¿Debeitsi pebi, pijawa, pej̈i yajawa barüyaya pejinawanapaenej̈a? (pekotokaewiliwaisi)

Pejewaj̈i naitajüba Jehová pejamatabükueneta. Bajaraj̈uata Jehová jitsipa pej̈i pej̈ainaewi j̈aniawaetsia penakoj̈iewetsinej̈a. Nej̈ata bajaraponü yapütaeyaej̈ana pakuenia bajarapamonae pej̈i bewetabiaba. Bajarapijinia pejewaj̈i yapütaeyaej̈ana pakuenia itsijitsia paj̈a, pena yajawa pejamatabükuenebarüyayaej̈anaenej̈a.

1. ¿Jehová depapej̈anialiwaisianü yapütaeyaej̈ana pej̈i pej̈ainaewi?

Jehová jitsipa pej̈i pej̈ainaewi penakoj̈iasiwajawa, jitsipanua matakabi pejutsijawa pej̈i pebarüjinawanapaenej̈a. Yajawa jitsipa j̈aniawaetsia pewetsijawa pej̈i piayaikuenewekua, jitsipanua petsipaebijawa pej̈i Dioso Pejumeliwaisi (Proverbios 1:8). Dioso itoroba pej̈i pej̈ainaewijawabelia pakueniaje: “Xaniavaetsia panacoxivitsare [...]. Pacujarubarenua Dioso pejumelivaisi pejumecovënëtsinexa” (lebare Efesios 6:4). Jehová tsitaj̈anepanatsi bitso pej̈i pej̈ainaewi j̈aniawaetsia penakoj̈iewetsijawa muj̈ujiobiaya Dioso Pejumeliwaisi. Jehová apojitsipae itsamonae pekoj̈iwitsatsijawatsi.

2. ¿Jehová depaliwaisi yapütaeyaej̈ana pejewaj̈inej̈a?

Jehová jitsipa pejewaj̈i pejumekowünütsijawa paj̈a, pena ata (lebare Colosenses 3:20). Itsa pejewaj̈ijiwiyo yaiyatane paj̈a, pena ata, itsa jumekowünütanua, nej̈ata jamatabükuenebarüyayaej̈anaena bajarapajiwibeje, Jehová ata (Proverbios 23:22-25). Jesús pejewaj̈inüyojawaweliakujinae nekoni apoj̈ainae, itsiata yaiyataeya jumekowünütabiaba paj̈a, penabeje nekoni j̈ainae atabeje (Lucas 2:51, 52).

3. ¿Dej̈ua beitsi penakojiobiwi, pejewaj̈i ata penajamatabükueneimoj̈oyotsinej̈a Jehovájawabelia?

J̈amü meta nej̈i itsa j̈ainame, jitsipaejitsipame nej̈i piasiwajawa Jehová pakuenia j̈amü asiwamü Jehová. ¿Debeitsimü nej̈ata? Bejumekowünütame pakuenia jumaitsi Bibliabaj̈utota: “pacujarubabiabianame panexijawabelia, pa-epatota pajinawanapame panijabonëjawata, pa-epatota namuto panenajetarubenaejawata” (Deuteronomio 11:19). J̈amü meta baja nej̈i tsipaebabiabame penakofünütsiyaniwa j̈ua kujarubame baja. Bajaraj̈uata nej̈i bebarükuaikuaijamü tsikiriliwaisiyo Jehová yabara matakabijebi. J̈anepananua paj̈a, pena, pej̈i yajawa penajuanakujarubijawa Dioso Pejumeliwaisi kaesemana kanakujitsia. Nej̈i apoj̈ainae atamü, nijakueneta benakujarubame Dioso Pejumeliwaisibaj̈uto, bajaraj̈ua bitso kajamatabükueneyawenonaena.

KANAÜJÜTSIANATSI

4. Asiwayakuenia nej̈i tsipaebare

Apokatoyapüj̈anepanae ata kajena asiwayakuenia nej̈i netsipaebijawa. ¿Depakuenia nej̈ata Dioso Pejumeliwaisi kajamatabükueneyawenonaejitsipa? Palebare Santiago 1:19, 20, panelebikujinae panabarükuaikuaijamü tsane paliwaisibeje yabaraje:

• ¿Depakuenia pej̈i pej̈ainaewi asiwayakuenia bebarükuaikuaijai pej̈i?

• ¿Dej̈uajitsia pej̈i pej̈ainaewi anaeya apobemuj̈ujiobi pej̈i?a

5. J̈aniawaetsiakuenia ewere nej̈i

J̈aniawaetsiakuenia nej̈i itsa ewetame, nej̈ata betsipaebame nej̈i penakenetsiataekuene yabara, aura atamü. Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:

VIDEOJAWA: J̈aniawaetsiakuenia nej̈i ewere pibisiakuenewekua (2:58)

• ¿Dej̈uajitsia pej̈i pej̈ainaewi apotoyapüj̈anepanaetsi pej̈i pebarükuaikuaijaijawa penakenetsiataeliwaisi yabara?

• ¿Dej̈ua meta yawenona pej̈i pej̈ainaewi pebarükuaikuaijainej̈a pej̈i bajarapaliwaisi yabara?

Pakuenia tajüwelia wajunupaeba Bibliabaj̈uto, Dowatji pejamatabükueneta jiwi ajamatabükuenebeje tsawanapae. Palebare 2 Timoteo 3:1, 13, panelebikujinae panabarükuaikuaijamü tsane paliwaisi yabaraje:

• Tsikiriitanetoyo 13-jawata yapütaeyaej̈ana itsamonae piajamatabükuenebejewi pejewaj̈ikenetsiatane, ¿dej̈uajitsia nej̈ata pepo j̈anepanae pej̈i petsipaebijawa penakenetsiataeliwaisi yabara? ¿Dej̈ua beitsi pej̈i pej̈ainaewi pewetsinej̈a pibisiajamatabükuenewiwekua?

¿Yapütaneme baja?

Jehová petotsipaebaponaewi kapitsapa pej̈anialiwaisijawanü pej̈i pej̈ainaewi petsipaebinej̈a pej̈ijawabelia penakenetsiataeliwaisi yabara, pewetsinej̈anua pej̈i pibisiajamatabükuenewiwekua. Bajarapaliwaisijawanü maj̈uaje:

• Paewere j̈aniawaetsia panej̈i (videojawa)

• Jesús nakakujaruba pej̈anialiwaisi, capítulojawatabeje 10, 32

• “Barükuaikuaijamüre nej̈i penakenetsiataejawa yabara” (¡Naükore!, número 5, 2016)

6. Yaiyataema aj̈a, ena yajawa

VIDEOJAWA: ¿Depakuenia bebarükuaikuaijamü aj̈a, ena yajawa? (2:19)

• ¿Dej̈uajitsia pewüjüato, pejanawa ata yaiyataeya bebarükuaikuaijai paj̈a, penabejejawabelia?

• ¿Depakuenia pewüjüato, pejanawa ata paj̈a, pena ata beyaiyatane?

Palebare Proverbios 1:8, panelebikujinae panabarükuaikuaijamü tsane paliwaisi yabaraje:

• ¿Debeitsi pewüjüato, pejanawa ata itsa paj̈a, penabeje jumaitsitsi j̈ua beitsi?

7. Paj̈a, pena, pej̈i ata benajuanakujaruba Jehová yabara

Daj̈ita Jehová petotsipaebaponaejiwiyo najuanakujarubabiaba pijamonae yajawa kaesemana kanakujitsia Dioso yabara. ¿Depakuenia itsitsi bajaraj̈ua? Pataema VIDEOJAWA, panetaekujinae panabarükuaikuaijamü tsane paliwaisianü yabaraje:

VIDEOJAWA: Pebi, pijawa, pej̈i yajawa najuanakujaruba Dioso Pejumeliwaisi (8:04)

• ¿Dej̈ua kayawenonaejitsipa nijamonae nebarünakujarubabiabinej̈a Dioso Pejumeliwaisi?

• ¿Debeitsi pej̈i pej̈ainaewi barüyaya pej̈i pekujarubinej̈a Dioso Pejumeliwaisi? (Taema kopiaya pejumape).

• ¿Dej̈ua katoayapübeje tsipae nijamonae nebarünakujarubinej̈a Dioso Pejumeliwaisi?

Bajayatami, Jehová jitsipa daj̈ita israelitawi pijamonae yajawa penajuanakujarubinej̈a Pejumeliwaisi. Palebare Deuteronomio 11:18, 19, panelebikujinae panabarükuaikuaijamü tsane paliwaisi yabaraje:

• ¿J̈amü deitsimü tsipae bajarapaliwaisi nejumekowünütsinej̈a?

Najuanakujarubame nijamonae Dioso Pejumeliwaisi pakueniaje:

• Panajuanakujarubare paliwaisi payapütaejitsiamü penakaetuatsijawata.

• Panajuakanaüjüre paliwaisiyo Bibliabaj̈utota pakatsitaj̈anepana.

• Pejewaj̈i itsa j̈ainame, baj̈ukapitsapare Internet-jawata jw.org pabaj̈utonü pejewaj̈inej̈a.

• Itsa j̈ainame pewüjüawi, pejanawi ata, panajualebare Internet-jawata jw.org paliwaisianü bajarapamonaenej̈a.

• Itapere panej̈i yajawa Dioso pijajiwiyajuwünümi Bibliabaj̈utota, j̈uakujinae panajuakuenekataename.

• Panajuakanaüjüre kaevideojawa Internet-jawata jw.org.

PALIWAISI BAJA YAPÜTANETSI

Jehová jitsipa pej̈i pej̈ainaewi penakoj̈iasiwajawa, pekujarubijawa, pewetsijawanua. Jitsipanua pej̈i paj̈a, penabeje peyaiyataejawa, pejumekowünütsijawanua. Dioso Pejumeliwasi benajuanakujarubabiaba.

Najamatabünapire

• ¿Dej̈ua beitsi pej̈i pej̈ainaewi penakoj̈ikujarubinej̈a, penakoj̈iewetsinej̈anua?

• ¿Depakuenia pejewaj̈i najamatabükueneitajüta paj̈a, pena ata peyaiyataejawa?

• ¿Dej̈uajitsia bitso pepo j̈anepanae penajuanakujarubijawa kaesemana kanakujitsia Dioso Pejumeliwaisi?

YAPÜTAENAME ITSALIWAISI

¿Dej̈ua jamatabükueneyawenonaejitsipatsi nej̈i penajamatabükueneweretsinej̈a?

“6 papej̈anialiwaisibeje nej̈inej̈a” (¡Naükore!, número 2, 2019).

Pajiwiyo perujujiwi ewetawanapa beleba papej̈anialiwaisije.

“¿Dioso meta jitsipa wajaewetsijawa waj̈a, waena itsa perujujiwi baja?” (Ruka Internet-jawata jw.org)

Taema pakuenia itsanü apoyapütae penakoj̈iewetsinej̈a, itsiata j̈uakujinae yapütane baja.

Jehová nakakujarubabeje wajanakoj̈iewetsinej̈abeje (5:58)

Yapütaema j̈ua yawenonaejitsipa paj̈a barüyaya pej̈i pebarüponaponaenej̈a.

“¿Debeitsi paj̈a barüyaya pebarüponaponaenej̈a pej̈i?” (Peyajiwitaebo, 1 de noviembre, 2011)