LIWAISI 57
¿Deitsi tsipae pepakuene itsa nanekonitame?
Jehová bitso asiwa atamü tsipae itsajawata akuenebejemü tsipae. Apojitsipae atamü, pibisiakuene itsimü tsipae Dioso pitabarata. Itsiata itsajawata bitso betonanekonitatsi (1 Corintios 6:9, 10). J̈amü pepakuene nanekonitsi atamü tsipae, itsiata Jehová tsitekaeya kaasiwa. Jehová jitsipa pekabarajamatabükuenej̈anepanaejawa, pekayawenonaejawa ata.
1. ¿Debeitsitsi nej̈ata Jehová wajanakabarajamatabükuenej̈anepanaenej̈a?
Pajiwiyo Jehová asiwa, itsa nanekonita apojamatabükuenej̈anepanae. Itsiata Jehová jamatabükuenebabata bajarapamonae j̈ua rubena Bibliabaj̈utota: “Panijanekoni tsaüjai ata, pepo niojai tsane benievekuenia” (Isaías 1:18). Pepakuene itsa najamatabükuenepünüyorotatsi, Jehová nakabarajamatabükuenej̈anepanaena. ¿Debeitsitsi nej̈ata wajanajamatabükueneitajütsinej̈a pepakuene baja wajanajamatabükuenepünüyorotsijawa? Bitso pepakuene nabejiobiatanetsi wajananekonitsij̈ae. Bajaraj̈uakujinae baja apobeakuenebeje tsaponaetsi. Pepakuene benawajütatsi Jehovájawabelia wajanakabarajamatabükuenej̈anepanaenej̈a. Najamatabükuenesaütatsi pibisiakuenejawanü wajanajamatabüj̈ainaeyaniwa. J̈ua yabara nanekonitatsi, nej̈ata benawekuajamatabükuenekopatatsi, biji rajane betojinawanapatsi Jehová wajanakatojitsipaekuenia (lebare Isaías 55:6, 7).
2. Itsa nanekonitatsi, ¿deitsi Jehová, ancianowi wajanakajamatabükueneyawenonaenej̈a?
Jehová yapütaeyaej̈ana pajiwiyo nanekonita paliwaisije: “Bejunata ancianovi” (lebare Santiago 5:14, 15). Jehová bajarapamonae rajutatsi pijaespíritu santo pijajiwi pewetsinej̈a. Nej̈ata ancianowi j̈aniawaetsiakuenia yapütane nanekonitsi atatsi pakuenia nakayawenonaejitsia (Gálatas 6:1).
¿Depakuenia nej̈ata ancianowi nakajamatabükueneyawenona itsa nanekonitatsi? Anijaancianonübeje, itsa jume, akueyabi paancianonübeje benakatsitajüta Dioso Pejumeliwaisibaj̈utota wajayapütaenej̈a pibisiakuene wajaitsij̈ae. Nakayapütaeyaej̈ananua pej̈anialiwaisianü ikatsia wajananekonitsiyaniwa. Nakajamatabükueneyawenonanua wajajamatabükuenefaefaenaeyaniwa. Itsiata pakujinae itsajiwiyo nanekonita, itsa aponajamatabükuenepünüyorotsi, ancianowi baja nej̈ata yapütaeyaej̈anatsi pejutsinej̈atsi congregaciónwekua. Ancianowi bajarapakuenia itsi j̈aniawaetsiakuenia congregaciónpijiwi pewetsinej̈a.
KANAÜJÜTSIANATSI
Yapütaema daj̈itaj̈ua Jehová itsi itsa nanekonitatsi. Jehovájawabelia pej̈aniajamatabükuene rajutsianatsi wajanakayawenonaej̈ae.
3. Jehovájawabelia itsa nanekonitsipaebatsi nakajamatabükueneyawenona
Itsa nanekonitatsi, Jehová bitso tsiatanetsi. Bajaraj̈uata bajaraponüjawabelia benanekonitsipaebatsi. Palebare Salmo 32:1-5, panelebikujinae panabarükuaikuaijamü tsane paliwaisi yabaraje:
¿Dej̈uajitsia nej̈ata j̈anepana wajananekonitsipaebijawa Jehovájawabelia?
Itsa nanekonitatsi, wajajamatabükuenej̈anepanaenej̈a nej̈ata ancianowijawabelia betsipaebatsi. Pataema VIDEOJAWA, panetaekujinae panabarükuaikuaijamü tsane paliwaisi yabaraje:
¿Depakuenia ancianowi yawenona Canonwününü penawiatsinej̈a congregaciónjawabelia?
Ancianowijawabelia betsipaebatsi pej̈aniajaikuenia, tsipaji bajarapamonae jitsipa wajanakayawenonaejawa. Palebare Santiago 5:16, panelebikujinae panabarükuaikuaijamü tsane paliwaisi yabaraje:
¿Wajaj̈aniajaikuenia ancianowijawabelia itsa tsipaebatsi, toyapüj̈anepanatsi nej̈ata bajarapamonae wajanakayawenonaenej̈a? ¿Dej̈uajitsia?
Jehovájawabelia nanekonitsipaebare, nej̈aniajaikuenia ancianowijawabelia tsipaebare, jumekowünüre pakuenia asiwayakuenia Jehová kajamatabükueneyawenonaejitsia.
4. Jehová itaj̈utotsoniatane penanekonitsiwi
Itsajiwiyo nej̈ata itsa nanekonita, bajarapijinia apojitsipae pejumekowünütsijawa Jehová, nej̈ata bajaraj̈uata jutatsi penanekonitsijiwiyo congregaciónwekua, waj̈aitsi ata apobeyajawajinawanapaetsi bajarapajiwiyo penanekonitsij̈ae. Palebare 1 Corintios 5:6, 11, panelebikujinae panabarükuaikuaijamü tsane paliwaisi yabaraje:
Pakuenia tsikirilevadurajawayo atseneej̈ana daj̈ita matabü, ¿depakuenia jamatabükuenebijianaejitsipa congregaciónpijiwi peyajawajinawanapaejawa penanekonitsijiwiyo apojitsipae baja penajamatabükuenepünüyorotsijawa?
Pakuenia Jehová itaj̈utotsoniatane penanekonitsiwi, bajarapijinia itsi ancianowi ata. Bajarapamonae jamatabükueneyawenona pejukaewimitsi congregaciónwekua. Bajaraj̈uata itsamonae pejukaewimitsi ikatsia nawiaba congregaciónjawabelia pekuenej̈anetsij̈aetsi, apotsitayapüj̈anepanae atatsi (Salmo 141:5).
• Jehová j̈aniawaetsia pekanaüjütsinü, pitaj̈utotsoniataenü, asiwaya petaeyabiabinü, ¿depakuenia nej̈ata Jehová najamatabükueneitajüta bajarapapej̈aniajamatabükuene penanekonitsiwijawabelia?
5. Itsa najamatabükuenepünüyorotatsi Jehovájawabelia, nakabarajamatabükuenej̈anepana
Jesús tsipaeba pakujinae itsajiwiyo najamatabükuenepünüyorota wajanakayapütaeyaej̈anaenej̈a pakuenia Jehová jamatabükueneitsi. Palebare Lucas 15:1-7, panelebikujinae panabarükuaikuaijamü tsane paliwaisi yabaraje:
Bajarapaliwaisi nej̈ata, ¿dej̈ua nakayapütaeyaej̈ana Jehová yabara?
Palebare Ezequiel 33:11, panelebikujinae panabarükuaikuaijamü tsane paliwaisi yabaraje:
¿Depakuenia nej̈ata benajamatabükueneitajütatsi pepakuene wajanajamatabükuenepünüyorotsijawa?
Jehová bepastornükuenia siwajamatabükueneenatsi pijaovejaj̈i.
ITSAMONAE BAJUMAITSI: “Bitso junawajü tatsipaebijawa tajanekoni yabara ancianowijawabelia. Tsipaji nejutsipa congregaciónwekua”, jai.
Nej̈ata itsajiwiyo bajarapakuenia itsa najamatabüj̈aina, ¿dejumaitsimü tsipae?
PALIWAISI BAJA YAPÜTANETSI
Nanekonitsi atatsi itsiata pepakuene itsa najamatabükuenepünüyorotatsi, nej̈ata Jehová nakabarajamatabükuenej̈anepanaena.
Najamatabünapire
¿Dej̈uajitsia j̈anepana itsa nanekonitsipaebatsi Jehovájawabelia?
¿Debeitsitsi nej̈ata Jehová wajanakabarajamatabükuenej̈anepanaenej̈a?
Nej̈ata pepakuene itsa nanekonitatsi, ¿dej̈uajitsia ancianowijawabelia betsipaebatsi wajanakayawenonaenej̈a?
YAPÜTAENAME ITSALIWAISI
Itsanü Jehová barajamatabükuenej̈anepana, pakuenia ruka Isaías 1:18.
¿Depakuenia nej̈ata ancianowi jamatabükueneyawenonaejitsipa pajiwiyo ayaikuenia nanekonita Jehová pitabarata? Lebare bajarapaliwaisi yabara.
“Pasiwamüre, paitaj̈utotsoniataema penanekonitsijiwiyo” (Peyajiwitaebo, agosto 2024)
¿Depakuenia benajamatabükueneitajütatsi wajaitaj̈utotsoniataejawa, wajaasiwajawanua pejukaewitsi congregaciónwekua? Yapütaema pakuenia itsijitsiamü.
“¿Depakuenia beyawenonatsi pejukaewitsi congregaciónwekua?” (Peyajiwitaebo, agosto 2024)
Lebare itsanü peliwaisi congregaciónwekua pejutsikujinaetsi ikatsia penawiatsijawa. “Ikatsia jitsipajü Jehovájawabelia tanawiatsijawa”, jai.
“Dioso Pejumeliwaisi jamatabükuenej̈anetatsi” (Peyajiwitaebo, 1 de abril, 2012)