LIWAISI 42
¿Dejumaitsi Dioso Pejumeliwaisibaj̈uto imasia perukaejiwiyo, penakojiobiwi atanua yabara?
Itsamonae bajumaitsi: “Barüyaya neponaponaenej̈a benakojiobame”, jai itsamonae. Itsiata baitsi jane, daj̈ita penakojiobiwi apojamatabükuenebarüya, pimasiarubenaewi ata apojamatabükuenebarüya. Dioso Pejumeliwaisi nakayapütaeyaej̈ana pimasiarubenaewi, penakojiobiwi ata Dioso pej̈aniakuene rajutatsi.
1. ¿Dej̈uajitsia meta j̈anepanaejitsipa pimasiarubenaejawa?
Dioso Pejumeliwaisi jumaitsi: “Nej̈ata pajiwiyo nakojioba, pej̈aniakuene itsi. Itsiata baitsi jane pajiwiyo tsiteka imasiaruka, bajaraj̈ua bitso pepo j̈anepana”, jai (lebare 1 Corintios 7:32, 33, 38, TNM). Cristianowi pimasiarubenaewi ajibi pesiwajamatabükuenebüjaijiwiyo tsipaji pamona, pijawa apoj̈ainae, bajaraj̈ua jamatejemaya jinawanapa. Itsamonae pimasiarubenaewiyajüwünüwi toyapüj̈anepanatsi petonakuenebawanapaenej̈a Jehová. Itsajawata, toyapüj̈anepanaejitsipatsi petsipaebinej̈a Dioso Pejumeliwaisi itsanakuanüjawabelia. Nej̈ata pimasiarubenaewi toyapüj̈anepanatsi penajamatabükueneimoj̈oyobinej̈a Jehovájawabelia.
2. ¿Dej̈uajitsia j̈anepana penacasabijawa juezmonae pitabarata?
Bibliabaj̈utota jumaitsi: “Bitso j̈anepana anijajiwibeje penajuaponaponaejawabeje [...]. Itsiata bitso apoj̈anepanae kaejiwi peponaponaejawa” (Eclesiastés 4:9). Bajarapakuenia jinawanapa papenakojiobiwi, tsipaji jumekowünüta j̈ua jumaitsi Dioso Pejumeliwaisibaj̈uto. Papenakojiobiwibeje nacasaba jueznü pitabarata najumekapanepaeya najumaitsibeje penaasiwanej̈abeje, penayaiyataenej̈abeje, penaewetsinej̈abeje itaj̈utotsoniataeya. Penacasabiwi najamatabükuenesaüta namataenetsia penaewetsinej̈a, j̈aniawaetsiakuenia penakoj̈ijiwitsatsinej̈anua.
3. ¿Dej̈ua siwanajamatabüj̈aina Jehová penacasabikuenejawa yabara?
Pakujinae Jehová nacasabiaej̈ana kopiaya jiwibeje, jumaitsi: “Pebi wecuapitsapaena paxa, pena-ata, pepitsinexa pijawa, pebarëponaponaenexa [bajarapowa]” (Génesis 2:24). Jehová jitsipa penacasabijiwibeje asiwaya penajuaponaponaejawabeje itsa abaj̈ü asaü tsaponaponaebeje. Jehová saya baja tokopata penaj̈uabinej̈abeje itsa bajarapajiwibejeyajuwünü kenetsiatane itsajiwiyojawabelia. Nej̈ata Dioso tokopatatsi penajamatabükueneweretsinej̈a pajiwiyo pibisiakuene apoej̈anae pakuenia naj̈uabijitsiabeje (Mateo 19:9).a Jehová tsitaj̈anepanatsi cristianowi penacasabinej̈a kaejiwiyojawabelia (1 Timoteo 3:2).
KANAÜJÜTSIANATSI
Itsa j̈amü imasia neponaponaejiwiyo, itsa jume, nenacasabijiwiyo, ¿dej̈ua beitsimü barüyaya neponaponaenej̈a, nejamatabükuenebarüyaej̈anaenej̈anua Jehová? Bajaraj̈ua yapütaenatsi.
4. Itsa imasiarukame pej̈aniakuene ej̈anare Diosonej̈a
Jesús pimasiarukaejawa, tsitapej̈aniakuenetsi (Mateo 19:11, 12). Palebare Mateo 4:23, panelebikujinae panabarükuaikuaijamü tsane paliwaisi yabaraje:
Pimasiarukaej̈ae, ¿deitsi nej̈ata Jesús petonakuenebinej̈a Jehová, peyawenonaenej̈anua itsamonae?
Cristianowi pimasiarubenaewi jamatabükuenebarüya tsipae itsa pej̈aniakuene ej̈ana Jesúskuenia. Pataema VIDEOJAWA, panetaekujinae panabarükuaikuaijamü tsane paliwaisi yabaraje:
¿Dej̈ua kuenekaüjüpatsi peitsinej̈a pacristianowi imasiarubena?
¿Yapütaneme baja?
Dioso Pejumeliwaisibaj̈utota apojumaitsi depawaita benakojiobatsi. Itsiata baitsi jane, paliwaisi nakayapütaeyaej̈ana wajaewetsinej̈a wajajamatabükuenenaweretsijawa. Tsipaji pakujinae pewüjüawi, pejanawi ata jamatabükuenekaponatsi penakenetsiataenej̈a, nej̈ata aponatsiwajünaekanaüjütsi j̈aniawaetsia (1 Corintios 7:36, TNM).
5. J̈aniawaetsiakuenia itapere pajiwiyo barünacasabijitsiamü
Itsa kanaüjütame j̈aniawaetsia nitapetsiwaj̈unaeya pajiwiyo barünacasabijitsiamü pepo pej̈aniakuene itsimü. Palebare Mateo 19:4-6, 9a, panelebikujinae panabarükuaikuaijamü tsane paliwaisi yabaraje:
¿Dej̈uajitsia cristianojiwiyo j̈aniawaetsia benajamatabükuenewereta penacasabiwajünaeya?
Bibliabaj̈utota kayapütaeyaej̈ana pebi bekuenej̈anepana, itsa jume, petiriwa bej̈aina penakojiobinej̈a. Itsa nakojiobijitsiamü jaire bitso piasiwajiwiyo Jehová.b Lebare 1 Corintios 7:39; 2 Corintios 6:14, TNM. Panelebikujinae panabarükuaikuaijamü tsane paliwaisibeje yabaraje:
Itsa pepo cristianojiwiyo najamatabükuenewereta penacasabinej̈a, ¿dej̈uajitsia üpepo cristianowi benabarünacasaba?
Itsa pepo cristianojiwiyo barünacasaba apopejumekowünütsijiwiyo Jehová, ¿dejamatabükueneitsi tsipae Jehová?
Itsa anijadajubibeje apopenajüpaenübeje büsirutatsi yugojawa, nej̈ata jamatabükuenebejiobi. Bajarapakuenia yajawa itsa pepo cristianojiwiyo barünacasaba apopiasiwajiwiyo Jehová, nej̈ata jamatabükuenebejiobi tsane.
6. Najamatabüj̈ainame penakojiobikuene yabara Jehovákuenia
Bajayata Israel nakuapijiwi, itsapebijiwi bapenetabiaba pijawajiwi jemakuenejawanü yabara. Palebare Malaquías 2:13, 14, 16, panelebikujinae panabarükuaikuaijamü tsane paliwaisi yabaraje:
Pajiwiyo peyajawaponaponaejiwiyo itsa j̈uaba jemakuene yabara, Jehová tsitaabejetsi, ¿dej̈uajitisia?
Itsa naj̈uababeje jamatabükuenebejiobiaej̈ana pijawa, pej̈i yajawa.
Pataema VIDEOJAWA, panetaekujinae panabarükuaikuaijamü tsane paliwaisi yabaraje:
Itsa j̈amü baja barünacasabame itsajiwiyota apopejitsipaejiwiyo Jehová, ¿dej̈ua nej̈ata beitsimü barüyaya paneponaponaenej̈abeje?
7. Jumekowünüre paliwaisi Jehová itoroba penakojiobikuene yabara
Itsamonae tsitaayapübejetsi pejumekowünütsinej̈a paliwaisi Jehová itoroba penakojiobikuene yabara.c Itsiata baitsi jane, bajaraponü bitso yawenonaena pamonae najamatabükuenesaüta pejumekowünütsinej̈atsi. Pataema VIDEOJAWA.
Palebare Hebreos 13:4, panelebikujinae panabarükuaikuaijamü tsane paliwaisi yabaraje:
¿Katsitayapüj̈anepana paliwaisi Jehová itoroba penacasabijawa yabara? ¿Dej̈uajitsia?
Jehová jitsipa pepo cristianowi pejutsinej̈a registro matrimoniobaj̈uto, bajarapijinia beitsi itsa naj̈uabijitsiabeje. Tsipaji bajaraj̈ua daj̈itanakuajawa jiwi pematakaitorobiwi itoroba. Palebare Tito 3:1, panelebikujinae panabarükuaikuaijamü tsane paliwaisi yabaraje:
Itsa nacasabame baja, ¿jutame registro matrimoniobaj̈uto pakuenia pematakaitorobiwi itoroba?
ITSAMONAE BAJUMAITSI: “¿Dej̈uajitsia benacasabatsi? ¿Namatawenonatsi meta jueznü pitabarata wajanacasabinej̈a?”, jai.
¿Dejumaitsimü tsipae?
PALIWAISI BAJA YAPÜTANETSI
Jehová tsitapej̈aniakuenetsi pimasiarubenaewi, penakojiobiwi ata. Daj̈itatsi barüyaya bejinawanapatsi itsa itsijitsiatsi Jehová pejitsipaekuenia.
Najamatabünapire
¿Dej̈ua beitsi pimasiarubenaewi?
Bibliabaj̈utota jumaitsi üpepo cristianowi benabarünacasaba, ¿dej̈uajitsia?
Pakuenia Bibliabaj̈utota jumaitsi, ¿depitsajamatabükuene yabara naj̈uabijitsipabeje?
YAPÜTAENAME ITSALIWAISI
Üpepo cristianowi banabarünacasaba. Yapütaename bajarapaliwaisi yabara.
Yapütaema anijaliwaisibeje pijajarabi yabara, penacasabijawa yabara ata, j̈aniawaetsia nenajamatabükueneweretsinej̈a.
Taename j̈ua itsanü kopata petonakuenebinej̈a Jehová, itsiata pakuenia ajenata bajaraponü barüyaya ponapona.
Jamatabükueneewetajü pikani tajajarawa penayapütaenej̈a Dioso Pejumeliwaisi (1:56)
Panenaj̈uabiwajünaeyabeje, panenawekuanatsatsiwajünaeyabeje ata, ¿dej̈ua bepakanaüjütamebeje kopiaya?
“Benakatsitapej̈aniakuene wajanacasabikuene” (Peyajiwitaebo, diciembre de 2018)
a Itsaliwaisi 4 yapütaename penawekuanatsatsiliwaisi yabara (itsa namataenetsia aponawekuajaitsibeje itsajiwiyo).
b Itsawiriawi juya pijakuenejawanü itsi mapakueniaje: pej̈i pej̈ainaewi nakojiobiaej̈anabiaba pej̈i pajiwiyota jitsipa. Nej̈ata bajarapamonae bejaitabiaba pajiwiyo asiwa Jehová, apoj̈ainae ata ayaipalata.
c Itsa barünakojiobaponaponame itsajiwiyo aponacasabinejewamü, nej̈ata itsa jumekowünütsijitsiamü Jehová, nacasabijitsipame, itsa jume, j̈amü beitapetame pakuenia itsimüjitsia.