTAENAME ITSALIWAISI

Yapütaename pej̈aniajailiwaisianü penabautisabijawa yabara.

“¿Dej̈ua meta bautismo yabarajai?” (Ruka Internet-jawata jw.org)

Yapütaename pakuenia beitsi pajiwi penabautisabiwajünaeya.

“Wajanaasiwajawa, wajajamatabükuenebarüyajawa Jehovájawabelia, nakajamatabükuenekapona wajanabautisabinej̈a” (Peyajiwitaebo, marzo de 2020)

Lebianame pakuenia itsanü najamatabükuenewereta penabautisabinej̈a.

“Itsamonae netojitsipa tajakueneta tayapütaejawa pej̈aniajailiwaisi” (Peyajiwitaebo, 1 de febrero, 2013)

¿Dej̈uajitisia benabautisabame? ¿Dej̈ua beitsimü nenabautisabiwajünaeya? Yapütaema bajarapaliwaisi majotaje.

“¿Nekuenekaüjüpa meta baja tanabautisabinej̈a?” (J̈ua pewüjüawi, pejanawi jamatabüyapütane, volumen 2, capítulo 37)