LIWAISI 34
¿Depakuenia betonajamatabükueneitajütatsi Jehová wajaasiwajawa?
¿Nenakujarubiepatota Dioso Pejumeliwaisi kajamatabükueneyawenona bitso nenaimoj̈oyotsinej̈a Dioso? ¿Jitsipaejitsipame bitso nenaimoj̈oyotsijawa Jehová? Itsa bajaraitsimü, najamatabünapire: kaematakabi kanakujitsia bitso Jehová itsa asiwamü, nej̈ata bajaraponü ata bitso kaasiwa tsane, kaewetsiananua. ¿Depakuenia nej̈ata j̈amü betonajamatabükueneitajütame Diosojawabelia niasiwajawa?
1. ¿Depakuenia waj̈aitsi Jehovájawabelia betonajamatabükueneitajütatsi wajaasiwajawa?
Itsa jumekowünütatsi, tonajamatabükueneitajütatsi Jehová wajaasiwajawa (lebare 1 Juan 5:3). Bajaraponü itsajiwi ata apoitorobi pejumekowünütsinej̈atsi. ¿Dej̈uajitsia? Tsipaji Jehová jitsipa daj̈itatsi wajajamatabükueneta wajajumekowünütawanapaejawa (Romanos 6:17). Jehová jitsipa nejumekowünütsijawa tsipaji asiwamü bajaraponü, itsiata apopekaitorobikuenia. Bajarapabaj̈utojawata sección 3-jawata, 4-jawatanua yapütaename pakuenia tonajamatabükueneitajütsijitsiamü Jehovájawabelia niasiwakuene pakueniaje: neitsijawa j̈ua bajaraponü jitsipa, aponeitsijawa j̈ua bajaraponü ata apojitsipae.
2. ¿Dej̈uajitsia itsajawata Jehová wajajumekowünütsinej̈a aponakatsitayapüj̈anepanae?
Bibliabaj̈utota jumaitsi: “Pexaniacuene pexanaejiwi-ata, pibisiacuene tocopiapatsianatsi” (Salmo 34:19). Abaj̈ü nakatosajina wajanajamatabükuenej̈anetsinej̈a. Itsajawata pibisialiwaisi nakatopata, palata nakatowerewereka, itsajawata itsajiwiyo nakanabejiobiataeyaej̈ana. Itsajawata pibisiakuene itsa nakatokopiapata, nakatoayapübeje Jehová wajajumekowünütsinej̈a. Itsiata, itsa najamatabükuenesaütatsi wajajumekowünütsinej̈a Jehová, bajarapakuenia tonajamatabükueneitajütatsi bajaraponü wajaasiwajawa daj̈itawekua. Bajarapakuenianua tonajamatabükueneitajütatsi kaeto ata apowajanawekuanatsatsinej̈a bajaraponü. Nej̈ata Jehová kaeto ata apokawekuanatsatsi tsane, daj̈itamatakabijawabelia kaewetsiana (lebare Hebreos 13:5).
KANAÜJÜTSIANATSI
Yapütaenatsi Jehová itsa jumekowünütatsi, jamatabükuenebarüyayaej̈anaenatsi, j̈ua nakajamatabükueneyawenonanua wajajumekowünütabiabinej̈a.
3. Job peliwaisi j̈amü ata katsijopa
Bibliajawata Job-baj̈utojawata, lebatsi Dowatji Job pekobewünüjonaejawatsi, kobewünüjonanua pamonae jitsipa Jehová petonakuenebijawa. Palebare Job 1:1, 6-2:10, panelebikujinae panabarükuaikuaijamü tsane paliwaisibeje yabaraje:
¿Dej̈ua yabara Dowatji yamaj̈üitojorobiaya jumaitsi Job pejumekowünütsij̈ae Jehová? (Pataema Job 1:9-11).
¿Depakuenia meta Dowatji daj̈itatsi nakakobewünüjona? (Pataema Job 2:4).
Palebare Job 27:5b, panelebikujinae panabarükuaikuaijamü tsane paliwaisi yabaraje:
¿Depakuenia Job tonajamatabükueneitajüta Jehovájawabelia bitso pejamatabüütjütojawawerena piasiwajawa?
Job kaeto ata Jehová apowekuanatsatsi piasiwaj̈ae.
Waj̈aitsi ata bitso asiwatsi Jehová, bajaraj̈uata aponawekuanatsatsitsi bajaraponü.
4. Jehová jamatabükuenebarüyayaej̈anare
Palebare Proverbios 27:11, panelebikujinae panabarükuaikuaijamü tsane paliwaisi yabaraje:
¿Jehová dekasiwajamatabükueneitsi j̈amü itsa jumekowünütame? ¿Dej̈uajitsia?
5. Jehová pütsa kaeto ata wekuanatsatame
Jehová itsa asiwatsi, jitsipatsi Pejumeliwaisi wajatsipaebaponaejawa itsamonaejawabelia. Bajaraj̈uata, nakatsitaayapübeje ata, kaeto ata itsiata apobewekuanatsatsitsi bajaraponü. Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:
¿Katsitaayapübeje Dioso Pejumeliwaisi netsipaebijawa itsamonaejawabelia?
Pakuenia baja tanetsi videojawa, ¿deitsi nej̈ata Grayson ajunawijibia Dioso Pejumeliwaisi petsipaebinej̈a?
Itsa asiwatsi j̈ua asiwa Jehová, itsa ataejitsibitsi j̈ua ataejitsibi Jehová, nej̈ata Jehová yapüj̈anepanaeya naimoj̈oyotatsi. Palebare Romanos 12:9, panelebikujinae panabarükuaikuaijamü tsane paliwaisibeje yabaraje:
Bajarapaliwaisi baja nej̈ata neyapütaekujinae, ¿dej̈uanü baja nej̈ata Jehová asiwa? ¿Dej̈uanü baja nej̈ata bajaraponü ataejitsibi?
¿Deitsimü tsipae nej̈ata niasiwanej̈a pej̈aniakuene, niataejitsibinej̈a pibisiakuene?
6. Jehová itsa jumekowünütatsi liwaisij̈anepanatsi
Jehová kajena bitso itsa jumekowünütatsi, pej̈aniakuene. Palebare Isaías 48:17, 18, panelebikujinae panabarükuaikuaijamü tsane paliwaisibeje yabaraje:
¿J̈aniajai meta nej̈ata Jehová pepakuene yapütane j̈ua nakatoj̈anepana? ¿Dej̈uajitsia?
¿Depakuenia kajamatabükueneyawenona Dioso Pejumeliwaisi neyapütaejawa?
ITSAMONAE BAJUMAITSI: “Itsakuene itsi atanü tsipae Dioso apotsiatanetsi”, jai.
¿Depaliwaisi Bibliabaj̈utota tsitajütsipame itsajiwiyojawabelia neyapütaeyaej̈anaenej̈a Jehová wajanakasiwajamatabükuenebüjaijawa?
PALIWAISI BAJA YAPÜTANETSI
J̈amü itsa jumekowünütame Jehová, tonajamatabükueneitajütame bitso niasiwajawa. Ayailiwaisi j̈ainae atamü, pütsa kaeto ata Jehová wekuanatsatame.
Najamatabünapire
¿Dej̈ua baja yapütaneme Job peliwaisijawata?
¿Deitsimü tsipae Jehová netonajamatabükueneitajütsinej̈a niasiwajawa?
¿Dej̈ua kajamatabükueneyawenonaejitsipa Jehová kaeto ata newekuanatsatsiyaniwa?
YAPÜTAENAME ITSALIWAISI
Yapütaema j̈ua beitsimü newekuanatsatsiyaniwa Jehová, congregación ata.
“Apobewekuanatsatsimü pamonae baja pijinia apokawekuanatsatsi” (16:49)
Dowatji kobewünüjona Job. Yapütaema bajaraj̈ua yabara.
Taema pakuenia pejewaj̈i ata Jehovájawabelia tonajamatabükueneitajüta piasiwajawa.
¿Depakuenia nej̈ata pewüjüawi, pejanawi yajawa Jehová jumekowünütsipa itsamonae apotojitsipae atatsi?
¡Pütsa itsamonae naitorobiayaej̈aname pibisiakuene neitsinej̈a! (3:59)