Emboete Jehová ndero pegua ndive

Reechama kuae kuatiarɨru pe kërai Tumpa Iñee güɨnoi jeta arakuaa reta ipuere vaerä ndemborɨ jare ndero pegua reta ndive. Jehová oipota peiko yerovia reve. Javoi pemboete jare pembotenonde yave ‘omeeta peve opaete ïru mbaembae’ (Mateo 6:33). Tumpa oipota oiko neamigo rami. Jáeramo eyapo opaete mbaembae ndepuere rupi remboyerovia vaerä Jehová, jayaveko reya katuta jese. Jókuae reyapo yave ikavi ete yae ko ïru mbae reta güi (Mateo 22:37, 38).

1 EMOMƗ̈RATA NDEPOROGÜƗROVIA JEHOVÁRE

TUMPA IÑEE JEI VAE: “Jare che aikota peRurä, jare pe reta peikota cheraɨrä jare cherayɨrä. Jökorai jei yandeYa” (2 Corintios 6:18). Jehová oipota oiko metei amigo ikavi ete yae ndeve guarä, yerure rupi ndepuere reya katu jese. Echa Jehová oipota yayerure chupe, Iñeepe jei: “Peyerure avei pekueraimbae reve” (1 Tesalonicenses 5:17). Jae oipota nemiari ndemoambeko vae re jare ndepɨa iyɨvɨtepe renoi vae (Filipenses 4:6). Reyerure ndero pegua reta ndive yave jae reta oechatako añeteteko Jehová ndeve guarä.

Yerure rupi reyemongeta Tumpa ndive, ërei reyeapɨsakataviko. ¿Këraitara reyapo? Reyemboetako Iñeere jare kuatiarɨru reta re oñenoë Iñee güi vae (Salmo 1:1, 2). Eyepɨayemongeta reyemboe vae re (Salmo 77:11, 12). Ikavi yae ko reo yemboatɨa retape reyeapɨsaka vaerä Jehováre (Salmo 122:1-4).

Jehová regua nemiari ïru reta pe yave ndepuereta remomɨ̈rata neamistad jare ndeporogüɨrovia jese. Jökorai reyapo avei yave reeya katuta jese (Mateo 28:19, 20).

NDEPUERE REYAPO VAE:

• Ara ñavo ko reyerureta jare remongetata Iñee

• Emborɨ ndero pegua reta ombotenonde vaerä peyapo vae pemboete vaerä Jehová, yuvanga reta ani ïru mbae reta güi

2 YEROVIA REVE PEYEMBOATƗ PEYEMBOE VAERÄ

TUMPA IÑEE JEI VAE: “Peyemboya Tumpa re jare jae oyata peré” (Santiago 4:8). Eiparavo metei ara jare ora semanape, reyemboatɨ ndero pegua reta ndive peyemboe avei vaerä Tumpa Iñeere (Génesis 18:19). Ërei, jokuaeñoäko: nemaenduatako Jehová re opaete ara rupi jare remomɨ̈ratatako ndero pegua reta iporogüɨrovia Jehováre. Tumpa Iñee jei: ‘Pemiarita Jehová re peï pero pe yave, tape rupi peguata peiko yave, peyapakuata yave jare pepüa ye yave’ (Deuteronomio 6:6, 7). Jáeramo rerétako Josué jei rami: “Ërei che jare chero pegua reta ndive royeokuaita yandeYa peño” (Josué 24:15).

NDEPUERE REYAPO VAE:

• Renoitako mbaere remboe vaerä semana ñavo, jokuaérä remaeta mbaera ikavita ndero pegua reta metei tei rupi oyemboya reta vaerä Jehováre