LIWAISI 52
¿Dej̈uajitsia meta j̈aniawaetsiakuenia benaj̈atabatsi?
Kaejiwitsi kanakujitsia naj̈atabatsi, naj̈aniawaetatsinua pakuenia jitsipatsi. Itsa jumekowünütatsi j̈ua Dioso Pejumeliwaisi jumaitsi wajanaj̈atabijawa yabara, Jehová jamatabükuenebarüyayaej̈anaenatsi. Yapütaenatsi bajarapaliwaisi.
1. ¿Depaliwaisi bekanaüjütatsi j̈aniawaetsia wajanaj̈aniawaetsinej̈a?
Cristianowi j̈aniawaetsiakuenia benaj̈ataba pej̈anepanaekuenia. Dioso pijajiwij̈aetsi, bejinawanapatsi aj̈uirajibikuenia itsamonae pitabarata (1 Timoteo 2:9, 10). Bajarapaliwaisije nakayapütaeyaej̈ana: 1) Wajanaj̈atabiesetonü bej̈anepana. Daj̈ita Jehová pijajiwi naj̈atababiaba pakuenia jitsipa. Itsiata baitsi jane, wajanaj̈atabikuenia, wajanaj̈aniawaetsikuenia jamatabükueneitajütatsi Jehová wajayaiyataejawa. 2) ”Itsa j̈anepanaeyakuenia naj̈atabatsi”, apobenaj̈atabitsi saya itsamonae wajanakataenej̈a, paese naj̈atabatsi apobenaperabüitaj̈ubitsi. 3) Apokuenejüpaetsinua pakuenia Dioso apopejumekowünütsiwi naj̈atababiaba. 4) Wajanaj̈anawaetsikuenia beyapütaeyaej̈anatsi itsamonae wajayaiyataejawa Dioso (1 Corintios 10:31).
2. ¿Dej̈ua najamatabüj̈ainaejitsipa itsacristianowi wajanaj̈aniawaetsikuenia?
Kaejiwitsi kanakujitsia naj̈atabatsi pakuenia jitsipatsi. Itsiata baitsi jane, nayajiwitaeya beitapetatsi wajajamatabükueneüjütsiyaniwa itsamonae. Bejumekowünütatsi paliwaisije: “Caejivitsi canacujitsia becanaëjëtatsi vajabananë [itsamonae] vajajamatabëcueneyavenonaenexa. Xua yabara vajabananë ajamatabëcuenesaëjitsia bajaraxua betoexanavanapatsi” (lebare Romanos 15:1, 2).
3. ¿Depakuenia wajanaj̈atabikuenia yawenonaena itsamonae Jehová peyapütaenej̈a?
Kaematakabi kanakujitsia j̈anepanaeya benaj̈atabatsi. Itsiata baitsi jane, wajanakaetuatsibojawata bitso najamatabükuenesaütatsi j̈aniawaetsiakuenia wajanaj̈atabinej̈a, yajawanua itsa tsipaebanajetarubenatsi Dioso Pejumeliwaisi itsamonaejawabelia. Apojitsipaetsi wajawekuanatsatsiej̈anaejawa itsamonae Jehová pijakuenejawanü wajanaj̈atabijawa yabara. Biji rajane, jamatabüyawenonatsi itsamonae peyapütaenej̈a pej̈aniajailiwaisi Dioso yabara (Tito 2:10).
KANAÜJÜTSIANATSI
Yapütaenatsi j̈ua nakajamatabükueneyawenona j̈aniawaetsiakuenia wajanaj̈atabinej̈a bepepo cristianowitsi.
Wajanaj̈atabikuenia najamatabükueneitajütatsi wajayaiyataejawa petuj̈anewi. Jehová yapütae ata j̈ua j̈ainatsi wajajamatabüütjütota, yajawanua beyaiyatanetsi wajanaj̈atabikuenia.
4. Jehová beyaiyatanetsi wajanaj̈aniawaetsikuenejawata
¿Dej̈uajitsia j̈aniawaetsiakuenia benaj̈aniawaetatsi? Palebare Apocalipsis 4:11, panelebikujinae panabarükuaikuaijamü tsane paliwaisibeje yabaraje:
¿Jehová pijajiwij̈aetsi depakuenia benaj̈atababiabatsi?
¿J̈aniawaetsiakuenia benaj̈atabatsi wajanaponaenej̈a penakaetuatsibojawata, yajawanua wajatsipaebinej̈a Dioso Pejumeliwaisi? ¿Dej̈uajitsia?
5. Pakuenia itapetsijitsiatsi wajanaj̈atabiesenej̈a, wajanaj̈aniawaetsikuenianua
Apoitsakuene pakuenia matamotame bajarapaeseto. Itsiata apobenaj̈atabitsi piaj̈uiraeseto, biji rajane bejumaponatsi pej̈anepanaeeseto wajanakanajunatsijawabelia. Palebare 1 Corintios 10:24, 1 Timoteo 2:9, 10. Panelebikujinae panabarükuaikuaijamü tsane paliwaisibeje yabaraje:
¿Dej̈uajitsia piabejeese apobenaj̈atabitsi?
¿Dej̈uajitsia apobenaj̈atabitsi wajanakakepabüesetonü, apobenaperabüitajübitsi?
Cristianowitsi apobejumekowünütsitsi j̈ua Moisés itorobatsi bajayata, itsiata nakayapütaeyaej̈ana pakuenia Jehová najamatabüj̈aina. Palebare Deuteronomio 22:5, panelebikujinae panabarükuaikuaijamü tsane paliwaisi yabaraje:
¿Dej̈uajitsia apoj̈anepanae itsa petiriwa naj̈ataba pebikuenia, pebi pijinia petiriwakuenia itsa naj̈ataba?
Palebare 1 Corintios 10:32, 33; 1 Juan 2:15, 16, panelebikujinae panabarükuaikuaijamü tsane paliwaisianü yabaraje:
Wajanaj̈aniawaetsikuenia itsa jamatabükuenefaefaenaeyaej̈anatsi itsamonaejawabelia, ¿debeitsitsi meta nej̈ata? ¿Dej̈uajitsia?
¿Itsajota ponaponame depakuenia jiwi naj̈aniawaeta, naj̈atabanua?
¿J̈anepana meta itsa naj̈atabatsi pakuenia itsamonae wajaponaponaejawata naj̈ataba? ¿Dej̈uajitsia?
Wajanaj̈atabikuenia, wajanaj̈aniawaetsikuenianua itsa j̈anepana, jamatabükuenebarüyayaej̈anatsi Jehová.
ITSAMONAE BAJUMAITSI: “J̈anü j̈ua jitsipajü naj̈atabajü”, jai.
¿Katsitaj̈anepana pakuenia jumaitsi itsamonae? ¿Dej̈uajitsia?
PALIWAISI BAJA YAPÜTANETSI
Itsa itapetatsi j̈aniawaetsiakuenia wajanaj̈atatsinej̈a wajanaj̈aniawaetsinej̈anua yaiyatanetsi Jehová, itsamonae ata.
Najamatabünapire
¿Dej̈uajitsia Jehová tsitaj̈anepanatsi pakuenia itapetsijitsiatsi wajanaj̈atabinej̈a, wajanaj̈aniawaetsinej̈anua?
¿Depaliwaisianü Bibliabaj̈utota nakayapütaeyaej̈ana j̈aniawaetsiakuenia wajanaj̈aniawaetsinej̈a?
¿Wajanaj̈atabikuenia meta jamatabükueneyawenonatsi itsamonae Dioso Pejumeliwaisi petsitaj̈anepanaenej̈atsi? ¿Depakuenia?
YAPÜTAENAME ITSALIWAISI
¿Dej̈ua kasiwanajamatabüj̈aina itsamonae nenaj̈atabikuenia yabara?
“¿Tanaj̈atabijawa dej̈ua yapütaeyaej̈ana?” (Ruka Internet-jawata jw.org)
J̈aniawaetsiakuenia bekanaüjütame nenaperabüyakinaewajünaeya pejumapejawanü.
“¿Abeje meta wajanaperabüyakinaenej̈a pejumapejawanü?” (Ruka Internet-jawata jw.org)
Yapütaema itsaliwaisianü pekajamatabükueneyawenonaenej̈a j̈anepanaeya nenaj̈atabikuenia.
“¿Wajanaj̈atabikuenia Dioso tsitaj̈anepanatsi?” (Peyajiwitaebo, septiembre de 2016)
Itsawa yapütane j̈ua jumaitsi Dioso Pejumeliwaisibaj̈utota penaitabütsikuene yabara.
“Aponetsitaj̈anepanae itsamonae penaitabütsikuene” (¡Naükore!, 22 de diciembre, 2003)