Penajumetsünütsiiglesiajawanü wünübijiana Dioso

¿Dej̈uajitsia itsaiglesiamonae kujarubi ata Dioso pijakuene itsiata pibisiakuene ej̈anabiaba? Itsa najumetsünütabiaba, pibisiakuene ej̈anabiabanua, nej̈ata wünübijianabiaba Dioso. ¿Depakuenia itsi tsabiabi bajaraj̈ua? ¿Dejamatabükueneitsi tsabiabi Dioso itsa tane bajaraj̈ua? ¿Deitsi tsane Dioso bajarapamonaejawabelia?

1. ¿Depakuenia wünübijiana Dioso pijapekujarubijawanüta?

Jemaiglesiawi itotjiana pej̈aniajailiwaisi Dioso yabara najumetsünütsiaya (Romanos 1:25). Itsaiglesiamonae apoyapütaeyaej̈anabiabi Dioso pewünü yabara, itsiata baitsi jane, Bibliabaj̈uto nakakujaruba Dioso pewünü (Romanos 10:​13, 14, TNM). Itsaiglesiamonae jumaitsi tsabiabi: “Itsa pibisiakuene katokopiapata, Dioso raja pejamatabükueneta”, jai, itsiata bajaraj̈ua apoj̈aniajai. Itsa pibisiakuene katokopiapata jemajai Dioso apopejamatabükueneta (lebare Santiago 1:13). Bajarapapenajumetsünütsiliwaisianü wekuanatsatsiaej̈ana jiwi Diosowekua.

2. ¿Depakuenia wünübijiana jemaiglesiamonae Dioso pewünü pibisiakuenejawanüta?

Dioso bitso asiwa jiwimonae, itsiata jemaiglesiawi apoasiwa bajarapakuenia. Bibliabaj̈uto jumaitsi bajarapamonae yabara: “Pijaneconi baja bitso ayaijava xaina” (Apocalipsis 18:5). Bajayatamikujinae itsaiglesiamonae nayajawajinawanapa políticowimonaeta, jejainua jiwimonae penabenej̈a, yajawa jiwibitsaütomonae petüpaenej̈a. Iglesia pematakaponaeyajuwünüwi jitsipabiaba üpekobekowü pej̈ainaenej̈a, bajaraj̈uata wajükabiaba palata pijajiwijawabelia. Nej̈ata bajaraj̈ua nakayapütaeyaej̈ana apopeyapütaekuene Dioso. Nej̈ata, ¿dej̈ua yabara meta bajarapamonae Dioso pijajiwi tsipae? (lebare 1 Juan 4:8).

3. ¿Dejamatabüitsi meta Dioso itsa jemaiglesiamonae pibisiakuene ej̈ana?

Itsa j̈amü aitaj̈utojitsibimü tsabiabi j̈ua jemaiglesiamonae ej̈anabiaba, Jehová biji bitso aitaj̈utojitsibi tsabiabi itsa pibisiakuene ej̈ana. Dioso bitso nakaasiwa juya, baitsi jane, jemaiglesiamonae baraanaepana pewünübijianaej̈aetsi, yajawanua pibisiakuene petoitsij̈ae pijajiwijawabelia. Dioso najumekapanepaeya jumaitsi pekopiarukaeyaej̈anaenej̈a jemaiglesiawi, nej̈ata “apo taetsi baja tsane icatsia” (Apocalipsis 18:21). Paimoj̈oyo matakabi, ajibi baja tsane daj̈ita jemaiglesiawi (Apocalipsis 18:​7, 8).

KANAÜJÜTSIANATSI

4. Dioso apotsitaj̈anepanaetsi daj̈itaiglesiajawanü

Jiwimonae jamatabüjumaitsi: “J̈anepana daj̈itaiglesiajawanü tsipaji nakanaimoj̈oyota Diosojawabelia”, jamatabüjai. ¿J̈aniajai meta bajaraj̈ua? Palebare Mateo 7:​13, 14, TNM, panelebikujinae panabarükuaikuaijamü tsane paliwaisi yabaraje:

• Pakuenia Bibliabaj̈uto jumaitsi, ¿depanamuto nakamatakapona wajajinawanapaenej̈a daj̈itamatakabijawabelia?

Pataema VIDEOJAWA, panetaekujinae panabarükuaikuaijamü tsane paliwaisi yabaraje:

VIDEOJAWA: ¿Dioso meta tsitaj̈anepanatsi j̈ua itsi tsabiabi daj̈itaiglesiamonae? (videoyajuwünüjawa) (3:​22)

• ¿Bibliabaj̈uto yapütaeyaej̈ana Dioso petsitaj̈anepanaejawatsi daj̈itaiglesiamonae?

5. Jemaiglesiamonae Dioso apokuenejüpae pakuenia asiwa jiwi

Jemaiglesiawi wünübijiana Dioso ayaikuenia, tsipaji tsitaj̈anepanatsi penabejawa jiwimonae. Paneyapütanej̈a pataema VIDEOJAWA. Panetaekujinae panabarükuaikuaijamü tsane paliwaisibeje yabaraje:

VIDEOJAWA: J̈ua jawanü naitsi jemaiglesiamonae Segunda Guerra Mundialjawata (2:​22)

• Segunda Guerra Mundialjawata, ¿dej̈ua ej̈ana jemaiglesiamonae?

• ¿Dej̈ua juya siwanajamatabüj̈ainame bajarapamonae yabara?

Palebare Juan 13:​34, 35; 17:16. Panelebikujinae panabarükuaikuaijamü tsane paliwaisibeje yabaraje:

• ¿Dejamatabüitsi meta Jehová itsa iglesiamonae jamatabükueneyawenonabiaba penabejawanej̈a?

• Jemaiglesiamonae pibisiakuene itsi tsabiabi, nej̈ata aponajamatabükueneitajübi pakuenia Dioso asiwa jiwi. ¿Bajarapakuenia taneme peitsijawa?

6. Dioso kapitsapanajetaruka jiwi jemaiglesiajawanüwekua

Palebare Apocalipsis 18:​4,a panelebikujinae panabarükuaikuaijamü tsane paliwaisi yabaraje:

• Dioso jitsipa pekapanepaejawa pamonae bajayajebi yamaj̈üitojorobatsi jemaiglesiamonae. ¿Dekatsitaitsi bajaraj̈ua?

7. Pütsa kopatame neyapütaenajetarukaejawa pepo Diosonü yabara

¿Pibisiakuene nej̈ata besiwanajamatabüj̈ainame Dioso, pibisiakuene peej̈anaej̈ae jemaiglesiawi? Kanaüjüre pakuenia itsa pewüjüato namuj̈ujemata paj̈a pemuj̈ujiobiliwaisitsi, nej̈ata bowekuapona, bijiataponapona. Paj̈a bajaraj̈ua pikani apojitsipae. ¿Paj̈a meta pejamatabükueneta pej̈ünato bijiataponaponaejitsipa?

• Papibisiakuenejawanü jemaiglesiawi ej̈anabiaba, apoitsi Dioso pejamatabükueneta, ¿nej̈ata bekopatatsi meta wajayapütaejawa Jehová yabara?

PALIWAISI BAJA YAPÜTANETSI

Jemaiglesiawi wünübijiana Dioso penajumetsünütsiliwaisijawanüta, pibisiakuenejawanü ej̈anabiabanua. Itsiata kaeepatoyokujinae saya, Dioso ajibiaej̈anaena baja bajarapamonae.

Najamatabünapire

• ¿Dekatsitaitsi j̈ua jemaiglesiawi ej̈anabiaba, j̈ua kujarubabiabanua?

• ¿Desiwanajamatabüj̈aina Jehová jemaiglesiajawanü yabara?

• ¿Deitsi tsane Dioso jemaiglesiawijawabelia?

YAPÜTAENAME ITSALIWAISI

Anijapaliwaisibeje yabara, Dioso apotsitaj̈anepanaetsi jemaiglesiamonae. Taename bajaraj̈uabeje yabara:

“¿Daj̈itaiglesiamonae nakanaimoj̈oyotsiaej̈ana meta Diosojawabelia?” (Ruka Internet-jawata jw.org)

¿Dej̈uajitsia Jehová jitsipa wajatonakuenebijawa itsamonae yajawa, wajaepatoj̈i jume?

“¿Namatawenonatsi meta iglesiakuene wajatonakuenebinej̈a Dioso?” (Ruka Internet-jawata jw.org)

Sacerdotenü jumeaeba pijaiglesia yabara. Itsiata apokopatsi peyapütaenajetarukaejawa Dioso yabara.

“Sacerdotenü wekuapitsapa pijaiglesiawekua” (¡Naükore!, febrero 2015)

Bajayatamikujinae iglesiamonae kujaruba penajumetsünütsiliwaisi Dioso yabara. ¿Dewerenapitsapa papenajumetsünütsiliwaisi?

“Penajumetsünütsiliwaisianü nakawekuanatsatsiaej̈ana Dioso” (Peyajiwitaebo, 1 de noviembre, 2013)