LIWAISI 36
Daj̈itakuenejawabelia bekuenej̈anepanatsi
Daj̈itajiwi tsitaj̈anepanatsi pejamatabükuenej̈anepanaewi. Jehová ata bajarapakuenia pijaamigowikuenianej̈a tsitaj̈anepanatsi. Itsiata apoyapüj̈anepanae wajakuenej̈anepanaenej̈a tsipaji panakuata daj̈itajiwi akuenebeje. ¿Nej̈ata meta bitso pej̈aniakuene itsa kuenej̈anepanatsi?
1. ¿Dej̈uajitsia nej̈ata bekuenej̈anepanatsi?
Itsamonaejawabelia itsa kuenej̈anepanatsi, nej̈ata Jehovájawabelia betonajamatabükueneitajütatsi wajayaiyataekuene, wajaasiwakuenenua. Jehová ata nakajamatabükueneyapütane j̈ua ata itsitsi. (Hebreos 4:13). Itsa kuenej̈anepanatsi, Jehová nakakueneyapütane, jamatabükuenebarüyayaej̈anatsinua. Bibliajawata jumaitsi: “Jehová bitso ataejitsibi piajamatabükuenebejewi, itsiata baitsi jane, pejamatabükuenej̈anepanaewi pepo asiwaya naükota” (Proverbios 3:32).
2. ¿Depakuenia bekuenej̈anepanatsi?
Jehová jitsipa namataenetsia wajanatsipaebijawa pej̈aniajailiwaisi (Efesios 4:25). Nej̈ata apobeyamaj̈üitojorobitsi wajamonae, wajanajuanakuenebiwi ata, wajamonae congregaciónjawata, pitorobiwi ata. Pekuenej̈anepanaewi aponakobetoj̈otsi, apoyamaj̈üitojorobi (lebare Proverbios 24:28; Efesios 4:28). Matamotanua pijaimpuestojawanü (Romanos 13:5-7). Daj̈itakuenejawabelia bekuenej̈anepanatsi (Hebreos 13:18).
3. ¿Dej̈uajitsia bejamatabükuenej̈anepanatsi?
Itsa jamatabükuenej̈anepanatsi nej̈ata congregaciónjawata nakaitaj̈utuajamatejema, daj̈itatsi naitaj̈utuajamatejematsi benakaemonaekueniatsi. Biajamatabükueneliwaisi barüyatsi. Itsamonae itsa nakakueneyapütane wajajamatabükuenej̈anepanaejawa, nej̈ata Jehová yapütanenua daj̈ita pekuenej̈anepanaejawa. Bajaraj̈ua jamatabükueneyawenonaejitsipatsi pamonae jitsipa Jehová petonakuenebijawa (Tito 2:10).
KANAÜJÜTSIANATSI
Itsa jamatabükuenej̈anepanatsi, naimoj̈oyotatsi Jehovájawabelia, yapütaenatsi nej̈ata pakuenia daj̈itakuenejawabelia bejamatabükuenej̈anepanatsi.
4. Jehová tsitaj̈anepanatsi pejamatabükuenej̈anepanaewi
Palebare Salmo 44:21; Malaquías 3:16, panelebikujinae panabarükuaikuaijamü tsane paliwaisibeje yabaraje:
¿J̈anepana meta nej̈ata pej̈aniajailiwaisi wajanawekuamatayatsijawa? ¿Dej̈uajitsia bajarapakuenia jumaitsimü?
Itsa j̈aniajaitsi aponakatoyapüj̈anepanae ata, ¿Jehová nej̈ata debenakasiwajamatabükueneitsi?
Pej̈i pej̈ainaewi jamatabükuenebarüya pej̈i itsa j̈aniajai. Bajarapijinia Jehová jamatabükuenebarüyayaej̈anatsi itsa j̈aniajaitsi.
5. Üwajajamatabükuenej̈anepanaenej̈a
Itsamonae itsajawata apotsitaj̈anepanaetsi pejamatabükuenej̈anepanaenej̈a, itsiata daj̈itakuenejawabelia bejamatabükuenej̈anepanatsi. Nej̈ata paneyapütaenej̈a pataema VIDEOJAWA.
Palebare Hebreos 13:18, panelebikujinae panabarükuaikuaijamü tsane paliwaisianü yabaraje: ¿Depakuenia nej̈ata bekuenej̈anepanatsi...
... wajamonaejawabelia?
... wajanajuanakuenebijawata, wajayakinaejawatanua?
... itsajawabelia ata?
6. Itsa jamatabükuenej̈anepanatsi j̈aniawaetsiakuenia bejinawanapatsi
Itsajawata ayailiwaisi nakatokopiapata wajakuenej̈anepanaej̈ae. Itsiata kajena bitso j̈anepana wajakuenej̈anepanaejawa. Palebare Salmo 34:12-16, panelebikujinae panabarükuaikuaijamü tsane paliwaisi yabaraje:
¿Dej̈uajitsia itsa jamatabükuenej̈anepanatsi j̈aniawaetsia bejinawanapatsi?
A. Itsa penakojiobijiwibeje najuakuenej̈anepanabeje, j̈aniawaetsia tsitekaeya nabarüponaponabeje.
B. Penakuenebiwi ata itsa kuenej̈anepana, pijatuj̈anewi itaj̈utuajamatejematsi.
D. Tomara pewetsiwi yapütane pekuenej̈anepanaewi, itsa jumekowünüta pitorobiliwaisianü.
ITSAMONAE BAJUMAITSI: “Najumetsünütsi atanü saya, apoabeje”, jai.
¿Daj̈ita meta nej̈ata penajumetsünütsikuene Jehová ataejitsibi? ¿Dej̈uajitsia bajarajumaitsimü?
PALIWAISI BAJA YAPÜTANETSI
Jehová jitsipa pijaamigowi pejamatabükuenej̈anepanaewi daj̈itakuenejawabelia.
Najamatabünapire
¿Depakuenia meta nej̈ata bekuenej̈anepanatsi daj̈itakuenejawabelia?
¿Dej̈uajitsia apoj̈anepanae itsamonaejawabelia wajanawekualiwaisimatayatsijawa?
¿Dej̈uajitsia katsitaj̈anepana nekuenej̈anepanaejawa?
YAPÜTAENAME ITSALIWAISI
Pej̈i pej̈ainaewi pej̈aniajaikuenia pej̈i bekujaruba pejamatabükuenej̈anepanaenej̈a.
¿Deitsi baja nej̈ata pamonae tonajumekapanepa j̈ua jumaitsi?
Kanaüjüre impuestokuene itsa bematamotatsi, bajarapapalata nakobetoj̈otsi ata.
“¿J̈amü nej̈ata impuestokuene matamotsipame?” (Peyajiwitaebo, 1 de septiembre, 2011)
¿Dej̈uajitsia piakuenebejenümi ata aekonoj̈ae kuenej̈anepana? Lebare peliwaisi.