¿Debeitsi pebi, pijawa, pej̈i yajawa barüyaya pejinawanapaenej̈a? (kopiaya liwaisi)

Pajiwibeje nacasaba jitsipabeje barüyaya peponaponaenej̈abeje daj̈itamatakabijawabelianej̈a pakuenia barüyaya baponaponabeje pamatakabita nacasababeje. Bajaraj̈ua apoayapübeje, bajarapaliwaisi yapütane pacristianowi bajayajebi nacasaba jinawanapa tsipaji jumekowünüta Dioso Pejumeliwaisibaj̈uto.

1. ¿Depaliwaisi yapütaeyaej̈ana Bibliabaj̈uto penacasabinünej̈a?

Jehová itoroba pebi pematakaponaenej̈a pijamonae (lebare Efesios 5:23). Bajaraj̈uata pebi bekanaüjüta j̈aniawaetsia j̈ua itsijitsia pijamonae barüyaya pejinawanapaenej̈a. Dioso Pejumeliwaisibaj̈utota muj̈ujioba penacasabinü paliwaisije: “Pasivamëre panijavajivi” (Efesios 5:25). Nej̈ata penacasabinü asiwaya beyajawaponapona pijawa, pakujinae ata pijabojawata ekabeje, itsa yajawajinawanapanua itsamonae. Beweta, berajutanua j̈ua namatawenona pejamatabükuenebarüyanej̈a (1 Timoteo 5:8). Beyawenonanua pijawa pejamatabükueneimoj̈oyotsinej̈a Diosojawabelia (Mateo 4:4). Bajaraj̈uata benajuanawajükabeje Jehovájawabelia, benajualebabeje Dioso Pejumeliwaisi. Nej̈ata itsa penacasabinü asiwaya eweta pijawa, bajaraj̈ua jamatabükueneimoj̈oyotsiaej̈anaena Jehovájawabelia (lebare 1 Pedro 3:7).

2. ¿Depaliwaisi yapütaeyaej̈ana Bibliabaj̈uto penacasabiwanej̈a?

Dioso Pejumeliwaisibaj̈utota muj̈ujioba penacasabiwa pijinia beyaiyatane pamona (Efesios 5:33). ¿Dej̈ua beitsi nej̈ata? Benajamatabüj̈aina papej̈aniajamatabükuene j̈aina pamona, pakuenia j̈aniawaetsia ewetatsi, pej̈i yajawa. Bejumekowünüta yaiyataeya j̈ua bajaraponü jumaitsi, asiwaya kuaikuaijai bajaraponüjawabelia, bewünüa, kuaikuaijainua j̈aniawaetsia pamona yabara, bajaraponü apojumekowünütsi ata Dioso.

3. ¿Dej̈ua beitsi penacasabiwibeje penajamatabükuenesaütsinej̈abeje?

Dioso Pejumeliwaisibaj̈uto jumaitsi penacasabiwi yabara: “Dioso tane anijajivimibeje becaejivi” (Mateo 19:5). Bajaraj̈uata apobenawekuatajayotsibeje. Bajaraj̈uata bajarapajiwibeje nayajiwitaeya beponaponabeje bitso penaimoj̈oyotsiyaniwa itsajiwiyojawabelia pamonawekua, pijawawekua. Bajarapakuenia bajarapajiwibejenej̈a Jehová pijakuene, penacasabikuenenua bitso namatamota daj̈itakuenewekua.

KANAÜJÜTSIANATSI

4. Penacasabinü biasiwa, bewetanua pijawa

VIDEOJAWA: Penacasabinü biasiwa pijawa pakuenia pijakuata naperabüasiwa (9:53)

• ¿Depakuenia penacasabinü benajamatabükueneitajüta piasiwajawa pijawa?

Palebare Colosenses 3:12, panelebikujinae panabarükuaikuaijamü tsane paliwaisi yabaraje:

• ¿Depakuenia penacasabinü najamatabükueneitajütsipa pijawajawabelia papej̈aniajamatabükuenejawanü?

5. Penacasabiwa biasiwa, beyaiyatanenua pamona

Dioso Pejumeliwaisibaj̈utota jumaitsi pakuenia penacasabiwa beyaiyatane pamonajawabelia, bajaraponü apojumekowünütsi ata Jehová. Palebare 1 Pedro 3:1, 2, panelebikujinae panabarükuaikuaijamü tsane paliwaisibeje yabaraje:

• Itsa amona meta apojumekowünütsi Jehová, j̈amü meta jitsipame neyajawajumekowünütsinej̈a. ¿Depakuenia yawenonaejitsipame amona? ¿Daj̈itamatakabi meta Dioso Pejumeliwaisi bebarükuaikuaijamü tsipae? Itsa jume, ¿bitso benajamatabükueneitajütsipame neyaiyataejawa bajaraponü? ¿Dej̈uajitsia bajaraj̈ua beitsimü?

Penacasabiwibeje peitsiwajünaeyabeje itsakuenejawa, j̈aniawaetsia bekanaüjütabeje. Itsiata meta itsajawata penacasabiwa apotsitaj̈anepanae tsipaetsi j̈ua pamona najamatabükuenewereta peitsinej̈abeje. Nej̈ata penacasabiwa yaiyataeya bejumaitsi pakuenia najamatabüj̈aina. Itsiata bajarapowa benajamatabünapita pakuenia Jehová itapeta pebi j̈aniawaetsia pematakaponaenej̈a pijamonae. Nej̈ata penacasabiwa yawenona pamona peitsinej̈a j̈ua najamatabükuenewereta, bajarapakuenia barüyaya najuaponaponaenabeje. Palebare 1 Pedro 3:3-5, panelebikujinae panabarükuaikuaijamü tsane paliwaisi yabaraje:

• ¿Dejamatabüitsi Jehová itsa penacasabiwa najamatabüitajüta peyaiyataejawa pamona?

6. Penacasabiwi barüyaya jinawanapaejitsipa ayailiwaisi tokopiapatsi atatsi

VIDEOJAWA: Dej̈ua beitsibeje penacasabiwibeje barüyaya penajuaponaponaenej̈abeje? (5:44)

• Pakuenia tanetsi videojawata, ¿depakuenia najamatabükuenetajüyotabeje bajarapajiwibeje?

• ¿Dej̈ua itsi bajarapajiwibeje barüyaya penajuaponaponaenej̈abeje?

Palebare 1 Corintios 10:24; Colosenses 3:13, TNM, panelebikujinae panabarükuaikuaijamü tsane paliwaisi yabaraje:

• ¿Depakuenia jamatabükueneyawenonaejitsipatsibeje penacasabiwibeje itsa jumekowünütabeje bajarapaliwaisi?

Dioso Pejumeliwaisibaj̈uto jumaitsi namataenetsia benaasiwatsi benayaiyatanetsinua. Palebare Romanos 12:10, panelebikujinae panabarükuaikuaijamü tsane paliwaisi yabaraje:

• ¿Depatsa meta kopiaya benajamatabükueneitajüta peyaiyataekuene? ¿Dej̈uajitsia najamatabüj̈ainame bajarapakuenia?

PALIWAISI BAJA YAPÜTANETSI

Itsa penacasabiwibeje naasiwabeje, nayaiyatanebeje, itsa najuajumekowünütabeje Dioso Pejumeliwaisi, nej̈ata barüyaya najuaponaponaenabeje.

Najamatabünapire

• ¿Dej̈ua beitsi penacasabinü barüyaya peyajawaponaponaenej̈a pijawa?

• ¿Dej̈ua beitsi penacasabiwa barüyaya peyajawaponaponaenej̈a pamona?

• Itsa nacasabame baja, ¿depaliwaisi Dioso Pejumeliwaisita kajamatabükueneyawenonaejitsipa?

YAPÜTAENAME ITSALIWAISI

Yapütaema papej̈anialiwaisianü rubena Bibliajawata pejamatabükueneyawenonaenej̈a pebi, pijawa, pej̈i yajawa barüyaya penajuajinawanapaenej̈a.

Pebi, pijawa, pej̈i yajawa barüyaya pejinawanapaenej̈a (folletobaj̈uto)

Pataema papenaj̈üanaevideojawataje itsa pajumekowünütamebeje papemuj̈ujiobiliwaisianü penacasabiwinej̈a, pej̈aniakuenejawanü Dioso pakarajutsianabeje.

Pepokuene penajitsipaejawa (4:26)

Yapütaename pakuenia petiriwa beyaiyatane penacasabinü pematakaponaejawa.

“¿Dej̈uajitsia petiriwa beyaiyatane pebi pematakaponaejawatsi?” (Peyajiwitaebo, 15 de mayo, 2010)

Yapütaema pakuenia penacasabijiwibeje penaj̈uabikujinaebeje nabarajamatabükuenej̈anepanabeje.

Jehová pejamatabükueneta ikatsia panacasabajübeje (5:14)