¿Maerapa Tumpa omaeño ikaviä vaere jare mbaeporara?

1. ¿Këraipa oyemboɨpɨ ikaviä vae?

lkaviä vae oyemboɨpɨ ɨvɨpe Satanás iyapu yave. Iyɨpɨ jaeko metei ángel ipɨakavi jare iñeerendu vae, ërei jaɨkue rupi mbaetɨma “oiko añete vae rupi” (Juan 8:44). Jae oipota adoración, Jehovápeño oñemee vae. Satanás ombotavɨ Eva, kuña tenondegua vae, oyeapɨsaka chupe yandeRu vaerägüe. Adán oiparavo oyapo Eva rami, mbaetɨ iñeerendu Jehovápe. Adán oiparavo vae güeru opaetepe mbaeporara jare mano. Emongeta Génesis 3:1-6, 19.

Satanás ombotavɨ Eva agüɨye oendu Tumpa vaerä, körai opüa yandeRu kotɨ, jare omokɨ̈reɨ ïru reta oyapo vaerä jae rami. Jae mbaetɨma oipota Jehová Juvicharä. Jeta yae omoïru Satanás jare mbaetɨ oipota oñeñono yandeRu ipope. Körai oyeapo Satanás kuae ɨvɨ juvicharä. Emongeta Juan 14:30 jare 1 Juan 5:19.

2. ¿Güɨnoira ikaviä vae Tumpa jembiapo?

Opaete mbaembae Jehová oyapo vae ikavi yaeko, mbaetɨ güɨnoi jese meteiave ikaviä vae. Adán, Eva jare ángel reta ipuereteï iñeerendu chupe jupi rupi kavi (Deuteronomio 32:4, 5). Jehová oeya yaiparavo yandeyeupe yayapota vae, yayapotara ikavi vae ani ikaviä vae. Yaiparavo vae rupi yaechauka yaaɨura Jehová. Emongeta Santiago 1:13-15 jare 1 Juan 5:3.

3. ¿Maerapa Tumpa omaeño mbaeporara?

¿Maerapa Jehová oeya vɨteri oñemopüa ikotɨ vae? Oechauka vaerä meteiave mburuvicha tëtaguasu pegua ipuere oyangareko kavi yanderé (Eclesiastés 7:29; 8:9). Kuae oasama 6.000 año jare oyeecha kaviko meteiave kuimbae reta igobierno ipuere oyopia ikaviä vae, imonda vae, ñeraro ani mbaerasɨ reta. Emongeta Eclesiastés 4:1 jare 2 Pedro 3:7-9.

Ërei, ñañeñono Tumpa ipope yave, yandemboyekou ikavigüere (Isaías 48:17, 18). Ɨmaäma, Jehová omboaita opaete gobierno ɨvɨ pegua vae. Oiparavo oñeñono yandeRu ipope vaeño opɨtata ɨvɨpe (Isaías 11:9). Emongeta Daniel 2:44.

Emae video ¿Maerapa Tumpa omaeño mbaeporara?

4. ¿Mbaepa yandepuere yayapo Tumpa ipɨaguasu ramo?

Satanás jei yande yaendu Tumpape ikavi yaveño yandeve. Tumpa ipɨaguasu ramo, yandepuere yaechauka yandereko rupi Satanás iyapuko jare yaiparavo Tumpa yandeRuvicharä, kuimbae vaerägüe. Emongeta Job 1:8-12 jare Proverbios 27:11.

5. ¿Këraipa yaechauka yaipota Tumpa yandeRuvicharä?

Yaechauka vaerä yaiparavo Tumpa yandeRuvicharä, yaekata jare yayapotako religión oporomboe vae Tumpa Iñee jei rami (Juan 4:23). Yaechauka vaerä yaipotaä Satanás yanderuvicharä yayapotako Jesús oyapo rami, jaeko mbaetɨ oike mbae política regua ani ñeraro regua. Emongeta Juan 18:36.

Satanás omokɨ̈reɨ tëtara reta jekokaviä vaerä. Yanderekokavi yave, ipuereko yande ïru jare tëtara reta yandeyóyai ani oyovaicho yande ndive (1 Pedro 4:3, 4). Kuae oasa yave ñañemoïrutako oaɨu Tumpa vae ndive jare yayapotako Iñee jei rami. Oime mbaemboavai yave yaendutako Tumpape, körai yaechaukata Satanás iyapu. Emongeta 1 Corintios 6:9, 10 jare 15:33.

Tumpa yanderaɨu yaeko, jaeramo yandepuere yarovia katu omboaita opaete mbae ikaviä vae jare mbaeporara. Opaete oechauka güɨrovia jese jare oñeñono ipope vae yogüɨreko aveita yerovia reve ɨvɨpe. Emongeta Juan 3:16.