Jesús wajanakasiwatüpaej̈ae, ¿depakuenia nakakapanepa?

Kopiaya jiwibeje Adán, Evabeje apojumekowünütsibeje Dioso. Bajaraj̈uata waj̈aitsi nekoni j̈ainatsi, nabejiobiatanetsinua, batüpatsinua.a Itsiata baitsi jane, Jehová Pej̈ünato, Jesucristo, itorobika wajanakakapanepaenej̈a wajanekonijawawekua, petüpaejawawekua ata. Pakuenia itsa kapanepaejitsiatsi itsajiwiyo, besiwamatamotatsi wajakapanepaenej̈a, bajarapijinia pakuenia Bibliabaj̈uto nakayapütaeyaej̈ana, Jesús pianekonijibij̈ae nakanekonimatamota pakujinae nakasiwatüpa, nej̈ata nakakapanepa (Mateo 20:28). Jesús pikani kuenekaüjüpatsi peponaponaenej̈a mapairataje daj̈itamatakabijawabelianej̈a, itsiata pijakueneta jejai petüpaenej̈a irata. Nej̈ata Jesús wajanakasiwatüpaej̈ae, matakabi apopewerewerekaejawa j̈ainaenatsi. Bajarapaliwaisi nakayapütaeyaej̈ana pakuenia Jehová, Jesúsbeje bitso nakaasiwabeje. Neyapütaekujinae paliwaisije, Jesús pej̈aniajamatabükuene rajutsianame pekasiwatüpaej̈ae.

1. ¿Depakuenia nakajamatabükueneyawenona Jesús wajanakasiwatüpaej̈ae?

Wajanekoni wajaj̈ainaej̈ae itsi tsabiabitsi Jehová apopejitsipaekuenia. Itsiata baitsi jane, Dioso pijaamigowi tsipaetsi, itsa pepakuene najamatabükuenepünüyorotatsi wajapibisiakuenewekua, itsa nawajütatsi Jehovájawabelia wajanakanekoniikinaenej̈a Jesús pewünüta. Benajamatabükuenesaütatsinua wajaitsiyaniwa ikatsia pibisiakuene (1 Juan 2:1). Bibliabaj̈utota jumaitsi: “Caeto rabaja Cristo tëpa. Pematatsënëa baja apo nacasivatëpae tsane. Bajaraponë pepo pexaniacuene pexanaenë. Itsiata bejiobiaexanatsi vaxaitsi yabara, pibisiacuene vajaexanaevi, vajanacacapanepaenexa Diosojavabelia” (1 Pedro 3:18).

2. ¿Depakuenia Jesús petüpaejawa nakayawenonaena wajawajünaeyaebelia?

Jehová itorobika Pej̈ünato wajanakasiwatüpaenej̈a. Nej̈ata “pamonae sivanajamatabëcopata Dioso pexënatojavabelia, apo naxuabi tsane. Bajarapamonae matacabi apo pevereverecaejava, Dioso rajutsianatsi” (Juan 3:16). Jesús wajanakasiwatüpaej̈ae, kaeepatoyokujinae saya Jehová ajibiaej̈anaena daj̈ita pibisiakuenejawanü, j̈uanü Adán pejamatabükueneta nakatokopiapata. Nej̈ata, itsa jumej̈aniatanetsi Jesús wajanakasiwatüpaejawa, jinawanapaenatsi daj̈itamatakabijawabelianej̈a pairataje pakujinae pej̈anianakua tsane (Isaías 65:​21-23).

KANAÜJÜTSIANATSI

3. Jesús petüpaejawa nakakapanepa wajanekonijawawekua wajatüpaejawawekua ata

VIDEOJAWA: ¿Dej̈uajitsia Jesús tüpa? (Kopiayaliwaisi) (2:​01)

• ¿Depapej̈aniakuene jumej̈uaba Adán apopejumekowünütsij̈ae Dioso?

Palebare Romanos 5:​12, panelebikujinae panabarükuaikuaijamü tsane paliwaisi yabaraje:

• ¿Dej̈uajawanü katokopiapata Adán pibisiakuene pej̈anaej̈ae?

Palebare Juan 3:​16, panelebikujinae panabarükuaikuaijamü tsane paliwaisi yabaraje:

• ¿Dej̈uanej̈a Jehová itorobika Pej̈ünato irabetsika?

1. Adán pianekonijibinümi, itsiata pakujinae apojumekowünütsi Dioso, nej̈ata pejamatabükueneta jiwi nanekonita, bajaraj̈uata jiwi batüpa.

2. Jesús pianekonijibinü, nej̈ata Dioso pejumekowünütsij̈ae, jiwimonae yawenona pianekonijibinej̈a, pejinawanapaenej̈anua daj̈itamatakabijawabelianej̈a.

4. Jesús petüpaej̈ae daj̈itajiwi jamatabükueneyawenona

VIDEOJAWA: ¿Dej̈uajitsia Jesús tüpa? (Pekotokaewiliwaisi) (2:​00)

• ¿Depakuenia kaejiwitonü petüpaejawa, jamatabükueneyawenonaejitsipa daj̈itajiwimonae?

Palebare 1 Timoteo 2:​5, 6, panelebikujinae panabarükuaikuaijamü tsane paliwaisi yabaraje:

• Adán pianekonijibinümi, itsiata pakujinae pibisiakuene itsi, pejamatabükueneta jiwi nanekonita, bajaraj̈uata jiwi batüpa. Jesús ata pianekonijibinü, ¿deitsi Jesús penekonimatamotsinej̈a jiwi?

5. Jehová itorobika Jesús pekasiwatüpaenej̈a

Jehová pijaamigowi yapütane pakuenia Jesús siwatüpa kaejiwi kanakujitsia. Paneyapütaenej̈a, palebare Gálatas 2:​20, TNM, panelebikujinae panabarükuaikuaijamü tsane paliwaisi yabaraje:

• ¿Depakuenia Pablo j̈aniawaetsia yapütane Jesús bajaraponü pesiwatüpaej̈ae?

Adán penanekonitsij̈ae, daj̈ita pemomoj̈inej̈a torukatsi petüpaejawa. Itsiata Jehová itorobika Pej̈ünato irabetsika pesiwatüpaenej̈a, bajarapakuenia nej̈ata ponaponaejitsipame daj̈itamatakabijawabelianej̈a.

Palebare Juan 19:​1-7, 16-18, TNM. Itsa lebame bajarapaliwaisije, kanaüjüre pakuenia Jehová jamatabükueneitsi pakujinae Pej̈ünato tobejiobiaej̈anatsi. Panelebikujinae panabarükuaikuaijamü tsane paliwaisi yabaraje:

• ¿Dejamatabükueneitsimü itsa yapütaneme j̈ua Jehová, Jesúsbeje itsi j̈amünej̈a?

PALIWAISI BAJA YAPÜTANETSI

Jesús wajanakasiwatüpaej̈ae Jehová nakabarajamatabükuenej̈anepana, nakarajutsiananua wajajinawanapaenej̈a daj̈itamatakabijawabelianej̈a.

Najamatabünapire

• ¿Dej̈uajitsia Jesús tüpa?

• ¿Dej̈uajitsia Jesús petüpaej̈ae kuenekaüjüpatsi penekonimatamotsinej̈a jiwi?

• ¿Depakuenia kajamatabükueneyawenona Jesús petüpaejawa?

YAPÜTAENAME ITSALIWAISI

Yapütaema pakuenia nakakapanepa Jesús petüpaejawa.

“¿Depakuenia Jesús petüpaejawa jamatabükueneyawenonatsi jiwi ayaibitsaüto?” (Ruka Internet-jawata jw.org)

Yapütaema j̈ua beitsitsi wajanakakapanepaenej̈a.

“¿Depakuenia Jesús nakakapanepa?” (Ruka Internet-jawata jw.org)

¿Jehová meta pepo penanekonitsiwi ata nanekoniikinaejitsipa?

“Yanijoba Dioso Pejumeliwaisi yabara” (Peyajiwitaebo, 1 de mayo, 2013)

Peyapütaej̈ae Jesús pesiwatüpaejawa jiwi, kaejiwitonü yawenonatsi piajamatabüsaütsinej̈a apopenajamatabünapitsinej̈a pibisiakuenejawanü. Lebare paliwaisije.

“Apo akuenebejenü rabaja“ (Ruka Internet-jawata jw.org)