YEMBOE 49
Kërai pa ndepuere reiko yerovia reve nerëtara ndive (parte 1)
Omenda ramo vae reta oipota yogüɨreko avei yerovia reve, jókuae ara omenda vae pe rami. Jae reta ipuere ko oyapo. Kuae oikuaa kavi cristiano reta ɨma ma omenda oiko vae jare oñemomɨ̈rata vae oyapo vaerä Biblia iyemboarakuaa reta jei rami.
1. ¿Mbae yemboarakuaa reta pa omee Biblia kuimbae omenda vae pe?
Jehová oyókuai omenda vae pe güɨroata vaerä jëta pegua reta (emongeta Efesios 5:23). Jare oipota oiparavo ikavi vae jëtara peguarä. Biblia omee kuae yemboarakuaa omenda vae reta pe: “Kuimbae reta toaɨu jembireko” (Efesios 5:25). ¿Kërai pa jókuae? Kuimbae oaɨu jembireko vae ipɨakavi jae ndive jëta pe jare ïru reta jovake. Oyangareko jese jare oñemomɨ̈rata agüɨye vaerä oata chupe mbaembae (1 Timoteo 5:8). Jare ombotenonde omborɨ jembireko omomɨ̈rata vaerä iporogüɨrovia (Mateo 4:4). Jáeramo, ipuere oyerure jare omongeta Biblia jae ndive. Kuimbae oyangareko yave jembireko re mboroaɨu reve, omomɨ̈rata iamistad Jehová ndive (emongeta 1 Pedro 3:7).
2. ¿Mbae yemboarakuaa reta pa omee Biblia kuña omenda vae pe?
Tumpa Iñee jei kuña omborespetata ko ime (Efesios 5:33). ¿Kërai pa ipuere oyapo jókuae? Ipuere oyemongeta ime jeko kavi reta re jare oñemomɨ̈rata vae oyangareko vaerä jese jare imichia reta re. Oechauka vi respeto ime pe omborɨ yave jae jei vae re, imiari jae ndive mboroaɨu reve jare oyemongeta kavi jese, yepe tëi jae mbaetɨ oyeokuai Jehová pe.
3. ¿Omenda vae reta kërai pa ipuere omomɨ̈rata imenda?
Biblia jei omenda vae reta peguarä: “mókoi reve toyogüɨreko metei ramiño” (Mateo 19:5). Kuae oipota jei aguɨyeta omaeño mbae ave ombosɨrɨuka oyougüi. Jáeramo omomora oguata päve reta jare omombeu Coyoupe omopiensa vae añetete rupi jare mboroaɨu reve. Jaenunga vi, mbaetɨ omaeño mbae ani kia ave má ikavi ete imenda ïru güi, ërei ombotenonde reta Jehová. Jare mókoi reve oyeandu katu agüɨye vaerä oñemoïru ete ïru kia ndive.
YAIKUAA KATU VAERÄ
Yaecha amogüe versículo reta ipuere vae omomɨ̈rata nemenda.
4. Kuimbae nemenda vae, eaɨu jare eyangareko nderembireko re
Biblia jei “kuimbae reta toaɨu jembireko, jae reta oyeaɨu rami” (Efesios 5:28, 29). ¿Kërai pa oyapo jókuae? Pemae VIDEO re jare peyemongeta jese:
¿Kërai pa ipuere kuimbae omenda vae oechauka mboroaɨu jare ipɨakavi jembireko pe?
Pemongeta Colosenses 3:12 jare peyemongeta jese:
¿Kërai pa ipuere kuimbae omenda vae oechauka kuae teko kavi reta imenda pe?
5. Kuña nemenda vae, eaɨu jare emborespeta neme
Biblia omboarakuaa tembireko pe omborespeta vaerä ime oyeokuai yave Jehová pe ani mbaetɨ. Pemongeta 1 Pedro 3:1, 2 jare peyemongeta jese:
Neme mbaetɨ oyeokuai yave Jehová pe, ërei nde reipota oipoepɨ jekove jare omboete Jehová. ¿Mbae pa má ikavi ndeve reyapo vaerä? ¿Remoërakua ñoi chupe, ani remborɨ ndereko kavi jare respeto rupi? ¿Maera pa reyemongeta körai?
Omenda vae reta ipuere oiparavo kavi päve. Ámope kuña ipuere ambuae yé oyemongeta. Jökorai yave, kuña omenda vae ipuere omombeu ime pe oyemongeta vae ipɨakatu jare respeto reve. Ërei imaenduata ko Jehová omee kuimbae pe mbaravɨkɨ oiparavo vaerä ikavi vae jëtara reta peguarä. Jare oipota kuña omborɨ ime oiparavo vae re. Jökorai yave yogüɨrekota yerovia reve jëta pe. Pemongeta 1 Pedro 3:3-5 jare peyemongeta jese:
¿Kërai pa oñemosiente Jehová oecha yave kuña omenda vae oechauka respeto ime pe?
6. Yandepuere ko ñañono kavi yemboavai reta menda pe
Opaete menda reta güɨnoi yemboavai. Jáeramo, omenda vae reta oyemborɨ päveta oñono kavi vaerä iyemboavai. Pemae VIDEO re jare peyemongeta jese:
¿Mbae yemboavai pa güɨnoi jókuae omenda vae reta video pegua?
¿Mbae pa oyapo reta omomɨ̈rata vaerä imenda?
Pemongeta 1 Corintios 10:24 jare Efesios 4:32. Pemongeta güire kuae versículo reta, peyemongeta jese:
¿Kërai pa oñemomɨ̈rata menda oyapo reta yave kuae yemboarakuaa?
Biblia jei yayomboete päve. Kuae oipota jei yaechaukata ko mboroaɨu jare respeto ñanemenda ïru pe. Pemongeta Romanos 12:10 (NTG) jare peyemongeta jese:
¿Ikavi ra reäro nemenda ïru räri ndemborespeta ani nde räri pa remborespetata? ¿Maera pa jökorai reyemongeta?
AMOGÜE RETA JEI VAE: “Ore mbaetɨ ma royerovia katu, romenda ramo yave rami”.
¿Kërai pa remoësakata chupe Biblia ipuere ko omborɨ?
YAYEMBOE MA VAE
Omenda vae reta ipuere oiko yerovia reve oechauka yave oyoupe mboroaɨu, respeto jare oyapo yave Biblia iyemboarakuaa reta jei rami.
Emoësaka
¿Kuimbae omenda vae kërai pa ipuere omborɨ oiko vaerä yerovia reve imenda pe?
¿Kuña omenda vae kërai pa ipuere omborɨ oiko vaerä yerovia reve imenda pe?
Nde remenda vae ko yave, ¿mbae versículo reta Biblia pegua ipuere ndemborɨ remomɨ̈rata vaerä nemenda?
EEKA KUAE
Descubra consejos prácticos que le ayudarán a disfrutar de su vida de familia.
Vea un video musical que destaca las bendiciones de seguir los consejos de Dios en el matrimonio.
Analice qué significa respetar la autoridad del esposo.
“¿Por qué debe la mujer respetar el principio de autoridad?” (La Atalaya, 15 de mayo de 2010)
Vea cuánto pueden ayudar los consejos de la Biblia a los matrimonios.