LIWAISI 30
¡Yajuwünütüpae atamü ikatsia biasaü!
Itsa yajuwünütüpatsi nakatsiatane, wünajamatabüj̈ainatsinua. Bajaraj̈uata Bibliajawata jumaitsi petüpaekuene raja bewajakueyanükuenia (1 Corintios 15:26). Liwaisi 27-jawata baja yapütaneme Jehová piajibiaej̈anaenej̈a petüpaekuene. ¿Deitsi baja nej̈ata tsane pamonae baja tüpa? Paliwaisijawataje yapütaename pej̈anialiwaisi j̈ua najumekapanepaeya Jehová jumaitsi: bajaraponü ikatsia asaüyaej̈anaena jiwi ayaibitsaüto daj̈itamatakabijawabelianej̈a barüyaya pejinawanapaenej̈a. ¡Kajena namatakobiana! ¿Bajaraj̈ua meta nej̈ata j̈aniajai? ¿Dejota meta nej̈ata namatakobiana, atjübütatsia, itsajume, meta irata?
1. ¿Jehová dej̈ua tojitsipatsi petüpaewinej̈a?
Jehová bitso tojitsipa piasaüyaej̈anaejawa petüpaewi. Job, bajayata bitso Jehová pejumej̈aniataenümi. Bajaraponü baja kajena bitso bayapütane, tüpae ata, Dioso apopenakofünütsinej̈atsi. Bajaraj̈uata, Diosojawabelia Job jumaitsi: “J̈amü nejunatsianame, nej̈ata j̈anü kajumepitsianatsi” (lebare Job 14:13-15).
2. ¿Depakuenia nej̈ata yapütanetsi petüpaewi penamatakobinej̈a?
Pakujinae Jesús ponapona pairataje, Dioso nasaü rajuta Jesúsjawabelia jiwi piasaüyaej̈anaenej̈a. Bajaraj̈uata Jesús asaüyaej̈ana 12 pawaibeje pej̈ainaewayo, pamona pewekuatüpaewatsi pej̈ünatonua (Marcos 5:41, 42; Lucas 7:12-15). Bajaraj̈uakujinae Lázaro tüpa, Jesús bajaraponü baasiwa tsabiabi. Lázaro, 4 pamatakabibeje tüpanukae ata, Jesús asaüyaej̈ana. Kopiaya, Jesús nawajüta Diosojawabelia, bajaraj̈uakujinae Lázaro pemütjüjawata wawajai: “¡Lázaro, bajara jane mëthëvecua pitsaparemena!”, jai Jesús. “Nexata baja Lázaro petëpaenëmi pitsaparena mëthëvecua”. ¡Lázaro baja nej̈ata ikatsia asaü! (Juan 11:43, 44). Pijamonae baja nej̈ata bitso jamatabükuenebarüya.
3. ¿Nijamonae meta nej̈ata tüpae ata ikatsia asaü tsane?
Bibliabaj̈utota jumaitsi: “Dioso icatsia asaëyaexanaena petëpaevimi” (Hechos 24:15). Jesús pamonae petüpaewimi asaüyaej̈ana apoponae atjübüabetsia (Juan 3:13). Daj̈ita barüyaya pejinawanapaenej̈a pairataje. Pakuenia baja itsi bajayata, nej̈ata bajarapakuenia Jesús itsi tsane bepijia. Asaüyaej̈anaena petüpaewimi barüyaya pejinawanapaenej̈a daj̈itamatakabijawabelia pairataje. Jesús jumaitsi: “Bajarapamonae pemëthëanëmi vecuapitsapaena” (Juan 5:28, 29a). Nej̈ata Dioso asaüyaej̈anaena pamonae najamatabünapitatsi, itsajiwiyo ata pamonaemi aponajamatabünapitsi.
KANAÜJÜTSIANATSI
Pakuenia jumaitsi Bibliabaj̈utota, Dioso najumekapanepaeya jumaitsi piasaüyaej̈anaenej̈a petüpaewimi. Yapütaenatsi pakujinae bajarapakuenia itsi tsane. Itsa yapütanetsi petüpaewimi ata piasaünej̈a, nej̈ata bitso nakajamatabükuenebabata.
4. Jesús asaüyaej̈ana petüpaewimi
Yapütaema j̈aniawaetsiakuenia pakuenia Jesús asaüyaej̈ana Lázaro tüpae ata. Palebare Juan 11:14, 38-44, panelebikujinae panabarükuaikuaijamü tsane paliwaisibeje yabaraje:
¿Depakuenia nej̈ata yapütanetsi Lázaro pepakuene petüpaejawa? (Pataema tsikiriitanetoyo 39).
Lázaro nej̈ata atjübüabetsia itsa ponaejitsipa, bajarawetsika meta nej̈ata kanawiatsipatsi, ¿bajaraj̈ua meta nej̈ata Lázaro tsitaj̈anepanaejitsipatsi?
5. ¡Jiwi ayaibitsaüto ikatsia asaü tsane!
Palebare Salmo 37:29, panelebikujinae panabarükuaikuaijamü tsane paliwaisi yabaraje:
¿Piasaüyaej̈anaewitsi nej̈ata dejota jinawanapaena?
Jesús asaüyaej̈anaena pamonae petüpaewajünaeya bitso jumekowünütawanapa Jehová; asaüyaetsiananua itsamonae ata. Palebare Hechos 24:15, panelebikujinae panabarükuaikuaijamü tsane paliwaisi yabaraje:
Petüpaewimi itsa asaü tsane, ¿depajiwiyo netaejawa jitsipaejitsipame?
Kanaüjüre j̈uaje: pakuenia paj̈a toyapüj̈anepanatsi pej̈ünatonüyo peyatij̈obijawa, bajarapijinia pakuenia Jesús yapüj̈anepanaeya asaüyaej̈anaena petüpaewimi ata.
6. Piasaüyaej̈anaeliwaisi kajamatabükuenebabatsiana
Jairo pej̈ünatoyo peliwaisi ruka Bibliajawata, bajarapaliwaisi jiwi jamatabükuenebabatatsi itsa yajuwünütüpa. Palebare bajarapapej̈aniajailiwaisi Lucas 8:40-42, 49-56.
Jesús jumaitsi Jairojawabelia petoasaüyaej̈anaewajünaeya pej̈ünatowayo: “Jairo pëtsa najamatabëxainame. Najamatabëcuenecopare saya ëxanëjavaberena” (Pataema tsikiriitanetoyo 50).
¿Depakuenia bajarapaliwaisi kajamatabükueneyawenonaejitsipa?
¿Depakuenia bajarapaliwaisi kajamatabükueneyawenonaejitsipa bitso itsa imoj̈oyo netüpae?
Pataema VIDEOJAWA, panetaekujinae panabarükuaikuaijamü tsane paliwaisi yabaraje:
¿Depakuenia nej̈ata Felicity paj̈a, penabeje jamatabükuenebabatatsi peyapütaej̈ae peliwaisi petüpaewimi piasaünej̈a?
ITSAMONAE BAJUMAITSI: “Kajena raeta baja kaeto ata petüpaewi apoasaü tsane pejinawanapaenej̈a pairataje”, jai.
¿Dekatsitaitsi bajarapaliwaisi?
¿Depaliwaisi tsitajütsipame Dioso Pejumeliwaisibaj̈utota neyapütaeyaej̈anaenej̈a petüpaewi piasaünej̈a?
PALIWAISI BAJA YAPÜTANETSI
Dioso Bibliajawata najumekapanepaeya nakajumaitsi petüpaewi ata ikatsia piasaütsinej̈a. Jehová jitsipa petüpaewimi piasaünej̈a. Bajaraponü niasaü rajuta Jesúsjawabelia petüpaewi piasaüyaej̈anaenej̈a.
Najamatabünapire
¿Depakuenia nej̈ata yapütanetsi Jehová, Jesúsbeje petüpaewimi piasaüyaej̈anaenej̈a?
¿Dejota meta nej̈ata jinawanapaena piasaüyaej̈anaewitsi, atjübütatsia meta, itsa jume, pairataje? ¿Dej̈uajitisia bajarajumaitsimü?
¿Dej̈uajitsia nej̈ata j̈amü pepo jumej̈aniataneme petüpaewimi ata piasaünej̈a?
YAPÜTAENAME ITSALIWAISI
Lebianame pakuenia itsimüjitsia itsa jamatabükuenenatsoniname.
“Pejamatabükuenenatsoninaewinej̈a itsa yajuwünütüpa” (¡Naükore! número 3, 2018)
¿Bibliabaj̈uto meta jamatabükueneyawenonaejitsipatsi itsajiwi itsa yajuwünütüpa?
Taema pakuenia bajarapavideo tsikirijiwij̈i jamatabükueneyawenonaejitsipatsi itsa yajuwünütüpa.
¿Itsamonae meta nej̈ata asaü tsane atjübütatsia? ¿Itsamonae meta nej̈ata apoasaü tsane?
“¿Dej̈ua meta ikatsia piasaükuene yabarajumaitsi?” (Ruka Internet-jawata jw.org)