¿Kiapako Tumpa?

1, 2. ¿Mbae marandupa ipuere yayapo yandeyeupe?

MICHIA reta güɨnoi avei jeta marandu. Omoësaka chupe yave, oparandu, “¿maerapa?” jare oyemboyevɨ chupe yave oparanduye, “ërei ¿maerapa?”.

² Yepetëi yandendechi ani taɨrusu opaetei ñanoi marandu reta. Ipuereko yaparandu yandeyeupe, mbaera yauta ani mbae yamondeta ani mbae yandepuere yagua vae. Ipuerevi ñanoi marandu reta ikaviete vae yanderekovere ani oasata vae. Ërei mbaetɨ yandepuere yamboyevɨ marandu reta yave, ipuereko mbaetɨ yaekaye.

3. ¿Maerapa jeta kia reta jei oväeä omboyevɨ vaerä marandu reta ikaviete vae?

³ ¿Omboyevɨpa Biblia marandu reta ikaviete ñanoi vae? Amogüe kia reta jei Biblia omboyevɨko, ërei jei reta yavai yaeko yaikuaa kavi vaerä. Ipuereko jei jaeño oporomboe vae reta ani religión ombotenonde vae reta oikuaa omboyevɨ vaerä. Ïru kia reta imara omombeu vaerä oikuaaä ramo. ¿Mbaepa rere?

4, 5. a) ¿Mbae marandu reta ikaviete vaepa renoi? b) ¿Maerapa jekuaeñota reeka mbaemboyevɨ reta?

⁴ Ipuereko reipota remboyevɨ marandu reta kuae rami: “¿Maerapa aï kuae ɨvɨpe? ¿Mbaepa oasata che ndive amano yave? ¿Këraipa Tumpa?”. Jesús, oporomboe ikavi yae vae, jei: “Peiporu mbae Tumpa pe, jare jae omeeta peve. Peeka, jare peväeta. Pembopu öke, jare öke oyepeata peve” (Mateo 7:7). Agüɨye ndekuéri, eeka reväe regua mbaemboyevɨ reta ikaviete vae.

⁵ Jekuaeño “reeka” yave, reväetako Bibliape mbaemboyevɨ reta (Proverbios 2:1-5). Kuae mbaemboyevɨ reta mbaetɨko yavai yaikuaa vaerä. Reikuaama yave reikota yerovia reve jare reärota kuri reiko avei vaerä. Yayemongeta metei marandure jeta kia reta ombojopa vae.

¿POCHƗRA TUMPA ANI OYEMOAMBEKORA YANDERÉ?

6. ¿Maerapa amogüe reta ipɨayemongeta Tumpa mbaetɨko oyemoambeko oiporara vae retare?

⁶ Jeta kia reta ipɨayemongeta Tumpa mbaetɨ oyemoambeko yanderé. Jae reta jei añetete Tumpa oyemoambeko yanderé yave, ngaraatëiko jökorai yaiko. Yaecha ñeraro, oporomotareɨ vae jare paravete opaete ɨvɨ rupi. Kia reta imbaerasɨ, oiporara jare omano. Amogüe reta oparandu iyeupe: “Tumpa oyemoambeko yanderé yave, ¿maerapa mbaetɨ omombɨta opaete mbaeporara?”.

7. a) ¿Këraipa religión ombotenonde vae reta omboe gente retape pochɨko Tumpa? b) ¿Këraipa yaikuaa kavi Tumpa mbaetɨ oyapo mbaesusere reta?

⁷ Religión ombotenonde vae reta ámope güɨroviaka chupe reta Tumpa pochɨko. Osusere yave, jae reta jei Tumpa oipotako kuae oasa. Jei reta Tumpako oipota oasa körai. Jökorai jei yave omboyako Tumpare, ërei Biblia yandemboe Tumpa mbaetɨiko oyapo mbae ikaviä vae. Santiago 1:13 pe jei yandeve Tumpa mbaetɨ oyapouka mbae ikaviä vae. Jei: “Kia nunga vae oñeväe mbaeyoa iparea pe yave, agüɨye toyemongeta Tumpa güi ko ou chupe jókuae. Echa Tumpa mbaetɨi ko oyapo ikavimbae, jare jae mbaetɨ vi kia pe oyapouka mbae ikavimbae”. Kuae oipota jei yepetëi Tumpa mbaetɨ omombɨta mbae ikaviä oasa oï vae, ërei jae mbaetɨiko oyapo (emongeta Job 34:10-12). Yaecha metei ñemojaanga.

8, 9. ¿Maerapa ikaviä yamboya Tumpare ñanoi yave mbaeavai reta? Eñono metei ñemojaanga.

⁸ Embojaanga metei taɨrusu okuakuaama vae oiko vɨteri tu reta ndive. Tu oaɨu yae, jare omboe oiparavo kërai oiko kavi vaerä. Jaɨkue rupi kuae taɨrusu iñeereenduä tu jei vae jare ojo jëtagüi. Jae oyapo jeta mbae ikaviä vae javoi güɨnoi mbaeavai reta. Tu mbaetɨ oyopia taɨ ojo yave jëtagüi. ¿Remboyapa ture taɨ oasa vaere? ¡Mbaetɨko! (Lucas 15:11-13). Kuae tu rami, Tumpa mbaetɨ oyopia kia reta oiparavo oyapo mbae ikaviä vae. Jáeramo mbae ikaviä vae oasa yave, ñanemaenduatako Tumpa mbaetɨiko oyapo jókuae. Mbaetɨko ikavi yamboya Tumpare.

⁹ Tumpa oikuaa kavi maera mbaetɨño omombɨta mbae ikaviä oasa oï vae. Yemboe 11 pe reyemboeta Biblia jei vae kuae regua. Ërei ndepuere reikuaa Tumpa yanderaɨuko jare jae mbaetɨiko oyapouka yandeve mbaeavai reta. Jaeñoko ipuere oñono kavi (Isaías 33:2).

10. ¿Maerapa yandepuere yaikuaa kavi Tumpa oñono kavita opaete jeko pochɨ rupi güɨrokomegua vae?

¹⁰ Tumpa iyoambaeko (Isaías 6:3). Opaete mbae oyapo vae jupiko, ikɨambae jare ikaviko. Jáeramo yandepuere yarovia jese. Kuimbae reta mbaetɨ jökorai. Jae reta ámope oyavɨko. Yepetëi mburuvicha oipota oyapo ikavi vae mbaetɨ güɨnoi mbaepuere oñono kavi vaerä opaete kia reta jeko pochɨ rupi güɨrokomegua vae. Mbaetɨ kia ave güɨnoi mbaepuere Tumpa rami. Jae ipuere jare oñono kavita opaete jeko pochɨ rupi güɨrokomegua vae. Jae omboaita opaete mbae ikavimbae vae jekuae avei pegua (emongeta Salmo 37:9-11).

¿KËRAIPA TUMPA IPƗA YAIPORARA YAVE?

11. ¿Këraipa Tumpa ipɨa yaiporara yave?

¹¹ ¿Këraipa Tumpa ipɨa oecha yave mbaesusere reta oasa ɨvɨpe jare nde reasa reï vae? Biblia yandemboe Tumpa “oaɨu isɨmbi” vae (Salmo 37:28). Jáeramo jae añetete oyemoambeko ikavi vae jare ikaviä vaere. Jae ipɨatɨtɨ yae yaiporara yave. Tumpa Iñee jei “ombopɨatɨtɨ” arakae oecha yave kuimbae reta imbaeyoa jeiete reteiño (Génesis 6:5, 6). Tumpa mbaetɨ oyepoepɨ (Malaquías 3:6). Biblia jei añeteteko Tumpa oyemoambeko yanderé (emongeta 1 Pedro 5:7).

12, 13. a) ¿Maerapa yaporoaɨu, jare këraipa ñaï yaecha yave mbaeporara reta oime ɨvɨpe vae? b) ¿Këraipa yandepuere yaikuaa Tumpa omboaita mbaeporara reta jare ikavimbae vae?

¹² Biblia jeivi Tumpa yandeapo jae rami (Génesis 1:26). Jókuae oipota jei Tumpa yandeapo jae jeko kavi rami. Reecha ipɨakavi vae reta oiporara ñogüɨnoi yave, ndepɨatɨtɨko, ërei ¡jasɨ yaeko Tumpape oecha yave mbaeporara reta! ¿Këraipa yaikuaa kuae regua?

¹³ Biblia yandemboe “Tumpa ko mboroaɨu” (1 Juan 4:8). Opaete Tumpa oyapo vae oyapoko mboroaɨu rupi. Jáeramo yaporoaɨu Tumpa oporoaɨu ramo. Eyepɨayemongeta kuaere: renoi yave mbaepuere, ¿remboaitara opaete mbaeporara jare ikaviä oime ɨvɨpe vae? Jökoraiko, echa reaɨu kia reta ramo. ¿Mbaepa rere Tumpa regua? Jae güɨnoi mbaepuere, jare yanderaɨu ramo, omboaita opaete mbaeporara reta jare ikaviä vae. ¡Ndepuere rerovia opaete Tumpa jei vae kuae ñeerɨru iyɨpɨpe oyapota! Jáeramo rerovia vaerä Tumpa jei vae, nde reikuaa kavitako Tumpa regua.

TUMPA OIPOTA REIKUAA JESEGUA

14. ¿Mbaepa Tumpa jee, jare maerapa ikavi yaiporu jee?

¹⁴ Reipota kia neamigorä yave, ¿tenonde mbaepa rere chupe? Remombeuko chupe nderee. ¿Güɨnoipa Tumpa jee? Jeta religión jei chupe Tumpa ani yandeRu, ërei kuae mbaetɨko Tumpa jee. Yae rami mburuvicha guasu. Echa mbaetɨ vɨteri yaikuaa jee. Tumpa omombeu yandeve jae jee Jehová. Salmo 83:18 jei: “¡Toikuaa reta nde [ree jaeko Jehová], ndeño ko jae Tuichagüe yae ete opaete ɨvɨ re vae!”. Biblia oikuatía vae reta oiporu jeta yae Tumpa jee. Jehová oipota nde reikuaa jee jare reiporuvi. Jae omombeu jee reiko vaerä iamigorä.

15. ¿Mbaepa oipota jei Jehová?

¹⁵ Tumpa jee, Jehová, tuicha yae jare ikavieteko. Oipota jei Tumpa oyapo opaete mbae jae jei vae jare oyapota jae oipota vae. Mbaetɨ mbae ave ipuere omombɨta. Jaeño Jehová ipuere oyembojee jökorai.a

16, 17. ¿Mbaepa oipota jei: a) “Imbaepuere yae ete vae”? b) “Mburuvicha guasu opambae vae”? c) “YandeApoa”?

¹⁶ Yamongeta rami, Salmo 83:18 jei Jehová regua: “Ndeño ko jae Tuichagüe yae ete”. Jaeramiñovi, Apocalipsis 15:3 jei: “Oreya Tumpa Imbaepuere yae ete vae, tuicha yae jare oremopɨakañɨ yae ko nderembiapo reta”. ¿Mbaepa oipota jei “Imbaepuere yae ete vae”? Kuae oipota jei mbaetɨ kia ave güɨnoi mbaepuere Tumpa rami. 1 Timoteo 1:17 pe, Jehová oñeenɨi “Mburuvicha guasu opambae vae”. Kuae ñee reta “Mburuvicha guasu opambae vae” oipota jei oiko avei vae. Salmo 90:2 omoësaka arakae güive jare arakae regua jekuaekuae avei rupi oiko. ¡Kuae yandembopɨakañɨ!

¹⁷ Jehováñoko jae yandeApoa. Apocalipsis 4:11 jei: “OreYa, jupi ko oñemee vaerä ndeve yemboetea, mbaemboete jare mbaepuere, echa nde reyapo opaete mbaembae, jare nderemimbota rupi opaete mbaembae oiko jare oyeapo”. Jökoraiko, ángel reta güive arape oï vae, yasɨtata reta, ɨvɨra ia reta jare mɨmba reta ɨguasupe oï vae, ¡Jehováko oyapo opaete mbaembae!

¿NDEPUEREPA REIKO JEHOVÁ IAMIGORÄ?

18. a) ¿Maerapa amogüe reta ipɨayemongeta ngaraaiko oiko Tumpa iamigorä? b) ¿Mbaepa jei Biblia kuae regua?

¹⁸ Kia reta omongeta Jehová jeko kavi retare, okɨɨye yae jare ipɨayemongeta, Tumpa imbaepuere yae, ikavieteko jare mombɨrɨ yaeko, ¿oyemoambekora cheré? Ërei, ¿oipotara Tumpa ñañemosiente jökorai? Mbaetɨko. Jehová oipota oiko köi yandegüi. Biblia jei Tumpa “mbaetɨ ko mombɨrɨ oï yandegüi” (Hechos 17:27). Tumpa oipota reyemboya jese, jare “jae oyata” nderé (Santiago 4:8).

19. a) ¿Këraipa ndepuere reiko Tumpa iamigorä? b) ¿Mbae teko kavi retapa Jehová regua ikavi ndeveguarä?

¹⁹ ¿Këraipa ndepuere reiko Tumpa iamigorä? Jesús jei: “Jare tekove opambae vae jae ko: Ndekuaa reta vaerä nde ko jae meteiño Tumpa añetete vae, jare che Jesucristo nde rembou vae” (Juan 17:3). Jekuaeño eyemboe, jayave reikuaa katutako Jehová jare Jesús regua. Javoi ndepuereta renoi tekove opambae vae. Yayemboema “Tumpa ko mboroaɨu” (1 Juan 4:16). Ërei jaenungavi güɨnoi ïru teko reta ikavi vae. Biblia jei yandeve Jehová jaeko “iporoparareko vae; iyarasɨ raivimbae, iporoparareko tuicha yae ete jare añetete vae” (Éxodo 34:6). Jehová ipɨakavi jare iñɨ̈ro vaeko (Salmo 86:5). Tumpa ipɨaguasu jare sɨmbiko (2 Pedro 3:9; Salmo 18:25). Biblia remongeta jesegua yave ndepuereta reikuaa kavi jeko reta ikavi vaere.

20-22. a) ¿Këraipa yandepuere yaya katu Tumpare yaechaä vae? b) ¿Mbaepa ndepuere reyapo ïru vae reta oipotaä yave reyemboe Bibliare?

²⁰ ¿Këraipa ndepuere reya katu Tumpare reechaä vae? (Juan 1:18; 4:24; 1 Timoteo 1:17). Remongeta yave Jehová regua Bibliape, reikuaatako metei kia añetete vae rami (Salmo 27:4; Romanos 1:20). Jekuaeño remongeta yave reaɨu yaetako Jehová, jare köi katu reïta chugüi.

²¹ Reikuaatavi Jehová jaeko yandeRu (Mateo 6:9). Jae omee yandeve tekove, jare oipotavi ñanoi tekove ikaviete vae. Jókuaeko metei tu iporoaɨu vae oipota taɨ reta peguarä (Salmo 36:9). Jökoraiko, Biblia oporomboe ndepuere reiko Jehová iamigorä (Santiago 2:23). Ikavi yaeko. ¡Jehová yandeApoa vae, oipota nde reiko iamigorä!

²² Amogüe reta ngaraa oipota reyemboe Tumpa Iñeere. Ipuereko oyemoambeko reipoepɨ ndereligión. Ërei agüɨye eeya kia ave tandeyopia reiko vaerä Jehová iamigorä. Jaeñoko ikaviete vae renoi vaerä neamigorä.

23, 24. a) ¿Maerapa jekuaeñota reparandu? b) ¿Mbaepa yayemboeta yemboe 2 pe?

²³ Reyemboe yave Bibliare, oimetako mbae mbaetɨ reikuaa kavi vae. Agüɨye nemara reparandu vaerä, eiporu yemborɨ. Jesús jei ñañemomichitako, michia reta rami (Mateo 18:2-4). Echa michia reta oyapo avei marandu reta. Tumpa oipota reväe mbaemboyevɨ reta. Jáeramo eyemboe kavi Bibliare reikuaa kavi vaerä reyemboe reï vae añeteteko (emongeta Hechos 17:11).

²⁴ Reyemboe Bibliare yave ikavieteko reikuaa kavi vaerä Jehová regua. Yemboe 2 pe, yaechata Biblia mbaetɨko oyepoepɨ ïru ñeerɨru retagüi.