J̈ua wajakuenesajinaejawata itsitsi Jehová betsitaj̈anepanatsi

Jehová Dioso “pejamatabükuenebarüyanü” (1 Timoteo 1:11, TNM). Bajaraponü jitsipa barüyaya wajajinawanapaenej̈a. Tsitaj̈anepanatsinua wajanakuenebikujinae wajanakueraewetsijawa. Yapütaenatsi pakuenia wajakuenesajinaejawata barüyajitsiatsi, yajawanua Jehová petsitaj̈anepanaenej̈atsi.

1. ¿Dej̈uajitsia meta bekanaüjütatsi wajakuenesajinaejawata j̈ua itsijitsiatsi?

¿Dej̈ua katsitaj̈anepana neitsijawa nekuenesajinaejawata? Itsamonae tsitaj̈anepanatsi pelebijawa pebaj̈utonü, penamuj̈unaewetsijawa waj̈ijawanü, taebiaba películajawanü, jonebiaba Internet-jawata itsakuenejawanü petaenej̈a. Itsamonae juya tsitaj̈anepanatsi penajuapitsapawanapaenej̈a pijaamigowi yajawa, penajuawanapaenej̈a, penajuanamuj̈usitsinej̈anua. Beitapetatsi j̈aniawaetsiakuenia j̈ua itsijitsiatsi wajajamatabükuenebarüyayaej̈anaenej̈a Jehová (Efesios 5:10). Bajarapaliwaisi bejumekowünütatsi. ¿Dej̈uajitsia? Tsipaji jiwi pekuenesajinaejawata itsi tsabiabi j̈ua Jehová apotsitaj̈anepanaetsi: penabekuene, penaperabükenetsiataekuene, daj̈ita Dowatji pijakuenenua (lebare Salmo 11:5). ¿Dej̈ua nakajamatabükueneyawenona j̈aniawaetsia wajaitapetsinej̈a wajakuenesajinaejawata j̈ua itsijitsiatsi?

Itsa yajawajinawanapatsi Jehová bitso piasiwawi, nakajamatabükueneyawenonaena j̈aniawaetsiakuenia wajaitapetsinej̈a j̈ua itsijitsiatsi wajakuenesajinaejawata. Pakuenia baja yapütanetsi Liwaisi 48-jawata, “pajiwi yajawaponapona penatsiwajünaekanaüjütsiwita nayajiwitaeyaponaponaena”. Itsiata baitsi jane, pajiwi yajawaponapona Jehová apopejumekowünütsiwi “tokopiapatsianatsi pibisiakuene” (Proverbios 13:20).

2. ¿Depaepatobeje bejutatsi wajakuenesajinaenej̈a?

Wajakuenesajinaejawata daj̈ita j̈ua itsitsi nakatsitaj̈anepanae ata, ayaiepato apobejutsitsi bajaraj̈uanej̈a. Tsipaji aponakakuenekaüjüpae tsipae itsakuenejawanü wajaitsinej̈anua. Dioso Pejumeliwaisibaj̈utota jumaitsi: Yapütaeyakuenia ponaponare daj̈itamatakabijawabelianej̈a (lebare Efesios 5:15, 16).

KANAÜJÜTSIANATSI

Yapütaema pakuenia itapetame j̈ua itsijitsiamü nekuenesajinaejawata.

3. Nakueneitawere j̈ua kajamatabükuenebijianaejitsipa

¿Dej̈uajitsia yapütaeya beitapetatsi j̈ua itsijitsiatsi wajakuenesajinaejawata? Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:

VIDEOJAWA: ¿Debeitsinü itsa nakueraewetajü? (4:39)

• ¿Dej̈ua najüpa penamuj̈usitsikuenejawa Romanakuapijiwi, pakuenia ajena pamatakabijawa namuj̈usita?

• Pakuenia videojawata tanetsi, ¿dej̈ua Danny yapütane pekuenesajinaejawata yabara?

Palebare Romanos 12:9, panelebikujinae panabarükuaikuaijamü tsane paliwaisi yabaraje:

• ¿Depakuenia bajarapaliwaisi nakajamatabükueneyawenona yapütaeya wajaitapetsinej̈a j̈ua itsijitsiatsi wajakuenesajinaejawata?

¿Dej̈uajawanü itoya Jehová? Palebare Proverbios 6:16, 17; Gálatas 5:19-21. Panelebikujinae panabarükuaikuaijamü tsane paliwaisi yabaraje:

• Pakuenia lebatsi, ¿dej̈uajawanü jiwi itsi tsabiabi pekuenesajinaejawata?

J̈aniawaetsiakuenia itapere j̈ua itsimüjitsia nekuenesajinaejawata

Nayanijobare:

• J̈ua itsimü nekuenesajinaejawata, ¿Jehová tsitaabejetsi bajaraj̈uanü?

• ¿Depakujinae? ¿Bajaraj̈ua yabara apokakuenekaüjüpaejitsipa neitsijawa j̈uajawanü bitso j̈anepana matatoj̈enetsia?

• ¿Depamonae kayajawa? ¿Yajawaponaponaejitsipame meta pamonae apojumekowünütsi Jehová?

Carromo nej̈ata pejopaeyaniwareka, benawekuatajayota namuto pemuj̈unene. Bajarapakuenia itsa j̈ua itsi tsabiabitsi wajakuenesajinaejawata nakajamatabükuenebijiana, nej̈ata benawekuatajayotatsi.

4. Itapere j̈uajawanü bitso j̈anepana itsakuenewekua

VIDEOJAWA: ¿Dej̈ua itsimü nekuenesajinaeepatota? (2:45)

• Wajamonaenü videojawata pibisiakuene apoej̈anae ata, ¿dej̈ua jamatabükuenebijianatsi?

Palebare Filipenses 1:10, panelebikujinae panabarükuaikuaijamü tsane paliwaisi yabaraje:

• Pakuenia lebatsi, ¿depaepatobeje itsi tsipaetsi j̈ua nakatsitaj̈anepana wajakuenesajinaejawata?

5. Pej̈aniakuene itapere j̈ua itsimüjitsia nekuenesajinaejawata

Jehová apotsitaj̈anepanaetsi daj̈itaj̈ua jiwi itsi pekuenesajinaejawata, itsiata itsakuenejawanü juya tsitaj̈anepanatsi wajajamatabükuenebarüyanej̈a. Palebare Eclesiastés 8:15; Filipenses 4:8, panelebikujinae panabarükuaikuaijamü tsane paliwaisi yabaraje:

• ¿Dej̈ua katsitaj̈anepana neitsinej̈a nekuenesajinaejawata?

PALIWAISI BAJA YAPÜTANETSI

Jehová jitsipa wajajamatabükuenebarüyajawa, bajaraj̈uata pej̈aniakuene beitapetatsi wajaitsijawa wajakuenesajinaejawata.

Najamatabünapire

• ¿Dej̈uajawanü cristianowitsi apoitsitsi wajakuenesajinaejawata?

• ¿Dej̈uajitsia bekanaüjütatsi paepatobeje itsijitsiatsi wajakuenesajinaejawata?

• ¿Nekuenesajinaejawata itapetsipame neitsijawa j̈ua Jehová tsitaj̈anepanatsi? ¿Dej̈uajitsia?

YAPÜTAENAME ITSALIWAISI

¿Depatsa nakatoitapetsipa j̈ua itsijitsiatsi wajakuenesajinaejawata?

“¿Petotsipaebaponaewi Jehová yakina daj̈itaj̈ua apobeitsitsi wajakuenesajinaejawata?” (Ruka Internet-jawata jw.org)

Lebare neyapütaenej̈a j̈anepanaeya neitapetsinej̈a j̈ua itsijitsiamü nekuenesajinaejawata.

“¿J̈anepana daj̈itaj̈ua itsi tsabiabitsi wajakuenesajinaejawata?” (Peyajiwitaebo, 15 de octubre, 2011)

Yapütaema j̈ua itsanü najamatabükuenewereta pekuenesajinaejawata yabara. “Aekonoj̈aeta daj̈itajiwi najüpaeya taniji”, pejailiwaisi.

“Dioso Pejumeliwaisibaj̈uto jamatabükuenej̈anetatsi” (Peyajiwitaebo, 1 de febrero, 2010)

Taema pakuenia itsawa kopata Dowatji pijakuenejawanü yabara.

Kopare daj̈ita Dowatji pijakuenejawanü yabara (2:02)