¿Mbovɨ testigo de Jehovápa reikuaa? Amogüe reta orepɨtegüi ipuereko oiko nderëtaɨpɨ rupi, ani jae ndeparavɨkɨ ïru ani ndeyemboerenda ïru; jare ipuereko ore romongetama nde ndive Bibliare. ¿Mbae nunga tëtarapa ore testigo de Jehová reta jare maerapa romongeta ïru reta ndive jókuae rogüɨrovia vaere?

Oreko oipotagüe ïru tëtara ramiño. Orepɨtepe oime kuimbae jare kuña opaete tëtaguasu pegua vae, iparavete jare oikokatu vae. Amogüe arakae oimeko güɨnoi ïru iporogüɨrovia vae jare oimeko ïru güɨroviambae Tumpare; ërei ndei roiko testigo de Jehová mbove, opaete ore roekɨ tiempo romongeta kavi vaerä Tumpa Iñeere (Hechos 17:11). Rogüɨrovia jókuae royemboe vaere jare jaɨkue rupi orei roiparavo romboete vaerä Jehová Tumpa.

Romaeño Tumpa Iñee oremborɨ. Ore royavɨ vi opaete rami, jare rogüɨnoi mbaeavai reta. Ërei, roñemomɨ̈rata royapo vaerä Tumpa Iñee jei vae ramo ikavi yae roiko karamboe vaegüi (Salmo 128:1, 2). Jaeramo romombeu opaetepe jókuae ikavigüe royemboe Tumpa Iñeere.

Roiko Tumpa Iñee jei rami. Ikavi yae vae Tumpa Iñee oporomboe vae oremborɨ roiko kavi jare royerovia vaerä. Jare oremokɨ̈reɨ vi romboete, orepɨajupi jare roaɨu orerapicha vaerä. Oremborɨ roikove katu jare royapo vaerä ikavi vae orerëtaɨpɨ peguape, royereraja kavi orerëtara ndive jare orerekokavi vaerä. Roikuaa kaviko “Tumpa mbaetɨ oporomboyoavɨ”, jaeramo roiko metei tëtara rami opaete tëtaguasu pegua ndive, mbaetɨ romotareɨ ïru tëtaguasu ani ambue ye jae reta yandegüi ramo. Yepetëi ore ïru tëtara ramiño, mbaetɨ oime ïru tëta yogüɨreko vae metei rami ore royogüɨreko rami (Hechos 4:13; 10:34, 35).

• ¿Mbaepepa ore testigo de Jehová rogua katu ïru reta ndive?

• ¿Mbaepa oremboe Tumpa Iñee?

Jeta kia reta oyemongeta testigo de Jehová reta jaeko religión ipɨau vae. Ërei, oasamako 2.700 año Tumpa añetete vae jembiókuai reta oyeenɨi testigo (Isaías 43:10-12, NM). Ndei yave 1931, royembojee Tumpa Iñeere oyemboe vae reta. ¿Maerapa roiparavo royembojee testigo de Jehová?

Oikuaauka kiapa oreYa ramo. Jehová Tumpa jee oimeko jeta yae Bibliape, körai oechauka tupapire ɨma pegua vae. Jeta Bibliagüi oyeekɨ kuae jee jare ipoepɨka oñeñono “yandeYa” ani “Tumpa”. Ërei, arakae Tumpa imiari yave Moisés ndive omombeu chupe jae jee Jehová, jei reve: “Kuae ko jae cheree jekuae avei pegua” (Éxodo 3:15). Körai jae oyemboyoavɨ opaete tumpa raanga ndive. Oreko royerovia yae royerenɨi testigos de Jehová ramo.

Oechauka mbae roipota royapo. Arakae Abel ara reta güivema oime jeta yae oechauka güɨrovia Jehováre. Ara reta oasa yave, Noé, Abrahán, Sara, Moisés, David jare ïru reta omombeuvi Jehová regua (Hebreos 11:4–12:1). Oime yave kia jekombae reve oñemondo juez jovai, oimetako oï kia imiari añetete vae jese, jökorai ore roiparavoma roipota romoërakua añetete vae Tumpare.

Royapo Jesús oyapo rami. Bibliape oyembojee Jesús “jekuaeño omombeu kavi añete vae Tumpa regua” (Apocalipsis 3:14, NTG). Jae etei jei oikuaaukagüe Tu jeere jare jei vi ou omombeu vaerä añete vae (Juan 17:26; 18:37). Jaeramo, jemimboe añetete vae reta oyekuaatako Jehová jeere jare omoërakuatako kuae jee. Ore opa roñomomɨ̈rata kuae royapo vaerä.

• ¿Maerapa roiparavo royembojee testigo de Jehová?

• ¿Kërai güivepa Jehová güɨnoi itestigo kuae ɨvɨpe?

• ¿Kiapako testigo de Jehová mbaetɨ oyovake vae?

Tumpa Iñee omombeu Cristo omano güire, jemimboe reta ipɨtepe oiketa iyapu oporomboe vae jeta mbaembae mbaetɨ ñogüɨnoi Tumpa Iñeepe vae (Hechos 20:29, 30). Jökorai etei oasa. Jae reta omboyoavɨ Jesús iporomboe omboyea rupi religión iyapu iporomboe ndive, jökorai oyemboɨpɨ religión cristiana añetegüe nunga vae (2 Timoteo 4:3, 4). Jayave ¿maerapa ore testigo de Jehová rogüɨrovia jësaka kavi oreve Tumpa Iñee oporomboe vae?

Oväe ara Jehová omoësaka vaerä añete vae. Tumpa oikuaauka ara iyapɨ reguape yemboe añetete vae okuakuaata vae (Daniel 12:4). Año 1870 pe, mbovɨ kia reta oeka ñogüɨnoi jësaka vaerä chupe reta añetete Tumpa Iñee oporomboe vae. Jayave oikatu oecha jeta iglesia reta iporomboe vae mbaetɨ ñogüɨnoi Tumpa Iñeepe. Jaeramo omboɨpɨ reta oyemboe Tumpa Iñeere oikuaa vaerä añete vae, jare Jehová omborɨ reta jësaka kavi vaerä Iñee oporomboe vae.

Kuimbae ipɨakavi vae reta oyemboe kavi Tumpa Iñeere. Ore hermano tenondegua vae reta, kɨ̈reɨ ngatu reve oyemboe Tumpa Iñeere, jökorai royapo roï añave. Omongeta metei Tumpa Iñee iyemboe omoësaka kavi regua ipuere vaerä oasa ïru yemboepe. Oväe Tumpa Iñee jei vae mbaetɨ jësaka vae yave oeka ïru versículo Tumpa Iñeepe omoësaka vaerä. Jare jësaka kavi chupe reta kuae yemboe yave, oikuatía reta. Jökorai jae reta oeya Tumpa Iñee etei omboesape yemboe japɨpe ñogüɨnoi vae reta. Jayave oväe añetete vae Tumpa jeere jare Irreinore, mbae jae oipota yandeve jare ɨvɨpe guarä, mbae oasa omano vae reta ndive jare oñemoingoveyeta vaere. Oyemboe kavi Tumpa Iñee vaere oeya mbaeapu reta jare teko ikaviä vae reta (Juan 8:31, 32).

Año 1879 pe jësaka kavi chupe reta oväema ara omoërakua vaerä añetete vaere opaete ɨvɨ rupi. Jókuae año güive oyapo reta revista La Atalaya. Anunciando el Reino de Jehová, oñemoaimoai vae vɨteri kuae ara rupi. Añave romoërakua roï añete Tumpa Iñee regua vae oasama 240 tëtaguasu reta jare 750 ñee retape. ¡Mbaetɨi vɨteri körai oñemoërakua añete vae regua opaete kerupi!

• ¿Mbae oasa Cristo omano güire?

• ¿Këraipa roväe Tumpa Iñee añetete oporomboe vae?

Ɨmama ore testigo de Jehová roiporu, roikuatía jare romee ïru retape jeta Biblia oyepoepɨ vae ïru ñee retape. Ërei, roecha oatako metei Biblia iyavaiä kia reta ipuere vaerä “oikuaa kavi añete vae”, Tumpako oipota opaete vae oikuaa jae (1 Timoteo 2:3, 4). Jaeramo, 1950pe royapo ñee ingléspe tembikuatía Mateo güive Apocalipsispe Biblia Traducción del Nuevo Mundo, jaeko tembikuatía arakae ete vae jei rami jare jendape kavi oï. Kuae añave oyepoepɨ oasama 130 ambuae ñee reta.

Oimetatëiko metei Tumpa Iñee iyavaiä yaikuaa kavi vaerä. Jeta ñee reta oyepoepɨ año oasa rupi, jare jeta Tumpa Iñee reta güɨnoi ñee reta arakae etema vae, mbaetɨma oyemongeta reta körai jare iyavai yaikuaa kavi vaerä. Ërei oñeväe tembikuatía arakae ete vae reta oyovake seri tenonde ete oyekuatía vae ndive. Kuae yandemborɨ yaikuaa katu vaerä hebreo, arameo jare griego ñee Tumpa Iñee regua.

Oimetatëiko oï Tumpa Iñee ikavi ete vae. Omboasa vae reta Tumpa Iñee ïru ñeepe ngaraa ipuere oikuatía Tumpa Iñeepe jeiä vae. Oimeta oikuatía tupapire jei rami etei, iyɨpɨpe oï rami vae. Ërei oime oï jeta Tumpa Iñee reta mbaetɨ oñeñono Tumpa jee vae, Jehová.

Oimetatëiko oï Tumpa Iñee omboete vae iApoape (2 Samuel 23:2). Traducción del Nuevo Mundo pe Tumpa jee oime oñeñono ye 7.000 vece rupi jenda oime oï vaepe tupapire oyekuatía arakae vae, ɨvɨ kotɨ oyeecha rami (Salmo 83:18). Kuae Tumpa Iñee Traducción del Nuevo Mundo oyembojee vae, jeta yaeko oyeyemboe jësaka kavi vaerä. Jayave, yandepuere yamongeta yerovia reve Tumpa iyemongeta reta jësaka kavi ramo. Yepetëi mbaetɨ renoi Traducción del Nuevo Mundo neñeepe, romokɨ̈reɨ reyepokuaa remongeta vaerä Tumpa Iñee ara ñavo (Josué 1:8; Salmo 1:2, 3).

• ¿Maerapa roipota oime Tumpa Iñee ipɨau vae?

• ¿Mbaepa oyepokuaata oyapo ara ñavo oeka Tumpa oipota oyeapo vae?