LIWAISI 58
Jehová pütsa kaeto ata wekuanatsatame
Paj̈anü pepo pacristianowinü kaeto ata Jehová apopanawekuanatsanaenü tsane. Pajitsipajü daj̈itamatakabijawabelianej̈a patatonakuenebawanapaejawa Jehová. Payapütaniji pakuenia j̈amü ata aponawekuanatsatsimü Jehová. Bajarapakuenia jamatabükuenebarüyayaej̈aname Diosojawabelia (lebare 1 Crónicas 28:9). ¿Dej̈uajawanü j̈amü Jehová kawekuanatsatsiej̈anaejitsipa? ¿Dej̈ua j̈amü kajamatabükueneyawenonaejitsipa?
1. ¿Depakuenia itsamonae Jehová nakawekuanatsanaej̈anaejitsipa?
Itsamonae meta jitsipa Jehová wajatonakuenebiyaniwa. Pakuenia itsamonae Jehová penawekuanatsanaewi, wowaijumeta apóstatamonae, yamaj̈üitojorobanajetarubena Jehová pijajiwi wajakopabinej̈a Dioso pijakuenejawanü. Waj̈aitsi yabara itsaiglesia pematakaitorobiwi barakuaikuaijai itsamonaejawabelia Dioso Pejumeliwaisi penakujarubiyaniwa. Bitso kajena pepo ayai wajanamuj̈unaewetsinej̈a Dioso pekueyawi. Bajaraj̈uata bajarapamonae apobenamuj̈unaewetsitsi, apobebarükuaikuaijaitsi, bajarapijinia j̈uajawanü ruba Internet-jawata apóstatamonae apobelebitsi, apobetaetsinua. Jesús jumaitsi pamonae jitsipa Jehová wajanawekuanatsatsiej̈anaenej̈a pakueniaje: “Pitatsëcënaenë itsa matacaponaejitsipa itsanë pijinia pitatsëcënaenë, nexata najuajopaejitsiparecabeje mëthëxanetojavareca” (Mateo 15:13, 14).
2. ¿Dej̈uajawanü Jehová nakawekuanatsatsiej̈anaejitsipa?
Jehová wajaasiwaj̈ae, daj̈ita jemaiglesiajawanü bewekuanatajayotatsi. Apobetonakuenebitsi, apobenaimoj̈oyobitsinua daj̈itaj̈uajawanü itsi tsabiabitsi jemaiglesiakuenejawanüjawabelia. Jehová jitsipa pijajiwi nayajiwitaeya pejinawanapaejawa, bajaraj̈uata jumaitsi: “Paxamë patajajivimë, papitsapare baja Babilonia tomaravecua”, yabarajumaitsi jemaiglesiajawanü (Apocalipsis 18:2, 4).
KANAÜJÜTSIANATSI
Yapütaema j̈ua beitsimü itsajiwi Jehová pekawekuanatsatsiej̈anaeyaniwa. Yapütaemanua pakuenia bewekuanatajayotatsi Babilonia Pinijitomaraj̈aneto.
3. Penajumetsünütsiliwaisi petsipaebiwi wekuanatsare
¿Debeitsitsi itsamonae itsa barakuaikuaijai Jehová petotsipaebaponaewi yabara? Palebare Proverbios 14:15, panelebikujinae panabarükuaikuaijamü tsane paliwaisi yabaraje:
¿Dej̈uajitsia apobejumekowünütsitsi daj̈itaj̈ua nakajumaitsi?
Palebare 2 Juan 9-11, panelebikujinae panabarükuaikuaijamü tsane paliwaisianü yabaraje:
¿Dej̈uajitsia apóstatamonae apoyajawajinawanapaetsi?
¿Dej̈uajitsia nej̈ata j̈uajawanü ruba Internet-jawata apóstatamonae apobelebitsi, apobetaetsinua?
Itsa jumekowünütatsi papibisialiwaisianü itsamonae jumaitsi Jehová yabara, congregación ata, ¿denakasiwajamatabükueneliwaisiitsi tsipae Jehová?
4. ¿Dej̈ua beitsimü itsa itsajiwiyo nijacongregaciónjawata nanekonita?
Wajamonaejiwiyo congregaciónjawata itsa pibisiakuene itsi, ¿debeitsitsi nej̈ata? Kanaüjüre j̈ua nakayapütaeyaej̈ana israelitawi pitorobiliwaisi yabara. Palebare Levítico 5:1.
Pakuenia Bibliabaj̈utota jumaitsi, itsa yapütanetsi itsajiwiyo pibisiakuene pej̈anaejawa, nej̈ata kopiaya penanekonitsijiwiyo bebarükuaikuaijaitsi. Asiwayakuenia bemuj̈ujiobatsi bajarapajiwiyo pijakueneta ancianowijawabelia petsipaebinej̈a papibisiakuene itsi. Nej̈ata itsa bajarapajiwiyo apopaebi, juya waj̈aitsi ancianowijawabelia betsipaebatsi. Itsa bajarapakuenia itsitsi, ¿depakuenia tonajamatabükueneitajütsipatsi wajaasiwajawa...
... Jehová?
... penanekonitsijiwiyo?
... congregaciónpijiwi?
Itsa wajamonaejiwiyo congregaciónjawata liwaisi itsa natsij̈aina, ¡yawenonare!
5. Daj̈ita jemaiglesiajawanü wekuanatajayore
Palebare Lucas 4:8; Apocalipsis 18:4, 5, panelebikujinae pakanaüjütsianamenua paliwaisianü yabaraje:
¿Tsitekaeya meta baja itsaiglesiajawanüta wünübokajü?
¿Abaj̈ü yawenonabiabajü itsaorganizaciónjawanü pakuenia escuelajawata, universidadjawata, fundaciónjawanü, itsakuenejawanü ata jemaiglesiajawanü peyawenonaejawa?
¿Tanakuenebijawata meta yawenonabiaba jemaiglesiajawanü?
¿Tsitekaeya abaj̈ü jemaiglesiajawanü aposiwajamatabükuenekopatsinü?
Itsa tsitekaeya yawenonajü itsajemaiglesiajawanü, ¿depakuenia nej̈ata benajamatabükuenej̈anetajü?
Jamatabükueneliwaisij̈anepaeya itsimüre tsabiabi daj̈itakuene. Itsa asiwamü Jehová, kaeto ata pütsa wekuanatsatame.
¿J̈amü deitsimü tsipae itsakuenejawa kawajüta itsajiwiyo peyawenonaenej̈a jemaiglesiajawanü?
ITSAMONAE BAJUMAITSI: “Beyapütaniji j̈ua apóstatamonae yapütaeyaej̈ana Jehová petotsipaebaponaewi yabara tanayajiwikuaikuaijainej̈a”, jai.
¿Bajaraj̈ua meta j̈anepana? ¿Dej̈uajitsia?
PALIWAISI BAJA YAPÜTANETSI
Jehová wajanawekuanatsanaeyaniwa, apobeyajawajinawanapaetsi pamonae jitsipa wajanakayamaj̈üitojorobijawa wajajumekowünütsiyaniwa Dioso.
Najamatabünapire
¿Dej̈uajitsia apobenamuj̈unaewetsitsi j̈ua jumaitsi apóstatamonae?
¿Dej̈ua beitsitsi itsa wajamonaeyajuwünüjiwiyo congregaciónjawata ayaikuenia nanekonita Dioso pitabarata?
¿Debeitsitsi nej̈ata wajawekuapitsapaenej̈a jemaiglesiajawanüwekua?
YAPÜTAENAME ITSALIWAISI
Yapütaema pakuenia itsimüjitsia itsa jumetaneme penajumetsünütsiliwaisi Jehová petotsipaebaponaewi yabara.
“¿Yapütanetsi baja pej̈aniajaikuene?” (Peyajiwitaebo, agosto de 2018)
¿Depakuenia yapütaejitsipame itsa bajarapaorganización yawenona jemaiglesiajawanü?
¿Deitsi nej̈ata Jehová pekueyawi wajanakajamatabükuenefaefaenaeyaej̈anaenej̈a?
Lebare pakuenia itsasacerdotenü jemaiglesia wekuapitsapa. “Pejewaj̈ikujinaenü jamatabüyapütaniji Dioso Pejumeliwaisi”, pejailiwaisi.
“Dioso Pejumeliwaisi jamatabükuenej̈anetatsi” (Peyajiwitaebo, 1 de julio, 2011)