¿Dioso meta tsitaj̈anepanatsi daj̈itafiestajawanü?

Jehová jitsipa wajabarüyajawa, bajaraj̈uata tsitaj̈anepanatsi itsajawata wajaitsijawa fiestakuene. Itsiata, ¿Dioso meta tsitaj̈anepanatsi daj̈itafiestakuenejawanü? ¿Debeitsitsi wajajamatabükuenebarüyayaej̈anaenej̈a Jehová?

1. ¿Dej̈uajitsia Jehová apotsitaj̈anepanaetsi itsafiestakuenejawanü?

Itsawiriafiestakuene apopitsapae Diosojawawerena jiwipebarüyanej̈a. Itsafiestajawanü jemaiglesiajawawerena pitsapa, itsafiestajawanü Dowatji pijakuenejawanü j̈aina, itsafiestajawanü abeje tsipaji yapütaeyaej̈ana jiwi petüpaekujinae abaj̈ü pejumape pejinawanapaejawa. Itsajawata itsamonae ponabiaba bajarapafiestajawanü pejumekowünütsij̈ae jemaliwaisi (Isaías 65:11). Bajaraj̈uata Jehová nakaitaweta pibisiakuenejawawekua, bajaraponü nakajumaitsi: “Paxamë pëtsa pibisiacuene panaexanaename bajarapamonaeta papecajamatabëcuene bijianaeyaniva” (2 Corintios 6:17).a

2. ¿Jehová desiwajamatabüitsi jiwi itsa bitso nayaiyataeyaej̈ana fiestakuenejawata?

Jehová nakamuj̈ujioba wajanajamatabükuenekopatsiyaniwa üjiwijawabelia Jehováwekua (lebare Jeremías 17:5). Itsiata baitsi jane itsamonae natoej̈anabiaba fiestakuene penajamatabükueneitajütsinej̈a penajamatabükuenekopatsijawa pematakaitorobiwijawabelia. Itsafiestajawanüta najamatabünanotabiaba kaenakua pijaindependenciamatakabi. Itsafiestajawanüta itsi penajamatabükueneitajütsinej̈a piasiwajawa kaenakuapijiwi pijasímbolo patriojawanü, pakuenia banderajawa (1 Juan 5:21). Itsafiestajawanü políticakuene yabara, movimiento socialkuene yabara ata. Itsafiestajawanü toitsitsi jiwi, organizaciónjawanüjawabelianua pesiwajamatabükuenej̈anepanaenej̈a, Dioso pejitsipaekuenia apoej̈anae ata ¿Dejamatabükueneitsi tsipae nej̈ata Jehová?

3. ¿Depitsikuenejawanü abeje fiestajawata?

Dioso Pejumeliwaisibaj̈utojawata itaweta pafiestajawanüta jiwi pibisiakuenejawanü ej̈anabiaba, aitajibi tsabiabi, bitso piaitajibiej̈anaera apaebiaba atanua (1 Pedro 4:3). Itsafiestajawanüta jiwi pibisiakuene naperabükenetsiataeyaej̈ana. Itsa abaj̈ü Jehová pijaamigowijitsiatsi, benawekuanatsatatsi daj̈ita pibisiakuenejawanü.

KANAÜJÜTSIANATSI

4. Pütsa naponame pafiestakuenejawa jiwi Jehová apoyaiyataebiabitsi

Palebare Efesios 5:10, panelebikujinae panabarükuaikuaijamü tsane paliwaisianü yabaraje:

• ¿Dej̈ua beyapütanetsi wajaponaewajünaeya fiestajawabelia?

• ¿Depafiestajawanü itsi tsabiabi itsajota j̈amü ponaponame?

• ¿Jehová meta tsitaj̈anepanatsi bajarapafiestajawanü?

¿Dioso meta tsitaj̈anepanatsi cumpleañojawa? Dioso Pejumeliwaisibaj̈uto nakayapütaeyaej̈ana bajayata Jehová pijajiwimi cumpleañojawanü apopeitsijawa. Itsiata rajane nakayapütaeyaej̈ana anijacumpleañojawabeje itsibeje Dioso apopejumekowünütsijiwibeje. Palebare Génesis 40:20-22; Mateo 14:6-10. Panelebikujinae panabarükuaikuaijamü tsane paliwaisibeje yabaraje:

• ¿Dej̈uajitsia najüpabeje bajarapacumpleañobeje?

• Nelebikujinae bajarapaliwaisi, ¿Dioso meta desiwajamatabüitsi cumpleaño fiestakuene yabara?

Itsiata meta nayanijobijitsipame: “¿Jehová meta tsitaj̈anepanaejitsipatsi j̈anü itsa ponajü cumpleañojawabelia, itsafiestajawabelia Dioso apopejitsipaejawa?”, jamatabüjamü tsipae. Palebare Éxodo 32:1-8. J̈uakujinae pataema VIDEOJAWA, panetaekujinae panabarükuaikuaijamü tsane paliwaisibeje yabaraje:

VIDEOJAWA: Fiestajawanü Dioso tsitaabejetsi (5:07)

• ¿Dej̈uajitsia beyapütanetsi j̈ua Jehová tsitaj̈anepanatsi?

• ¿Debeitsitsi nej̈ata?

¿Depafiestakuene meta Dioso tsitaj̈anepanatsi?

• ¿Bajarapafiestajawa meta penajumetsünütsiliwaisijawawerena pitsapa Dioso Pejumeliwaisiwekua? Jaire j̈aniawaetsia bajarapaliwaisi neyapütaenej̈a.

• ¿Bajarapafiestakuene meta jiwi bitso yaiyataeyaej̈ana, yaiyataeyaej̈anabiabanua organizaciónkuene, símbolo patriokuene ata? Paj̈anü payaiyataniji Jehová daj̈itakujiruwekua, panajamatabükuenekopabajünua bajaraponüjawabelia pej̈anebinej̈a pibisiakuenejawanü panakuataje.

• ¿J̈ua meta bajarapamonae itsi tsabiabi fiestajawata Bibliabaj̈utojawata kueneitaweta? Bejumekowünütatsi Dioso Pejumeliwaisibaj̈uto wajaajamatabükueneliwaisij̈uirajibinej̈a.

5. Najamatabükuenesaüre itsamonae peyaiyataenej̈a j̈ua jumekowünütame

VIDEOJAWA: Yaiyataeya betsipaebatsi wajajumekowünütsiliwaisi (2:01)

Palebare Mateo 7:12, panelebikujinae panabarükuaikuaijamü tsane paliwaisibeje yabaraje:

• Pakuenia baja lebame, nijamonaejiwiyo Dioso pejumekowünütsijiwiyo fiestakuene itsa ej̈ana, ¿bekueneitawetame meta?

• ¿Depakuenia najamatabükueneitajütsipame niasiwajawa nijamonae, aponaponae atamü pafiestajawabelia ponabiaba?

6. Jehová jitsipa wajajamatabükuenebarüyajawa

Jehová tsitaj̈anepanatsi wajanajuabarüyajawa wajamonae, wajaamigowi ata. Palebare Eclesiastés 2:24, panelebikujinae panabarükuaikuaijamü tsane paliwaisi yabaraje:

• ¿Depakuenia nakayapütaeyaej̈ana bajarapaliwaisi Jehová wajanakatojitsipaejawa wajajamatabükuenebarüyanej̈a?

Jehová jitsipa pijajiwi barüyaya penajuajinawanapaejawa. Pataema VIDEOJAWA paneyapütaenej̈a pakuenia itsanakuapijiwi Jehová pijajiwi najamatabükueneitajüta piasiwajawa itsa nakaetuana.

VIDEOJAWA: Dioso pijajiwi daj̈itawirianakuapijiwi nayawenonabiaba (5:40)

Palebare Gálatas 6:10, panelebikujinae panabarükuaikuaijamü tsane paliwaisianü yabaraje:

• ¿Namatawenonatsi wajaitsinej̈a fiestakuene wajayawenonaenej̈a itsamonae?

• ¿Depakuenia berajutame regalokuene? ¿Fiestamatakabijawata meta, itsa jume, baja saya pakujinae jamatabürajutame itsakuenejawa?

• Itsa j̈amü j̈ainame nej̈i, ¿depapej̈aniakuene betoitsimü nej̈inej̈a? Itsajawata Jehová petotsipaebaponaewi itsi pej̈aniafiestajawanü pej̈inej̈a, itsajawatanua rajutabiaba regalokuene pej̈ijawabelia apoyapütaenejewa.

PALIWAISI BAJA YAPÜTANETSI

Jehová jitsipa wajanajuabarüyajawa wajamonae, wajaamigowi yajawa. Itsiata bajaraponü apojitsipae fiestajawabelia abeje wajanaponaejawa.

Najamatabünapire

• ¿Dej̈ua benayanijobatsi wajayapütaenej̈a pafiestakuenejawa Jehová tsitaabejetsi?

• Itsa najamatabükueneweretatsi wajaponaeyaniwa itsafiestajawabelia, ¿depakuenia meta beyapütaeyaej̈anatsi wajaamigowi, wajamonae atanua?

• Jehová jitsipa wajajamatabükuenebarüyajawa, ¿depakuenia yapütanetsi bajaraj̈ua?

YAPÜTAENAME ITSALIWAISI

Lebianame pafiestajawanü apoitsi tsabiabi pepo cristianowi.

“¿Dej̈uajitsia Jehová petotsipaebaponaewi apoitsi tsabiabi itsafiestajawanü?” (Ruka Internet-jawata jw.org)

Cuatro paliwaisibeje nakayapütaeyaej̈anaena pakuenia Jehová tsitaabejetsi cumpleañojawa.

“¿Dej̈uajitsia Jehová petotsipaebaponaewi apoitsi tsabiabi cumpleañojawa?” (Ruka Internet-jawata jw.org)

Taema pakuenia pejewaj̈i piasiwaj̈ae Jehová apoponae tsipae daj̈itafiestajawanüjawabelia pejamatabükuenebarüyayaej̈anaenej̈a Jehová.

Jehovánej̈a, j̈amü bitso namatamotame (11:35)

Pepo cristianowi apoitsitsabiabi Navidadjawa. ¿Jamatabükuenebarüyaya tsawanapae bajaraj̈ua apopeitsij̈ae?

“Pej̈aniakuene itsi tsabiabi” (Peyajiwitaebo, 1 de diciembre, 2012)