YEMBOE 57
¿Mbae pa oasata reyapo yave mbae ikaviä etei vae?
Yepe tëi nde reaɨu yae Jehová jare reñemomɨ̈rata agüɨye vaerä rembopɨatɨtɨ, ámope ipuere ko reyavɨ. Ërei oime amogüe mbaeyoa reta ikaviä etei vae (1 Corintios 6:9, 10). Nde reyapo yave mbaeyoa ikaviä etei vae, eñemomaendúa Jehová ngaraa ndereeya; jae oipota yae iñɨ̈ro ndeve jare ndemborɨ aveita.
1. ¿Mbae pa yayapota Jehová iñɨ̈ro vaerä yandeve?
Jehová oaɨu vae reta ipɨatɨtɨ yae oikuaa yave oyapo ko mbaeyoa ikaviä etei vae. Ërei Jehová ombopɨakatu jare jei jëta pegua reta pe: “Yepe tëi peyoa reta pɨ̈taasɨ yae, ërei amotïasɨta iroɨ rami” (Isaías 1:18). Yaipoepɨ yave ikaviä vae opaete yandepɨa ndive, Jehová iñɨ̈rota yandeve añetete rupi. ¿Mbae pa oipota jei yayepoepɨ vae? Kuae ko oipota jei yandembopɨatɨtɨ yae yayapo yave ikaviä vae, mbaetɨ ma yayapo jókuae jare yaiporu Jehová pe iñɨ̈ro vaerä yandeve. Jayave añetete ñañemomɨ̈rata yaipoepɨ vaerä yandeyemongeta, yaeya mbaembae reta oyavɨuka yande vae jare jekuaeño yayapo yanderekove pe Jehová jei vae (emongeta Isaías 55:6, 7).
2. Yandeyoa yave, ¿këraita pa Jehová yandemborɨ anciano reta rupi?
Kia oyapo mbaeyoa ikaviä etei vae, Jehová omee kuae yemboarakuaa: “Toenɨi oporogüɨrovia vae reta itenondegua reta” (emongeta Santiago 5:14, 15). Kuae kuimbae reta oyeparavo espíritu santo rupi, jae reta oaɨu Jehová jare jembiokuai reta, jáeramo ipuere yandemborɨ yaiko ye vaerä Tumpa iamigorä (Gálatas 6:1).
¿Këraita pa yandemborɨ anciano reta yayapo yave mbaeyoa ikaviä etei vae? Mókoi ani mboapɨ anciano reta yandemborɨta yaikuaa kavi Tumpa Iñee ndive yayapo vae ikaviä ko. Jaeramiño vi omeeta yandeve yemboarakuaa reta ikavigüe jare ñanemokɨ̈reɨta agüɨye vaerä yandeyoa ye. Metei kia oyapo yave mbaeyoa ikaviä etei vae jare oipotaä oipoepɨ jekove, anciano reta oekɨta congregación güi jökorai oyangareko hermano reta congregación pegua re.
YAIKUAA KATU VAERÄ
Eikuaa kavi jare eaɨu kërai Jehová yandemborɨ, yayapo yave mbaeyoa ikaviä etei vae.
3. Ñamombeu yandeyoa reta vae yandemborɨta ñaï kavi vaerä
Oipotagüe mbaeyoa yayapo vae ombopɨatɨtɨ Jehová, jáeramo ñamombeuta ko chupe. Pemongeta Salmo 32:1-5 jare peyemongeta jese:
¿Maera pa ikavi ete ñamombeu yandeyoa Jehová jare mbaetɨ ñañomi?
Yamombeu yave yandeyoa reta Jehová pe, jare yaiporu yemborɨ anciano reta jökorai yaiko yandepɨakatu reve. Pemae VIDEO re jare peyemongeta jese:
Canon oyerova ye vaerä Jehová kotɨ, ¿kërai pa omborɨ anciano reta?
Ikavi ete ko ñanemiari añetete rupi kavi anciano reta, echa jae reta ipuere yandemborɨ. Pemongeta Santiago 5:16 jare peyemongeta jese:
¿Rerovia pa ñanemiari añetete vae, ikavi ko jare mbaetɨ ko yavai anciano reta pe yandemborɨ vaerä? ¿Maera pa?
Emombeu ndeyoa añetete rupi kavi anciano reta pe jare eipɨɨ Jehová iyemborɨ omee ndeve mboroaɨu reve vae.
4. Jehová oiparareko iyoa vae reta
Metei kia oyapo yave mbaeyoa ikaviä etei vae jare oipotaä oyapo Jehová jei vae, anciano reta oekɨta congregación güi jare ngaraa ma ñañemoïru jae reta ndive. Pemongeta 1 Corintios 5:6, 11 jare peyemongeta jese:
Yaikuaa levadura opaete mbɨyape imbovúa ko, ¿rerovia pa omboavaita congregación ñañemoïru yave kia oyapo mbaeyoa vae ndive jare mbaetɨ oipoepɨ jeko? ¿Maera pa?
Anciano reta omomoe Jehová iporoparareko, oeka kia mbaetɨ ma congregación pe oiko vae jare omborɨ. Jeta oyerova ye congregación pe, echa yepe tëi Tumpa iporombosɨmbɨ jasɨ, ërei omborɨ oyerova ye vaerä (Salmo 141:5).
¿Kërai pa Jehová oechauka jupi ko, iporoparareko jare iporoaɨu oyapo mbaeyoa vae reta kotɨ?
5. Jehová iñɨ̈ro yandeve yaipoepɨ yave yandereko kavimbae
Jesús imiari ombojaanga reve yandemborɨ yaikuaa kavi vaerä kërai oñemosiente Jehová kia oipoepɨ yave jeko kavimbae. Pemongeta Lucas 15:1-7 jare peyemongeta jese:
Jesús ombojaanga vae, ¿mbae pa yandemboe Jehová re?
Pemongeta Ezequiel 33:11 jare peyemongeta jese:
Yaechauka vaerä yaipoepɨ yandereko kavimbae vae, ¿mbae pa yayapota?
Jehová vecha iyangarekoa rami ko, oyemoambeko ivecha reta re.
AMOGÜE RETA JEI VAE: “Akɨɨye chemiari anciano reta pe. Chemiari ayapo vae re yave, chereekɨta ko congregación güi”.
Oime kia jökorai oyemongeta yave, ¿mbae pa rereta chupe?
YAYEMBOE MA VAE
Yayapo yave mbaeyoa ikaviä etei vae ërei añetete yaipota yaipoepɨ jare ngaraa ma yayapo ye, Jehová iñɨ̈rota ko yandeve.
Emoësaka
¿Maera pa ikavi ñanemiari yandeyoa reta Jehová pe?
¿Mbae pa yayapota Jehová iñɨ̈ro vaerä yandeyoa reta re?
Yayapo yave mbaeyoa ikaviä etei vae, ¿maera pa yaekata yemborɨ anciano reta pe?
EEKA KUAE
Vea cómo un hombre se benefició de la misericordia de Jehová, descrita en Isaías 1:18.
¿Qué hacen los ancianos para tratar de ayudar a quien ha cometido un pecado grave?
A las personas que no se han arrepentido también se les muestra amor y misericordia. ¿De qué manera?
“Cómo se ayuda a los que han sido sacados de la congregación” (La Atalaya, agosto de 2024)
Descubra en la biografía “Necesitaba volver a Jehová” cómo un hombre sintió que Jehová lo estaba trayendo de nuevo a la verdad.
“La Biblia les cambió la vida” (La Atalaya, 1 de abril de 2012)