LIWAISI 09
Itsa nawajütame, naimoj̈oyotame Diosojawabelia
¿Itsajawata meta namatawenonaejitsipame itsajiwi pekakujarubinej̈a? ¿Jamatabüyapütaneme pej̈aniajailiwaisi? ¿Itsajawata meta jamatabükuenefaefaenaejitsipame? ¿Jitsipaejitsipame nenaimoj̈oyotsijawa Jehovájawabelia? Itsa nawajütame, kajamatabükueneyawenonaena daj̈ita bajaraj̈ua. Itsiata, ¿depakuenia benawajütame? ¿Dioso meta namuj̈unaeweta daj̈itajiwi penawaj̈ukaejawa? ¿Depakuenia yapütaejitsipame Dioso pekanamuj̈unaewetsijawa pakujinae nawajütame? Yapütaenatsi.
1. ¿Deponüjawabelia benawajütatsi? ¿Dej̈ua yabara benawajütatsi?
Jesús yapütaeyaej̈ana pakuenia benawajütatsi Waj̈a Diosojawabelia. Jesús nawajütabiaba Jehovájawabelia. Itsamatakabimi bajaraponü jumaitsi: “Itsa pavajëcame Diosojavabelia, pavajëre mapacueniaje: Taxamë, athëbëtatsia neecaenë…” (Mateo 6:9). Itsa nawajütatsi Jehovájawabelia, bajarapakuenia nej̈ata bajaraponü bitso nakanaimoj̈oyotsiana.
Itsa nawajütatsi Diosojawabelia, betsipaebatsi daj̈ita j̈ua namatawenonatsi. Itsiata, itsa nawajütatsi Dioso apopejitsipaekuenia, bajaraponü aponakanamuj̈unaewetsi tsane. Bibliajawata jumaitsi: “Yapëtanetsi Dioso vajanacajumetaejava itsa vajëtatsi vajanacatojitsipaecuenia” (1 Juan 5:14). Jesús yapütaeyaej̈ananua j̈uakuenejawalia benawajütatsi (lebare Mateo 6:9-13). Pej̈aniajamatabükuene berajutabiabatsi Diosojawabelia daj̈ita pej̈aniakuene wajanakarajutsij̈ae. Betowajütabiabatsinua peyawenonaenej̈a itsamonae.
2. ¿Depakuenia benawajütatsi?
Bibliajawata nakayapütaeyaej̈ana: “Daj̈itaj̈ua panajamatabüj̈ainame, patsipaebare Diosojawabelia” (Salmo 62:8). Nej̈ata daj̈ita j̈ua pitsapa wajajamatabüütjütojawawerena benawajütatsi, ayaijumeta, ajumejibianua. Benawajütatsi nukaeya, ekaeya, bokaeya, itsiata wajayaiyataeyakuenia. Benawajütatsi itaj̈utejemajawata, itaj̈utejema epatota.
3. Itsa nawajütatsi, ¿Dioso depakuenia nakajumekanawiata?
Dioso Pejumeliwaisibaj̈utota yapütaeyaej̈ana pej̈anialiwaisi, kuenekaüjüpatsi “peyapëtaeya-exanaenexa […] liwaisi bitso apopeyapëtaejiwiyomi-ata” (Salmo 19:7; lebare Santiago 1:5). Liwaisi itsa j̈ainatsi, Jehová nakajamatejemayaej̈anaena. Dioso kuenekaüjüpaeyaej̈ana pijajiwi wajanakayawenonaenej̈a itsa namatawenonatsi.
KANAÜJÜTSIANATSI
Taenatsi pakuenia j̈aniawaetsiakuenia benawajütatsi wajabarüyaej̈anaenej̈a Waj̈a Dioso. Yapütaenatsinua pakuenia wajanawajütsijawa nakajamatabükueneyawenonaena.
4. J̈ua beitsitsi Dioso wajanakanamuj̈unaewetsinej̈a
¿Debeitsitsi nej̈ata Dioso wajanakanamuj̈unaewetsinej̈a itsa nawajütatsi? Pataema VIDEOJAWA.
Jehová jitsipa wajanawajütsijawa übajaraponüjawabelia. Palebare Salmo 65:2, panelebikujinae panabarükuaikuaijamü tsane paliwaisi yabaraje:
¿Dioso meta jitsipaejitsipa nenawajütsijawa bajaraponüjawabelia? ¿Dej̈uajitsia bajarajumaitsimü?
Itsa jitsipatsi Dioso wajanakanamuj̈unaewetsijawa, benajamatabükuenesaütatsi Pejumeliwaisi wajajumekowünütsinej̈a. Palebare Miqueas 3:4; 1 Pedro 3:12, panelebikujinae panabarükuaikuaijamü tsane paliwaisi yabaraje:
¿Depakuenia nej̈ata beyapütanetsi Dioso wajanakanamuj̈unaewetsijawa?
Pakuenia anijabitsaütobeje wajabitsaüwi saikayakuenia nawajütsipa Diosojawabelia pekueneamoneyabinej̈a, ¿pepakuene meta nej̈ata Dioso namuj̈unaewetsipa penawajütsikuenia?
5. Benawajütatsi Diosojawabelia wajajamatabüütjütojawawetsina
Itsamonae saya kujarubabiabatsi ükaeliwasi napüna penawajükabiabinej̈a. ¿Bajarapakuenia meta nej̈ata Dioso tsitaj̈anepanatsi? Palebare Mateo 6:7, TNM, panelebikujinae panabarükuaikuaijamü tsane paliwaisi yabaraje:
¿Debeitsitsi nej̈ata ikatsia bajarapakuenia wajanawajükaeyaniwa?
Kaesemanata, kaematakabi kanakujitsia, pej̈aniakuene yabara benajamatabüj̈ainame. Bajaraj̈uakujinae pej̈aniajamatabükuene berajutame Jehovájawabelia bajaraj̈ua yabara. Bajarapakuenia, siete j̈uabeje yabara nawajütsianame.
Pej̈ünato, paj̈ajawabelia yapütaeyaej̈ana pejamatabüütjütojawawetsina. Bajarapijinia pakuenia Jehová jitsipa wajanawajütsijawa.
6. Wajanawajütsikuene kajena pej̈aniakuene
Itsa pibisiakuene nakatokopiapata, ¿depakuenia nej̈ata wajanawajütsijawa benakajamatabükueneyawenona? Pataema VIDEOJAWA.
Dioso Pejumeliwaisi nakayapütaeyaej̈ana pakuenia jamatejemajitsiatsi itsa nawajütatsi. Palebare Filipenses 4:6, 7, panelebikujinae panabarükuaikuaijamü tsane paliwaisibeje yabaraje:
Wajanawajütsijawa daj̈itakuene apoj̈anetsi ata, ¿depakuenia nej̈ata nakajamatabükueneyawenona?
¿Dej̈ua yabara nawajütsipame?
¿Yapütaneme baja?
Amén pejaijume yapütaeyaej̈ana “bajara itsi tsane”. Dioso Pejumeliwaisi baja kajena yapütaeyaej̈ana bajayatami jiwi penawajütsikujinae “amén” bajai (1 Crónicas 16:36).
7. Matakabi jure nenawajütsinej̈a
Itsajawata bitso nakakueneena, bajaraj̈uata nakofünütatsi wajanawajütsinej̈a. Jesús kajena bitso tsitaj̈anepanatsi penawajütsijawa. Palebare Mateo 14:23; Marcos 1:35, panelebikujinae panabarükuaikuaijamü tsane paliwaisibeje yabaraje:
¿Jesús depakuenia matakabi bajutabiaba penawajütsinej̈a?
¿Depakuenia matakabi jutsipame nenawajütsinej̈a?
ITSAMONAE BAJUMAITSI: “Dioso pekanamuj̈unaewetsinej̈a benawajütame üwowaijumeta”, jai.
¿Dejumaitsimü tsipae?
PALIWAISI BAJA YAPÜTANETSI
Wajajamatabüütjütojawawetsina itsa nawaj̈utatsi, naimoj̈oyotatsi Diosojawabelia, nakajamatabükuenej̈anepanaeyaej̈ananua. Nakanasaürajuta wajasaü apoj̈ainae atatsi wajajumekowünütsinej̈a Dioso.
Najamatabünapire
¿Deponüjawabelia benawajütatsi?
¿Depakuenia benawajütatsi Diosojawabelia?
¿Itsa nawajütatsi Diosojawabelia, depakuenia nakajamatabükueneyawenona?
YAPÜTAENAME ITSALIWAISI
Yapütaename j̈ua itsamonae jamatabüyapütane penawajütsikuene yabara.
“Siete paliwaisibeje penawajütsikuene yabara” (Peyajiwitaebo, 1 de octubre, 2010)
Lebianame j̈ua yabara bitso j̈anepana nenawajütsinej̈a.
“¿Dej̈uajitsia nej̈ata bitso j̈anepana wajanawajütsijawa?” (Ruka Internet-jawata jw.org)
Bibliabaj̈uto yapütaeyaej̈ana ponüjawabelia nawajütsijitsiatsi.
Taema papenaj̈üanaevideojawataje pakuenia tsikiriwayo nawajütabiaba.