Pej̈aniakuene tonajamatabükueneitajüre Jehovájawabelia, Jesús ata

Nijaamigojiwiyo itsa karajutsipa pej̈aniakuenejawa, ¿deitsimü tsipae? Barüyamü meta tsipae, nej̈ata pej̈aniajamatabükuene rajutsipame nijaamigojiwiyojawabelia pej̈aniajawa yabara. Bajarapijinia Jehová, Jesúsbeje nakarajuta pepo pej̈aniakuenejawa: bajaraponübeje tsipaji nakakapanepa. Yapütaenatsi pakuenia pej̈aniajamatabükuene berajutatsi.

1. ¿Debeitsitsi wajanajamatabükueneitajütsinej̈a Jehová, Jesúsbejejawabelia j̈ua yabara nakasiwaitsi?

Dioso Pejumeliwaisibaj̈utota jumaitsi: “Pamonae sivanajamatabëcopata Dioso pexënatojavabelia” daj̈itamatakabijawabelia jinawanapaena (Juan 3:​16). ¿Depakuenia meta nej̈ata benajamatabükuenekopatatsi Jesúsjawabelia? Bajaraponü bejumekowünütatsi, beitsitsinua Jehová pejitsipaekuenia (Santiago 2:​17). Nej̈ata Jehová pejitsipaekuenia itsa toej̈anatsi bitso naimoj̈oyotatsi Jehová, Jesús yajawa (lebare Juan 14:21).

2. ¿Depakuenia betsitanajamatabükueneitajütatsi pej̈aniajamatabükuene Jehovájawabelia, Jesúsjawabelia ata?

Jesús petüpaewajünaeya pijajiwi yapütaeyaej̈ana pakuenia rajutsijitsia pej̈aniakuene petüpae yabara. “Jesús pijajivi barënabane” (Lucas 22:20). Nej̈ata yapütaeyaej̈ana bajarapakuenia penajamatabünapitsinej̈a Cristo petüpae yabara. Bajarapakuenia baja tsipaji itsi tsaponae pijaapóstolewi. Bajarawerenakujinae baja nej̈ata daj̈ita pepo cristianowi najamatabünapitabiaba Jesús petüpaejawa. Bajaraponü jumaitsi: “Mapacuenia paexanabiabianameje patanenajamatabënapitabiabinexamë” (Lucas 22:19). Itsa nanakaetuatame nenajamatabünapitsinej̈a Jesús petüpaejawa, pej̈aniajamatabükuene rajutsianame Jehová, Jesús yajawa wajanakaasiwaj̈ae.

KANAÜJÜTSIANATSI

3. ¿Debeitsitsi nej̈ata pej̈aniajamatabükuene wajarajutsinej̈a?

Kanaüjüre: itsa bubuname, itsajiwiyo kajutsipa netüpaeyaniwa. ¿J̈amü meta bajarapajiwiyo bepijia nakofünütsipame pekayawenonaekujinae?, itsa jume, ¿pej̈aniajamatabükuene meta rajutsipame?

Waj̈aitsi ata Jehová nakakapanepa. Palebare 1 Juan 4:​8-​10, TNM, panelebikujinae panabarükuaikuaijamü tsane paliwaisibeje yabaraje:

• ¿Dej̈uajitsia nej̈ata bitso pepo j̈anepana Jesús wajanakasiwatüpaej̈ae?

• ¿Dejamatabükueneitsimü nej̈ata itsa yapütaneme Jehová, Jesúsbeje j̈ua itsi j̈amünej̈a?

¿Debeitsitsi nej̈ata pej̈aniajamatabükuene wajarajutsinej̈a Jehová, Jesúsbeje wajanakakapanepaej̈ae? Palebare 2 Corintios 5:​15; 1 Juan 4:​11; 5:3. Kaeliwaisi kanakujitsia, panelebikujinae panabarükuaikuaijamü tsane paliwaisi yabaraje:

• ¿Debeitsitsi nej̈ata pej̈aniajamatabükuene wajarajutsinej̈a Jehovájawabelia?

4. Kuenejüpatsi Jesús

Pej̈aniajamatabükuene wajarajutsinej̈a Diosojawabelia nej̈ata bekuenejüpatsi Jesús. Palebare 1 Pedro 2:​21, TNM, panelebikujinae panabarükuaikuaijamü tsane paliwaisi yabaraje:

• ¿Deitsimü tsipae nekuenejüpaenej̈a Jesús?

5. Nakaetuanatsi wajanajamatabünapitsinej̈a Cristo petüpaejawa

Palebare Lucas 22:​14, 19, 20 paneyapütaenej̈a pakujinae Jesús barünabane pijajiwi. Panelebikujinae, panabarükuaikuaijamü tsane paliwaisibeje yabaraje:

• ¿Deitsi nej̈ata Jesús pebarünabanijawata pijajiwi?

• ¿Dej̈ua nakanajamatabünapitsiaej̈ana pan, vinora yajawa? (Pataema tsikiriitanetoyo 19, 20).

Jesús jitsipa pijajiwi penajamatabünapitsijawatsi petüpaematakabi, kaewai kanakujitsia. Bajaraj̈uata paj̈anü, Jehová patatotsipaebaponaewi, panakaetuanabiabajü kaewai kanakujitsia patanajamatabünapitsinej̈a Jesús petüpaekuene yabara. Paitsinü bajaraponü pitorobikuenia. Paneyapütaenej̈a penakaetuatsijawa, pataema VIDEOJAWA. Panetaekujinae panabarükuaikuaijamü tsane paliwaisi yabaraje:

VIDEOJAWA: Najamatabünapitatsi Jesús petüpaematakabi (1:​41)

• ¿Depaitsinü nej̈ata tsabiabi patanakaetuatsijawata patanajamatabünapitsinej̈a Jesús wajanakasiwatüpaejawa?

Jesús Dioso Pejumeliwaisi baasiwa tsabiabi, batsipaebabiaba pej̈anialiwaisi, jiwinua yawenonabiaba.

PALIWAISI BAJA YAPÜTANETSI

Pej̈aniajamatabükuene berajutatsi Jesús wajanakasiwatüpae yabara. Jesús nej̈ata wajajumej̈aniataenej̈a, wajanajamatabünapitsinej̈a petüpaejawa.

Najamatabünapire

• ¿Depakuenia meta nej̈ata benajamatabükuenekopatatsi Jesúsjawabelia?

• ¿Deitsimü tsipae j̈amü pej̈aniajamatabükuene nerajustinej̈a Jehovájawabelia, Jesús ata?

• ¿Dej̈uajitsia nej̈ata bitso j̈anepana wajanajamatabünapitsijawa Jesús wajanakasiwatüpaejawa?

YAPÜTAENAME ITSALIWAISI

Namuj̈unaewere pakuenia itsijitsiatsi Jesús wajanakasiwatüpaej̈ae.

¿Dej̈ua nakayapütaeyaej̈ana Jesús pianekonijibia perabüto? (9:​28)

Pakuenia jumej̈aniataejitsiamü.

“Jumej̈aniataema j̈ua Jehová najumekapanepaeya jumaitsi” (Peyajiwitaebo, octubre de 2016)

Pakujinae bajarapowa jumeyapütane Jesús pesiwatüpaejawatsi najamatabükuenepünüyorota. Lebare peliwaisi “Jamatejema ponaponajü” pejailiwaisi.

“Dioso Pejumeliwaisi jamatabükuenej̈anetatsi” (Peyajiwitaebo, 1 de agosto, 2011)

Yapütaema pakuenia kaejiwij̈i j̈ane pan, apanua vinora ata penakaetuanaejawata penajamatabünapitsinej̈a Jesús petüpaejawa.

“¿Dej̈uajitsia Jehová petotsipaebaponaewi itsi, itsaiglesiapijiwi apokuenejüpae itsa najamatabünapita Jesús pakujinae nakasiwatüpa?” (Ruka Internet-jawata jw.org)