¿Deitsitsi meta itsa tüpatsi?

¿J̈amü meta yajüwünütüpaejitsipame? Jamatabükuenebüjamü meta tsipae. J̈amü meta nayanijobame: “¿Petüpaekujinae meta tsitekaeya ponapona? ¿Bajarapajiwiyo meta taenajü ikatsia petüpaekujinae?”, jamatabüjamü tsipae. Paliwaisijawata taenatsi, kanaüjütsianatsinua Dioso Pejumeliwaisi j̈ua j̈aniawaetsiakuenia nakayapütaeyaej̈ana.

1. ¿Petüpaekujinae meta tsitekaeya benajumebaponapona?

Jesús yapütaeyaej̈ana petüpaejawa bepemajitsikuene. ¿Dej̈uajitsia petüpaekuene yajawanajüpa pemajitsikuene? Pakuenia itsajiwiyo bitso itsa majitanuka apoyapütae j̈ua itsi pemuj̈unenia, bajarapijinia itsi pakujinae itsajiwiyo itsa tüpa: aponawij̈aetae, aponabejiobiatae ata. Bibliabaj̈utota jumaitsi: “Itsa baja tëpa, tocopiarucatsi baja pacuenia picani exanaejitsia, penajamatabëxainaejawami” (lebare Salmo 146:4).

2. ¿Depakuenia nakajamatabükueneyawenona itsa jumeyapütanetsi petüpae yabara?

Daj̈itajiwi kujunawa petüpaejawa, kujunawanua petüpaewi. Itsa j̈amü ata bajaraitsimü, Bibliabaj̈utojawata yapütaename pej̈aniajailiwaisi, kajamatabükueneyawenonaenanua. Jesús jumaitsi: “Nexata baja itsa payapëtaename bajarapapexaniajailivaisi, pacopabianame baja itsanë papecaitorobicuenia panetoexanabiabijavami” (Juan 8:​32). Itsaiglesiamonae yapütaeyaej̈ana petüpaewi tsitekaeya pejinawanapaejawa, itsiata Dioso Pejumeliwaisi bajarapakuenia apoyapütaeyaej̈anae. Nej̈ata bajaraj̈uata petüpaekujinae itsajiwi ata aponabejiobiatae. Petüpaewi baja daj̈itakuene tokopiarukatsi, bajaraj̈uata itsakuenejawa akuenebi wajanakaitsinej̈a. Petüpaewi aponamatawenonae wajatowajükaejawa, wajamataj̈üanaejawa ata j̈aniawaetsia peponaenej̈a.

Itsamonae babarükuaikuaijai petüpaewi, itsiata kajena bajaraj̈ua akuenebi tsipaji baja kajena itsa tüpatsi, daj̈itakuene nakatokopiaruka. Nej̈ata pamonae petüpaewi barükuaikuaijai, pepakuene Dowatji, pijajiwi yajawa barükuaikuaijai. Bajarapamonae petüpaewi kuenekataeyawanapa. Nej̈ata pej̈aniajailiwaisi itsa yapütanetsi petüpaekuene yabara, Dowatji, pijajiwi yajawa aponakayamaj̈üitorobi. Jehová nakanayajiwiyapütaeyaej̈ana Dowatji wajabarükuaikuaijaiyaniwa, tsipaji Jehová yapütane dowatjiwi itsa barükuaikuaijaitsi wajanakajamatabükuenebijianaekuene (lebare Deuteronomio 18:​10-​12).

3. Pakuenia itsajiwiyo itsa tüpa

Daj̈itanakuanüjawa jiwi pakuenia jamatabükueneliwaisi itsi petüpae yabara. Itsiata daj̈ita apoj̈aniajai.

• ¿Neponaponaejawata, dej̈ua jiwi kuenetaneme itsajiwiyo itsa tüpa?

VIDEOJAWA: ¿Deitsi meta jiwi itsa tüpa? (videoyajuwünüjawa) (1:​19)

Palebare Génesis 3:​19, panelebikujinae panabarükuaikuaijamü tsane paliwaisibeje yabaraje:

• Pakuenia baja lebatsi Bibliajawata, ¿deitsi nej̈ata jiwi itsa tüpa?

• ¿Pakujinae jiwi itsa tüpa tsitekaeya meta nej̈ata jinawanapa?

Bibliabaj̈utota nakayapütaeyaej̈ana Lázaro peliwaisi. Lázaro Jesús pijaamigonü. ¿Jesus nej̈ata dej̈umaitsi itsapakujinae Lázaro tüpa? Palebare Juan 11:​11-​14, panelebikujinae panabarükuaikuaijamü tsane paliwaisianü yabaraje:

• ¿Jesús depacomparaciónkuenia jumaitsi petüpaekuene yabara?

• ¿Dej̈ua nej̈ata nakayapütaeyaej̈ana bajarapacomparaciónkuene petüpaewi yabara?

• ¿Dekatsitaitsi nej̈ata j̈ua Dioso Pejumeliwaisi yapütaeyaej̈ana petüpaekuene yabara?

4. Itsa yapütanetsi pej̈aniajailiwaisi petüpaeliwaisi yabara jamatejemaya jinawanapatsi

J̈aniawaetsiakuenia itsa yapütanetsi petüpaeliwaisi yabara, petüpaewi apobekujunawitsi. Palebare Eclesiastés 9:​10, panelebikujinae panabarükuaikuaijamü tsane paliwaisi yabaraje:

• ¿Petüpaewi meta nej̈ata benakaitsakueniaba?

Pej̈aniajailiwaisi itsa yapütanetsi Bibliabaj̈utota petüpaewi yabara, pakuenia baja kopiaya baitsi tsabiabitsi petüpaewi wajanakaitsakueniabiyaniwa, nej̈ata baja bajarapakuene bewekua najamatabükuenekopatatsi. Palebare Levítico 20:6; Apocalipsis 4:​11, panelebikujinae panabarükuaikuaijamü tsane paliwaisi yabaraje:

• ¿Jehová nej̈ata dejamatabükueneliwaisiitsi itsajiwiyo itsa jaita petüpaewi peyawenonaenej̈atsi?

5. Pej̈aniajailiwaisi petüpaeliwaisi yabara nakajamatabükuenebabata

Itsamonae pakuenia jumej̈aniataneje: “Petüpaekujinae jiwi nabejiobiataewanapa tsipaji itsa asaü tsawanapae pibisiakuene baej̈anabiaba”, jamatabüjai. Itsiata kajena pepo j̈anepana wajayapütaejawa itsajiwiyo ata apopenabejiobiataejawa petüpaekujinae. Palebare Romanos 6:​7, TNM, panelebikujinae panabarükuaikuaijamü tsane paliwaisi yabaraje:

• Pakuenia yapütaeyaej̈ana Bibliabaj̈uto itsa tüpa baja anekonijibi, ¿petüpaewi meta nej̈ata nabejiobiataewanapa pibisiakuene peitsij̈ae piasaü epatota?

Itsa j̈aniawaetsiakuenia bitso yapütanetsi Jehovákuene, j̈aniawaetsiakuenia yapütanetsi apopenabejiobiataejawa petüpaewi. Palebare 1 Juan 4:8; Apocalipsis 15:​4, panelebikujinae panabarükuaikuaijamü tsane paliwaisibeje yabaraje:

• Pakuenia baja lebatsi Bibliajawata Dioso bitso nakaasiwa, ¿Dioso meta nej̈ata petüpaewi nabejiobiataeyaej̈ana?

• ¿Nej̈ata meta itsa yapütaneme pej̈aniajailiwaisi petüpaeliwaisi yabara kajamatabükuenebabata? ¿Dej̈uajitsia?

PALIWAISI BAJA YAPÜTANETSI

Jiwi itsa tüpa, daj̈ita tokopiarukatsi. Petüpaewi aponabejiobiatae, itsajiwi ata apoitsakueniabi.

Najamatabünapire

• ¿Itsa tüpatsi meta deitsitsi?

• Pej̈aniajailiwaisi itsa yapütanetsi petüpaeliwaisi yabara, ¿dej̈uajitsia baja nej̈ata petüpaewi apobekujunawitsi?

• ¿Dej̈uajitsia itsa yapütanetsi pej̈aniajailiwaisi petüpae yabara benakajamatabükuenebabata?

YAPÜTAENAME ITSALIWAISI

Yapütaename j̈ua Dioso Pejumeliwaisi yapütaeyaej̈ana alma pej̈aijume.

“¿Depejumaitsijume nej̈ata alma?” (Ruka Internet-jawata jw.org)

Taema pakuenia Dioso jiwi aponabejiobiataeyaej̈anae infiernojawata.

¿J̈aniajai meta nej̈ata infiernojawata jiwi tajuitatsi? (3:​07)

¿Petüpaewi meta nej̈ata bekujunawatsi?

Petüpaewi peyatji... ¿pepakuene meta nej̈ata jinawanapa? ¿meta nej̈ata benakayawenona? ¿nakanabejiobiataeyaej̈ana? (Folletobaj̈uto)

Lebare peyajüwünütüpaewi pejamatabükuenebabatsinü peliwaisi.

“Bitso jamatabükuenebarüyanü tayapütaej̈ae j̈ua Bibliabaj̈utota jumaitsi petüpaekuene yabara” (Peyajiwitaebo, 1 de febrero, 2015)