¿Dej̈ua nakayapütaeyaej̈ana Bibliabaj̈uto ángelewi yabara?

Jehová jitsipa wajayapütaejawa ángelewi pejinawanapaejawa atjübütatsia. Bajarapamonae nayapütane ‘Dioso pej̈ikueneʼ (Job 38:7). ¿Dej̈ua Dioso Pejumeliwaisibaj̈uto nakayapütaeyaej̈ana ángelewi yabara? ¿Bajarapamonae meta yawenonaejitsipa jiwi? ¿Daj̈ita ángelewi meta nej̈ata Dioso pej̈i? ¿Daj̈ita ángelewi meta nej̈ata Dioso jumekowünüta?

1. ¿Depamonae meta ángelewi?

Jehová ira pej̈anaewajünaeya, ej̈ana ángelewi. Bajarapamonae apotaetsi. Pinijiángelewibitsaüto atjübütatsia jinawanapa (Hebreos 1:​14). Daj̈ita ángelewi aponajüpae (Apocalipsis 5:​11). Bajarapamonae Dioso pitorobikueniatsi ej̈anabiaba (Salmo 103:20). Bajayata, Jehová ángelmonae itorobabiabika liwaisi petokaponaenej̈a pijajiwi. Itsajawata itorobabiabika pijaángelewi peyawenonaenej̈a, pekapanepaenej̈a Dioso pijajiwi. Ajena pamatakabianüjawa ángelewi yawenona cristianowi penamataüj̈ünaenej̈a pamonae jitsipa Dioso Pejumeliwaisi peyapütaenej̈a.

2. ¿Depamonae meta Dowatji, pijajiwi yajawa?

Itsaángelewi Jehová apojumekowünütsi. Kopiaya ángelenü Jehová apopejumekowünütsi “bajaraponë pevënë Dovathi. Itsavënë Satanás […] jivi yamaxëitojorobabiaba daxitanacuanëjava” (Apocalipsis 12:9). Dowatji bitso jitsipa itsamonae pejumekowünütsijawatsi. Jitsipa jiwi pejamatabüjüpaejawatsi, bajaraj̈uata Adán, Evabeje jumekowünütabeje. Bajaraj̈uakujinae itsaángelewi jumekowünütatsi. Bajarapaángelewi piakuenebejewi pewünü dowatjiwi, itsawünü ainawi. Jehová j̈uabika Dowatji pijajiwi yajawa irabetsika. Daj̈ita bajarapamonae werebiabianatsi (lebare Apocalipsis 12:​9, 12, TNM).

3. ¿Depakuenia nakayamaj̈üitojoroba Dowatji, pijajiwi yajawa?

Pakujinae jiwi itsawajüka ainawi peyawenonaenej̈atsi, itsa najorobiaej̈ana pejumeyaej̈anaenej̈atsi itsa awitane, nej̈ata daj̈ita bajaraj̈ua Dowatji pijakuene, baitsi, espiritismokuene. Nej̈ata bajarapakuenia Dowatji yamaj̈üitojorobapona jiwi. Itsamonae Dowatji yamaj̈üitojorobatsi petüpaejiwiyo bepebarükuaikuaijaikuenetsi. Bajaraj̈uata Jehová Dioso nakanayajiwiyapütaeyaej̈ana pakueniaje: “Pütsa payanijobame penajorobiwi peyatikarunaenej̈a, pütsa pajunatame pematawajibiwi yajawa panejamatabükuenebijianaeyaniwa” (Levítico 19:31). Dowatji, pijajiwi yajawa Jehová raja pekueyawi. Jehová nakaeweta Dowatji wajanakaitsakueniabiyaniwa.

KANAÜJÜTSIANATSI

4. Ángelewi jiwi yawenona peyapütaenej̈a Jehovákuene

Ángelewi apotsipaebi Dioso Pejumeliwaisi jiwijawabelia. Bajarapamonae Jehová petotsipaebaponaewi yawenona penamataüj̈ünaenej̈a pamonae jitsipa Dioso Pejumeliwaisi peyapütaenej̈a. Palebare Apocalipsis 14:​6, 7, panelebikujinae panabarükuaikuaijamü tsane paliwaisibeje yabaraje:

• ¿Dej̈uajitsia namatawenonatsi ángelewi wajanakayawenonaenej̈a Dioso Pejumeliwaisi wajatsipaebinej̈a?

• ¿Ángelewi kayawenonaejitsipa nenamataüj̈ünaenej̈a pejitsipaewi Dioso Pejumeliwaisi? ¿Dekatsita itsi bajarapaliwaisi?

5. Daj̈ita Dowatji pijakuene wekuanatsare

Dowatji raja, pijajiwi yajawa Jehová pekueyawi. Waj̈aitsi ata rabaja wajakueyawi. Palebare Lucas 9:​38-​42, panelebikujinae panabarükuaikuaijamü tsane paliwaisi yabaraje:

• ¿Dowatji depakuenia jamatabükuenebejiobiaej̈ana jiwimonae?

Dowatji, pijajiwi yajawa kaeto ata apobejunatsitsi, apobejaitsitsi wajanakayawenonaenej̈a. Palebare Deuteronomio 18:10-​12, panelebikujinae panabarükuaikuaijamü tsane paliwaisibeje yabaraje:

• ¿Depakuenia Dowatji nakanaimoj̈oyotsipa? ¿Depitsi penajorobikuene taneme itsamonae jota j̈amü ponaponame?

• ¿Dej̈uajitsia nejata Dioso aponakatojitsipae daj̈ita Dowatji pijakuene penajorobikuene yabara? ¿Dekatsita itsa bajarapaliwaisi?

Pataema VIDEOJAWA, panetaekujinae panabarükuaikuaijamü tsane paliwaisi yabaraje:

VIDEOJAWA: Panawekuaitawere Dowatji (5:​02)

• ¿Palesawünüwa j̈ua maj̈üküta pej̈ünatowayo, bajaraj̈ua meta nej̈ata abeje? ¿Dej̈uajitsia?

• ¿Deitsi nej̈ata Palesa Dowatji, pijajiwi yajawa pewekuanaewetsinej̈a?

Pepo cristianowi kajena Dowatji, pijajiwi yajawa wekuanatsatawanapa. Palebare Hechos 19:19; 1 Corintios 10:​21, TNM, panelebikujinae panabarükuaikuaijamü tsane paliwaisi yabaraje:

• ¿Dej̈uajitsia Dowatji pijakuene benawekuaajibiaej̈aname nekobekowükuenejawata?

6. Jamatabükueneamoneyabianame Dowatji, pijajiwi yajawa

Dowatji, pijajiwi matakaitorobapona. Itsiata pej̈aniajamatabükueneángelewi matakaitoroba Miguel. Pejaiwünü Miguel raja itsawünü Jesús. ¿Miguel meta nej̈ata pepo pekuenekaüjüpaenütsi? Palebare Apocalipsis 12:​7-9, panelebikujinae panabarükuaikuaijamü tsane paliwaisi yabaraje:

• ¿Depamonae meta nej̈ata pepo pekuenekaüjüpaewitsi?, ¿Miguel pijaángelewi yajawa, itsa jume, Dowatji pijajiwi yajawa?

• ¿Pepo cristianowi meta nej̈ata bekujunawa Dowatji, pijajiwi yajawa? ¿Dej̈uajitsia meta?

Nej̈ata Dowatji bejamatabükueneamoneyabame, pijajiwi yajawa. Palebare Santiago 4:​7, panelebikujinae panabarükuaikuaijamü tsane paliwaisi yabaraje:

• ¿Depakuenia Dowatji pijajiwi yajawa bewekuanaewetame?

PALIWAISI BAJA YAPÜTANETSI

Pej̈aniajamatabükueneángelewi nakayawenona. Dowatji, pijajiwi yajawa Jehová pekueyawi, bajarapamonae penajorobikueneta jiwi yamaj̈üitojorobapona.

Najamatabünapire

• ¿Depakuenia pej̈aniajamatabükueneángelewi jiwi yawenona Jehovákuene peyapütaenej̈a?

• ¿Depamonae nej̈ata Dowatji, pijajiwi yajawa?

• ¿Dej̈uajitsia Dowatji pijakuene apobejaitsimü pekayawenonaenej̈a?

YAPÜTAENAME ITSALIWAISI

Yapütaename dej̈uajitsia Jesús raja arcángel Miguel.

“¿Deponü nej̈ata arcángel Miguel?” (Ruka Internet-jawata jw.org)

Kanaüjüre j̈ua yabara Dowatji pepo piakuenebejenü.

“¿Dowatji meta ponapona?” (Ruka Internet-jawata jw.org)

Lebare pakuenia bajarapowa nawekuaajibiaej̈ana Dowatji pijakuene.

“Yapütaniji j̈uanej̈a ponaponajü” (Peyajiwitaebo, 1 de julio, 1993)

Yapütaename pakuenia Dowatji yamaj̈üitojoroba penajorobikueneta.

“Yapütaema pej̈aniajaikuene magia yabara, penajorobikuene, ainawikuene yabaranua” (Pepo pej̈aniajailiwaisi neponaponaenej̈a daj̈itamatakabijawabelia, liwaisi 5)