Testigo de Jehová itenondegua reta jepɨmbae reve oyapo iparavɨkɨ congregaciónpe. Cristo jemimboe reta congregación iyɨpɨ oyapo rami oñeñono kuimbae reta oyangareko vaerä jese reta (Hechos 20:28). Kuae anciano reta iporogüɨrovia tuicha yaeko oyapo opaete jendape kavi oyangareko vaerä congregaciónre. Kuae mbaetɨ oyapo reta iñateɨ reve, mbaetɨ omongana jupimbae vaeräño, jaeño ikɨ̈reɨ ngatu reve (1 Pedro 5:1-3). ¿Mbaepa oyapo oremborɨ vaerä?

Oyangareko oreré. Anciano reta Tumpa Iñee rupi omborɨ congregación oyapo vaerä opaete mbaembae sɨmbi rupi kavi jare iporogüɨrovia tuicha vaerä. Jae retako oikuaa kavi Tumpa omee oï chupe reta kuae tembiapo, jaeramo mbaetɨ oreókuai oreruvicha rami, ërei oipotatëi oremborɨ royerovia vaerä (2 Corintios 1:24). Metei vecha yangarekoa rami oyemoambeko avei vae jɨmba retare, anciano reta oyemoambeko oikuaa kavi vaerä Tumpa vecha reta (Proverbios 27:23).

Oremboe royapo katu vaerä Tumpa oipota vae. Semana ñavo, anciano reta ombotenonde congregación yemboatɨ reta, tuicha vaerä oreporogüɨrovia (Hechos 15:32). Kɨ̈reɨ ngatu reve kuae kuimbae reta ombotenonde omboe vaerä Tumpa Iñeere, omoërakua ore ndive jare oremborɨ roikuaa vaerä kërai orepuere royapo kavi kuae tembiapo.

Oremoäta ngatu opaete metei ñavo. Anciano reta oremborɨ opaete metei ñavo roï kavi vaerä Tumpa ndive, jaeramo opou orerëtape ani imiari ore ndive Salón del Reinope. Omongeta Tumpa Iñee ore ndive oremoäta ngatu jare orembopɨakatu vaerä (Santiago 5:14, 15).

Anciano reta mbaetɨ jembiapo congregaciónpeño, oime oï vi jeta anciano oparavɨkɨ jëtara oyangareko vaerä. Ikavitako ñamee yasoropai jae reta täta oparavɨkɨ ramo (1 Tesalonicenses 5:12, 13).

• ¿Këraipa anciano reta omborɨ congregación?

• ¿Këraipa oechauka oyemoambeko meteiteire congregaciónpe?

Tumpa Iñee jei oime oï kuimbae tenondegua reta jare ïru kuimbae oporomborɨ vae, siervo ministerial jee vae, jae reta mokoi reve oyangareko congregación jembiapore (Filipenses 1:1). Opaete congregación ñavo güɨnoi jókuae kuimbae reta rami. ¿Këraipa yandemborɨ siervo ministerial reta jembiapo?

Omborɨ anciano reta. Siervo ministerial reta, taɨrusu jare indechima vae, oï kavi Tumpa jóvai, ipuere oyeókuai jare oyapo kavi jembiapo. Jae reta oyapo jeta mbaembae congregaciónpe ipuere vaerä anciano reta oiporu kavi ara oyangareko kavi vaerä Tumpa imbae vae retare.

Omborɨ jeta mbaembae congregaciónpe. Oime siervo ministerial omborɨ kɨ̈reɨ reve ou oväe vae oreyemboatɨpe, oeka oguapɨ vaerä. Ïru omborɨ equipo de sonido ipu kavi vaerä, omee kuatiarɨru, oikuatía opaete congregación ogua vae, jare omee mapa oyekuaa vaerä ketɨ ketɨ rupi oñemoërakuata. Omborɨvi oñono kavi vaerä Salón del Reino jare hermano reta indechima vae anciano reta jei chupe rami. Oipotagüe tembiapo oñemee vae chupe reta kɨ̈reɨ ngatu reve oyapo ramo congregaciónpe opaete oyerovia jese reta (1 Timoteo 3:13).

Kuimbae reta täta iporogüɨrovia vae ñamojaanga vaerä. Oyeparavoko siervo ministerialrä hermano reta oyeechama oyapo oï vae jekovepe Tumpa Iñee jei rami. Omomɨ̈rata vi oreporogüɨrovia oyapo yave metei ñemoñee oreyemboatɨape; ikɨ̈reɨ ramo Tumpa Iñee omoërakua vaerä ore roipotavi royapo jökorai, jare omborɨ kavi ramo anciano reta pe ipuere yaiko yerovia reve metei ramiño (Efesios 4:16). Kuri yave, jae reta ipuereta oyeókuai ancianorä.

• ¿Këraipa siervo ministerial jeko reta?

• ¿Këraipa omborɨ siervo ministerial reta oyeapo kavi vaerä opaete mbaembae congregaciónpe?

Tumpa Iñeepe, Escrituras Griegas Cristianas jee vae, imiari yae Bernabé jare apóstol Pablore. Kuae anciano reta oyeókuai opou vaerä congregación retare arakae pegua. ¿Mbaepa omokɨ̈reɨ reta oyapo vaerä jökorai? Jae reta oaɨu jare oyemoambeko ramo hermano retare. Pablo jei oipota ojo ye opou hermano reta pɨri oikuaa vaerä kërai ñogüɨnoi. Yepetëi mombɨrɨ oguata, oyerovia oï omoäta ngatu ramo iporogüɨrovia (Hechos 15:36). Jae rami vi jökorai oyapo añave anciano opou vae congregación retare.

Ou oremokɨ̈reɨ vaerä. Kuae anciano opou 20 congregación reta rupi metei semana ramboeve, 6 yasɨ ñavo rupi. Jeta ikavi vae yandemboe jae reta oasa vaere, güɨramoi omenda vae, jembireko oasa vaere vi. Jae reta oipota oikuaa opaete hermano reta, taɨrusu jare indechi vae, ikɨ̈reɨ omoërakua jare omboe vaerä yande ndive yanderapicha Tumpa Iñeere. Kuae anciano opou vae congregación retare ojo ïru anciano ndive hermano reta jëtape omoäta ngatu vaerä; omee vi ñemoñee tuicha omokɨ̈reɨ vae yemboatɨpe jare yemboatɨ guasupe (Hechos 15:35).

Oyemoambeko opaetere. Kuae anciano opou vae congregación retare oyemoambeko congregación reta oiko kavi vaerä Tumpa ndive. Oyemboatɨ anciano reta jare siervo ministerial reta ndive oikuaauka vaerä chupe reta mbaepa oyapo kavi oï jare mbaepa ipuere oyapo reta jekuaeño oyapo kavi vaerä jembiapo. Omborɨ vi precursor reta oporomboe jendape kavi vaerä Tumpa Iñeere, jare oyerovia oikuaa oyemboe jare oyemboatɨ ramo ore ndive. Kuae hermano reta täta oparavɨkɨ yandemborɨ vaerä (2 Corintios 8:23). Ñamomoe iporogüɨrovia jare kërai jae reta yogüɨreko omboeteuka vaerä Tumpa (Hebreos 13:7).

• ¿Maerapa opou kuae anciano congregación retare?

• ¿Mbaepa reyapota ndemborɨ vaerä opou yave congregaciónpe?

Oime mbaesusere yave, ore testigo de Jehová ɨmambae romborɨ orehermano reta oata vaepe. Körai roechauka añetete royoaɨu vae (Juan 13:34, 35; 1 Juan 3:17, 18). ¿Këraipa romborɨ reta?

Romondo korepoti. Arakae Jesús jemimboe Antioquíaɨgua reta omondo korepoti hermano reta Judea peguape, echa oime karuai tuicha vae jókope (Hechos 11:27-30). Jökorai vi, roikuaa yave oime orehermano reta oasa oï mbaesuserere, congregación rupive romondo korepoti oñemee vae ogua vaerä mbaembae oata vae chupe reta (2 Corintios 8:13-15).

Romee chupe reta oata vae. Mbaesusere oasa yave, anciano reta oeka hermano icongregación pegua vae reta oecha vaerä jae kavipa ñogüɨnoi. Oime oï hermano reta oyeparavo vae omborɨ vaerä oime oasa mbaesusere yave, jae reta omee oï tembíu, ɨ, temimonde, jare omborɨ hermano reta oecha mbae oata oï vae chupe oporopoäno vaere, moä jare kiape yogüɨreko vaerä. Jeta testigo oyapo katu vae jókuae oñemee ojo omborɨ vaerä susere oasagüe vaepe, oñono kavi vaerä o reta ani Salón del Reino reta. Royogüɨreko metei rami jare royepokuaa roparavɨkɨ päve ramo, ɨmambae orepuere royomborɨ oata yave. Jökorai romborɨ oremoïru oreporogüɨrovia vae reta, ërei orepuere yave romborɨ vi ïru reta, oipotagüe religión pegua vaepe (Gálatas 6:10).

Romborɨ reta ipɨakatu jare omomɨ̈rata vaerä iporogüɨrovia. Oime kia mbaesusere oasa yave oipotatëiko yambopɨakatu. Körai yave yandeRu Jehová oporombopɨakatu vae, omomɨ̈ratata jae reta (2 Corintios 1:3, 4). Jaeramo, pɨakavi reve roechauka ikavi vae Tumpa Iñee omombeu vae ipɨatɨtɨ jare oyemoambeko vaepe. Jókope jei michiñoma oata Tumpa Irreino opa omboai vaerä yandembojasɨ vae jare yaiporara vae (Apocalipsis 21:4).

• ¿Maerapa ore testigo de Jehová ɨmambae romborɨ orehermano reta oime oï mbaesusere yave?

• ¿Këraipa rombopɨakatu Tumpa Iñee ndive tëtara isusere vae reta?

Ndei Jesús omano mbove, imiari Pedro, Santiago, Juan jare Andrés jae retaño jae ndive ñogüɨnoi yave. Omombeu këraita oyekuaa ara taɨkuegua vae jare oparanduvi ¿kiapa tembiókuai iyarakuaa vae oyapo iya jei chupe oyapo vaerä, jare iya oñono chupe oyangareko vaerä ïru jembiókuai reta, jare omee vaerä chupe reta jembiurä ara ñavo? (Mateo 24:3, 45, NTG; Marcos 13:3, 4). Jesúsko jae jókuae tembiókuai iya jare oyókuai chupe reta ara ñavo omongaru vaerä Tumpa Iñee reguare jemimboe reta ara taɨkuegua reta rupi. ¿Kiapa kuae tembiókuai?

Jaeko mbovɨ Jesús jemimboe reta oyeparavoma vae espíritu santo rupi. Kuae “tembiókuai” oyeparavoko mbovɨ Jesús jemimboe reta oyeparavo vae espíritu santo rupi ipɨtegüi, jae retako Cuerpo Gobernante de los Testigos de Jehová. Jae reta omee tembíu Tumpa Iñee regua ihora pe kavi iïru reta Jehová omboete vaepe. Tembiókuai iyarakuaa vae jaeño ipuere omee yanderembiurä ihora pe kavi (Lucas 12:42).

Oyangareko Tumpa congregaciónre (1 Timoteo 3:15). Jesús oeya kuae tembiókuai ipo pe oyangareko vaerä Jehová iorganización ɨvɨpe oï vae. Jókuae oipota jei oyangareko opaete mbaembae reta Jehová iorganización güɨnoi vae, ombotenonde Tumpa Iñee ñemoërakua jare yandeporomboe congregación rupi. Jaeramo, kuae “tembiókuai iyarakuaa vae” omee tembíu Tumpa Iñee regua orekuatiarɨru reta rupi roiporu vae romoërakua vaerä, jare oyeporomboe vae oreyemboatɨ jare oreyemboatɨ guasupe.

Yandepuereko yae kuae “tembiókuai” oyapo iya jei chupe oyapo vaerä, echa oyapo jaeño Tumpa Iñee jei rami vae jare omoërakua ñee ikavi vae. Iyarakuaa oyangareko katu ramo Cristo mbaembae reta güɨnoi kuae ɨvɨpe vae (Hechos 10: 42). Jehová omboyekou oï kuae tembiókuai jembiapo reta yaecha jökorai ombojeta yaema Testigo reta jare omee jeta mbaembae ñanemborɨ vae ñaï kavi vaerä Tumpa ndive (Isaías 60:22; 65:13).

• ¿Kiapa oñono Jesús omongaru vaerä jemimboe retape Tumpa Iñee regua?

• ¿Mbaerepa yandepuere yae kuae “tembiókuai” iyarakuaa jare oyapo iya jei chupe oyapo vaerä?

Apóstol reta iara rupigua, Jerusalénpe ñogüɨnoi apóstol jare anciano reta, jókogüi oyemboatɨ mbovɨ congregación tenondegua reta, omoësaka vaerä kërai oyeapo opaete mbae jéndape kavi. Jae reta imiari yave imiarima Jesús jemimboe reta oyeparavoma espíritu santo vae rupi jekoviape (Hechos 15:2). Oime vaerä metei rami jei vaepe jae reta oeka Jehová iespíritu omborɨ vaerä, jaeramo jekuaeño omongeta kavi Iñee (Hechos 15:25). Jökorai oyapovi kuimbae yemboatɨ ombotenonde vae Testigos de Jehová jembiapo jee vae Cuerpo Gobernante.

Tumpa oiporu reta oyapo vaerä ikavi jae oipota vae. Kuae hermano reta oyeparavo espíritu santo rupi jee vae Cuerpo Gobernante, oipotatëi oikuaa Tumpa Iñee jei vae, iyarakuaama oyapo kavi vaerä opaete sɨmbi rupi kavi jare jéndape kavi jare oikuaa katuma Tumpa Iñee regua. Semana ñavo oyemboatɨ oecha vaerä kërai ipuere omborɨ hermano opaete ɨvɨ rupigua reta. Apóstol iara reta rupigua oyeapo rami, jae reta omoësaka kërai ipuere oyeapo kavi jeta mbae Tumpa Iñee jei rami, jae reta oikuatía vae rupi congregaciónpe, anciano opou vae congregación rupi ani ïru hermano reta rupi. Jökorai omokɨ̈reɨ Tumpa jëtara oyemongeta jare oyapo vaerä metei ramiño opaete (Hechos 16:4, 5). Jae reta jetako oparavɨkɨ oyapo vaerä omomɨ̈ratata vae yandeporogüɨrovia, ombotenonde jare omokɨ̈reɨ oñemoërakua vaerä ñee ikavi vae Reino regua, jare oecha ipueretapa oime oï hermano reta oyangareko vaerä congregaciónre.

Oyereraja Tumpa iespíriture. Cuerpo Gobernante oeka Jehová jare Jesús, congregación iñäka vae, omborɨ vaerä jae reta (1 Corintios 11:3; Efesios 5:23). Kuae Cuerpo Gobernante mbaetɨetei oyemboiya Tumpa jëtara re. Jae retako yogüɨraja Jesús ndive kerupi ojoa rupi oyapo rami iïru reta oyeparavo vae espíritu santo rupi (Apocalipsis 14:4). Cuerpo Gobernante omee yandeve yasoropai yayerure yave Tumpape jese reta.

• ¿Kiapa congregación tenondegua reta apóstol iara rupigua?

• ¿Mbaepa oyapo oï Cuerpo Gobernante Tumpa omborɨ reta vaerä?

Ñee hebreope Betel oipota jei “Tumpa jëta” (Génesis 28:17, 19). Jaeramo ikavi oyembojee jökorai tëta reta testigo de Jehová oiporu vae opaete ɨvɨ rupi, echa jókogüi oyemborɨ jare oyembotenonde Tumpa Iñee oñemoërakua vaerä. Cuerpo Gobernante oparavɨkɨ oficina Nueva Yorkpe (Estados Unidos), oyangareko oyeapo kavi vaerä tembiapo reta opaete Betel ñogüɨnoia rupi. Jókogüi ombotenonde oyeapo vae tëtaraɨ ñavo, sucursal jee vae, ñogüɨnoi vae jeta tëtaguasu rupi. Hermano reta oparavɨkɨ jókope vae oyeenɨi tëtara Betel. Metei tëtara rami jae reta opaete reve okaru, oiko, oparavɨkɨ jare oyemboe Tumpa Iñeere (Salmo 133:1).

Jókope oyeókuai vae ipɨa jei reve oparavɨkɨ. Betel ñavope ñogüɨnoi hermano jare hermana iporogüɨrovia tuicha vae jare opa oiporu reta itiempo oyapo vaerä Jehová jemimbota jare ombotenonde Irreino (Mateo 6:33). Mbaetɨ mbaravɨkɨre oyemboepɨ, ërei opaetepe oñemee oiko vaerä, jou vaerä jare mbovɨmi korepoti ogua vaerä oata vaere. Metei ñavope oñemee jembiaporä: oime oparavɨkɨ vae oficinape, cocina ani comedorpe; ïru reta imprentape ani encuadernaciónpe; jare ïru oitɨo tëta, oyoe temimonde, omoï kavi edificio jare oime oyapo ïru mbaembae reta vae.

Opaete jókope oyeapo vae omborɨ oñemoërakua vaerä. Betel ñavopeko oyeparavɨkɨ Tumpa Iñee oporomboe vae oväe vaerä opaetepe. Kuae kuatiarɨru jókope oyeapo. Echa, Cuerpo Gobernante oikuatía, omondo traductor reta ñogüɨnoi vaepe opaete ɨvɨ rupi Internet rupi, jeta tëtaguasupe oime rogüɨnoi impresora jeta yae oparavɨkɨ vae, javoi oñemondo 110.000 congregación rupi. Tëtara Betel omborɨ opaete kuae mbaembae oyeapo vaerä, jökorai ombotenonde mbaravɨkɨ ikavi yae vae: oñemoërakua vaerä Tumpa Iñee ikavi vae (Marcos 13:10).

• ¿Kia retapa oyeókuai Betelpe jare mbaepa oñemee chupe reta?

• ¿Mbae mbaravɨkɨ ikavi yae vae ombotenonde tëtara Betel ñavo?

Tëtara Betel oparavɨkɨ jeta mbaembaepe omborɨ vaerä oñemoërakua Tumpa Iñeere metei ani jeta tëtaguasu retape. Oime oï oipoepɨ ïru ñeepe, omoimprime vae, omoencuaderna vae jare omojenda ñeerɨru reta vae. Oimevi oparavɨkɨ oyeapo vaerä audio jare video jare ïru mbaembae reta.

Metei Comité de Sucursal oyangareko oï oyeapo vaere. Cuerpo Gobernante oiparavo mboapɨ ani jeta ïru anciano reta oyangareko vaerä oyeapo vaere sucursal retape. Kuae comité oikuaauka kërai oime oï mbaravɨkɨ jëtaguasu ani ïru tëtaguasupe oyangareko vaere jare oime oï yave mbaeavai reta. Kuae omborɨ Cuerpo Gobernantepe oikuaa vaerä mbaembae regua imiarita orekuatiarɨrupe, oreyemboatɨpe jare ore yemboatɨ guasupe. Oime oï vi kia Cuerpo Gobernante jekoviape opou vae sucursal reta omborɨ vaerä Comité retape oyapo kavi vaerä jembiapo (Proverbios 11:14). Kuae opou ou yave oyeapo metei yemboatɨ guasu jókope kuae Cuerpo Gobernante jekoviape ou vae oyapo metei ñemoñee omokɨ̈reɨ vaerä hermano reta.

Oyemborɨ congregación retape. Sucursal retape oime oyeecha oï ipuere oï congregación ipɨau vae. Oyangarekovi oï precursor, misionero jare superintendente de circuito retare jare iterritorio jembiapore. Oyeecha kërai ipuere oyeapo kavi yemboatɨ guasu, kërai ipuere oyeapo katu Salón del Reino reta jare oñemondo orekuatiarɨru congregación retape. Opaete oyeapo vae metei sucursalpe oyeapo oyemborɨ vaerä oñemoërakua kavi vaerä Tumpa Iñeere (1 Corintios 14:33, 40).

• ¿Kërai omborɨ Comité de Sucursal reta Cuerpo Gobernantepe?

• ¿Mbaepa oyeapo metei sucursalpe?

Orepuere vaerä romoërakua ñee ikavi vae opaete tëtaguasu, ñemuña, ñee ambuae mbuae jare tëta reta pe, roipoepɨ oreñeerɨru 750 oasaye ñee retape (Apocalipsis 14:6). ¿Këraipa royapo kuae mbaravɨkɨ tuicha yae vae? Oime oï hermano reta opaete tëtaguasu pegua oikuatía vae ñeerɨru reta jare metei atɨ ipɨakavi reve ombopoepɨ ambuae ñee retape vae, opaeteko testigo de Jehová vae.

Ñeerɨru reta tenonde oyekuatía ingléspe. Cuerpo Gobernante ombotenonde tembiapo reta oyeapo vae Departamento de Redacciónpe. Oikuatía ñeerɨru vae reta oparavɨkɨ oficina centralpe jare ïru reta sucursalpe, jare Departamento de Redacción omee reta jembiaporä. Jeta tëtaguasu pegua oparavɨkɨ jae reta ndive ramo ñeerɨru reta imiari opaete mbaembaere jare ambuae mbuae teko retare. Jaeramo, kia reta opaete tëtaguasu pegua vae oipota yae oreñeerɨru reta.

Oyekuatiagüe oñemondo traductor retape. Opa oyekuatía yave tembikuatía oëta vae reta, oñemondo Internet rupi traductor retape ñogüɨnoi opaete ɨvɨ rupi vae. Javoi, omboɨpɨ oipoepɨ ïru ñeepe, oechaye jare oñono kavi ikaviä vae jare oñemondo imprentape. Traductor reta oyapo opaete ipuere vae oiparavo vaerä “jupi rupi kavi ñee reta añetete vae” oipoepɨ vaerä jendape kavi iñeepe ingléspe jei vae (Eclesiastés 12:10).

Computadora reta oremborɨ yaeko. Computadora ngaraa omboekovia oikuatía vae ani omotraduce vae. Ërei, omborɨ yae ipuere vaerä oyeapo tembiapo reta ɨmambae reve. Diccionario jare ïru programa reta computadorape oï vae omborɨ traductor oyemboe vaerä. Oimevi ïru programa ore testigo de Jehová royapo vae, jee vae MEPS. Kuae rupi jeta yae oyekuatía vae ambuae mbuae ñee retape ipuere oñeñono kavi ojo vaerä ñemojaanga ndive jare opa oyeapo güire oñemoimprime.

Ore royapo opa orepuere vae roupitɨ vaerä ïru ñee retape imiari vae, jetaä yepe imiari vae metei ñeepe. ¿Maerapa royapo jókuae? Jehová oipota “opaete vae oyemboasauka jare oikuaa kavi añete vae” ramo (1 Timoteo 2:3, 4).

• ¿Mbae mbaepa oyeapo oyekuatía vaerä oreñeerɨru reta?

• ¿Maerapa roipoepɨ ñeerɨru jeta ambuae mbuae ñee retape?

Año ñavo ore testigo de Jehová royapo jare romee jepɨmbae reve jeta yae Biblia jare ïru ñeerɨru reta jepɨmbae; royapo Salón del Reino jare sucursal reta jare royangareko jese; romborɨ jeta yae misionero jare betelita reta, jare oime mbaesusere yave romondo hermano reta oipotagüe oata vaere. ¿Kiagüira ronoë korepoti kuae reta romboepɨ vaerä?

Mbaetɨ royerure korepoti ani diezmore. Yepetëi jepɨ oyereraja vaerä ñee ikavi vae, mbaetɨ royerure korepotire tëtara retape. Oasama 100 año revista La Atalaya jeigüe vae Jehová oremborɨ vae jare ngaraa royerure korepotire ani kuimbae reta omborɨ vaerä. Jare jökoraieteko oyeapo (Mateo 10:8).

Oyemboepɨko kia reta omee vae ipɨa jei rupi. Jeta vae reta oyerovia oï romboe ramo tëtara reta Bibliare jare oremborɨ jae reta omee vae ndive. Orei romee yerovia reve orepɨ̈rata, oretiempo jare opa rogüɨnoi vae oyeapo vaerä Tumpa oipota vae opaete ɨvɨ rupi (1 Crónicas 29:9). Salón del Reinope jare yemboatɨ guasuape oime oï ipuere vaerä oipota vae omee ipɨape oï vae. Jare kuae yandepuerevi ñamee oresitio Internet rupi, jw.org. Jeta omee vae reta, oyovake kuña ime mano vae rami paravete yae vae ndive, Jesús imiari kavi jese oecha yave oñono mokoi reare korepoti jɨrupe (Lucas 21:1-4). Oipotagüe vae ipuere oñovatu omee vaerä ipɨa pe oñono vae (1 Corintios 16:2; 2 Corintios 9:7).

Rogüɨrovia katu Jehová omokɨ̈reɨta kia oipota omboete mbaembae güɨnoigüe pe vae, omborɨ vaerä oyekuaauka ñee ikavi vae jare körai oyeapo Jehová oipota vae (Proverbios 3:9).

• ¿Mbaepepa testigo de Jehová oyoavɨ ïru religión reta ndive?

• ¿Mbaepa oyeapo korepoti oñemee vaere?

Oreyemboatɨa retako jee Salón del Reino. ¿Maerapa? Echa jókope ore royemboe Tumpa Irreinore. Kuaereko Jesús imiari ñomai ou ɨvɨpe yave (Lucas 8:1).

Yamboete vaerä Tumpa añetete vae. Jókope oyeapo katu ketɨpa jare kërai romoërakua vaerä ñee ikavi vae (Mateo 24:14). Oimeko oï yemboatɨa michi jare tuicha vae, ërei opaete ikavi yae jare ipuereko meteipe oyemboatɨ jeta congregación reta. Arasa reta oasagüe vaepe, jeta yae yemboatɨa oyeapo (pandepo rupi ara ñavo) echa jeta yae oime oï congregación reta. ¿Këraipa royapo jókuae? (Mateo 19:26).

Oyeapo korepoti oñemee vae rupi. Oñemee vae reta oñemondo sucursalpe ipuere vaerä oyeapoye yemboatɨa ipɨau vae oata vaepe ani oñeñono kavi vaerä oimema vae.

Oyeapoko hermano reta omborɨ ramo. Jeta tëtaguasupe oime oï Yemboatɨ reta Oyapo vae Salón del Reino. Kuae hermano reta oyerova metei congregacióngüi ïrupe, yepetëi mombɨrɨ ñogüɨnoi, omborɨ vaerä hermano reta omopüa yemboatɨa imbae retarä. Ïru tëtaguasupe oyeparavo hermano jesegua yae vae reta ombotenonde jare oecha vaerä kiape oata oyeapo ani oyembopɨauye metei Salón del Reino. Jeta hermano oikuaa katu vae reta omborɨ oyeapo vaerä Salón del Reino jare jesegua yae vae omborɨvi jepɨmbae. Hermano reta oiporuta yemboatɨa vae oyapo opaete ipuere vae oyeapo vaerä yemboatɨa. Jehová iespíritu jare hermano reta oparavɨkɨ kɨ̈reɨ reve rupi kuae reta oyeapo (Salmo 127:1; Colosenses 3:23).

• ¿Maerapa rombojee Salón del Reino oreyemboatɨa reta?

• ¿Kërai royapo Salón del Reino opaete ɨvɨ rupi?

Opaete Salón del Reino de los Testigos de Jehová oime oï jese Tumpa jee, jaeramo yandeyemboatɨa ikɨambae aveitako jare oï kavitako. Ou oväe ara yaitɨo vaerä yave yayeroviatako ñaï, yandepuere yamborɨ. Echa köraiko vi romboete yae Jehová.

Yayemborɨ päve yaitɨo vaerä yemboatɨ opa güire. Yemboatɨ ñavo opa güire, hermano reta pɨakavi reve otupei jare oitɨo michi yemboatɨa jare metei ye semana ñavo oyeitɨo kavi. Metei anciano ani metei siervo ministerial ombotenonde kuae tembiapo, kuaerä oyekuatiama oyeapota vae: oyetupei jare oyeyoe piso; oñeñono kavi guapɨka reta; oyeyoe baño jare espejo; oyeekɨ ɨvɨtimbo ventana jare guapɨka retagüi; oñemombo ɨtɨ, jare oyetɨo vi ikatupe. Metei ye año ñavo oyeapo yeitɨo guasu. Oñemee yave michia retape jembiaporä ivevɨi vae omborɨ retata omboete vaerä yemboatɨa, echa jokopeko romboete Jehová (Eclesiastés 5:1).

Yamborɨtako oñeñono kavi vaerä. Arasa ñavo opa oyeecha Salón del Reino japɨpe rupi jare ikatupe rupi roikuaa vaerä mbae oata oyeapo ikavi oï vaerä, agüɨye jeta korepoti oyeporuiño (2 Crónicas 24:13; 34:10). Ikaviko yamboete Jehová yemboatɨa ikɨambae vae jare oñeñono kavi vaepe. Kuaerä yayerökuavee yamborɨ vaerä yave, yaechauka ñaï yaaɨu yae Jehová (Salmo 122:1). Jare, oiko Salón de Reino ɨpɨpe vae reta imaendúa kavita yanderé (2 Corintios 6:3).

• ¿Maerapa yayangarekota yandeyemboatɨare?

• ¿Mbae oyeapo Salón del Reino ikɨambae avei vaerä?

¿Reipotapa reikuaa katu Tumpa Iñee oporomboe vaere? ¿Reipotapa reikuaa katu arakae oasagüe, metei tëta, metei kuimbae ani kuña Biblia imiari vaere ani mbae oipota jei metei versículo? ¿Reparanduma ndeyeupe ipueretara Tumpa Iñee ndemborɨ remoamɨri vaerä metei mbaeavai renoi vae? Jökorai yave, ndepuere reiporu ñeerɨru ñeñovatuape Salón del Reino güɨnoi vae.

Ñeerɨru ñeñovatuape oime oï yandemborɨta vae yaikuaa katu vaerä. Ipuereko mbaetɨ renoi opaete ñeerɨru testigo de Jehová oyapo vae neñeepe. Ërei ñeerɨru ñeñovatuape Salón del Reino güɨnoi vae reväeta ñeerɨru reta ipɨau vae. Ipuerekovi oime oï jeta Biblia, diccionario jare ïru ñeerɨru reta. Ndepuereta reiporu ndei yemboatɨ oyemboɨpɨ mbove ani opa güire. Oime oï computadora yave, güɨramoi güɨnoi Watchtower Library, kuaepe oï jeta yae oretembikuatía reta jare iyavaiäko yaeka vaerä ñee, versículo ani oipotagüe yaipota yaikuaa vae.

Omborɨ oyemboe vae yemboatɨpe Vida y Ministerio Cristianos. Ndepuere reiporu ñeerɨru ñeñovatua Salón del Reinope reyapo kavi vaerä nderembiapo reta yemboatɨa peguarä. Vida y Ministerio ombotenonde vae jaeko iyangarekoa jare jae oechatako opaete ñeerɨru ipɨau vae oime vaerä jare oñeñono kavi vaerä. Jae ani ndemboe Tumpa Iñeere vae ipuere ndemborɨ reväe vaerä reipota reikuaa vae. Nemaenduatako agüɨye enoe Salóngüi ñeerɨru reta ñeerɨru ñeñovatua pegua vae, reyangarekotako jese jare agüɨye reikuatía jese.

Bibliape jei yaikuaatako “kërai ko Tumpa” yaeka yave “mbae jepɨ vae” rami (Proverbios 2:1-5). Ñeerɨru ñeñovatuape Salón del Reino güɨnoi vae ndepuereta remboɨpɨ reeka këraiko Tumpa.

• ¿Mbaepa oime güɨnoi Salón del Reino ñeerɨru ñeñovatuape?

• ¿Kiapa ipuere ndemborɨ reiporu vaerä ñeerɨru ñeñovatuape?

Jesucristo jei jemimboe retape: “Mechero omee yandeve tembipe. Jae ramiño vi pe reta peiko kavi ïru vae reta jovake, jae reta oikuaa vaerä pe reta peyapo ko ikavi vae. Echa jökorai yave, omboete retata peRu ara pe oï vae” (Mateo 5:16, NTG). Jokuaerä roiporu kavi mbae ipɨau oë vae, Internet rami. Sitio jw.org Internetpe vae rupi testigo de Jehová reta oechauka mbae oyapo vae jare mbae güɨrovia vae. ¿Mbae reväeta jókope?

Yemongeta Biblia pegua vae marandu reta peguarä. Jókope reväeta yemongeta marandu iyavai vae tëtara reta oipota yae oikuaa. Tupapire retape ¿Opatara mbaeporara? jare ¿Añetetera oikoveyeta omano vae reta? Ndepuere rembogueyɨ oresitio Internetgüi oime 600 oasaye ñee retape. Reväetavi Traducción del Nuevo Mundo 130 ñee reta iyapɨraa; jeta ñeerɨru yayemboe vaerä Bibliare, oimeko oï ¿Qué enseña realmente la Biblia?, jare revista La Atalaya jare ¡Despertad! ipɨau vae. Jeta kuae retagüi ndepuereta remongeta, reendu ani rembokuatiauka, echa oime oï MP3, PDF ani EPUB. Ndepuere remoimprime kuae tembikuatía reta omborɨta nderapicha iñee etepe vae. Oime oï jeta video iyapɨsaä vae peguarä, ndepuere rembogüeyɨ Tumpa Iñee omongeta vae, omombeu arakae oasagüe Biblia imiari vae oasa oï vae rami jare yemimbɨ ipöra vae reendu vaerä.

Omombeu jare oechauka mbae oyapo oï testigo de Jehová. Kuae sitio Internetpe oime oï noticia jare video oechauka kërai romoërakua Tumpa Iñeere opaete rupi vae, mbae roasa vae regua, jare ikavi vae royapo ore rapicharé vae. Jókope oimevi kiape jare kërai yave oyeapota yemboatɨ guasu reta jare kërai reikuatía vaerä sucursal retape.

Körai oñemoväe Tumpa Iñee tembipe mombɨrɨ katu kuae ɨvɨ vaepe, Antártida rami, jae reta ipuere vaerä oikuaa Jehová. Royerure “yandeYa iñee jekuaeño oñemoai vaerä” opaete ɨvɨ rupi oyemboete vaerä Tumpa (2 Tesalonicenses 3:1, NTG).

• ¿Këraipa jw.org omborɨ jeta yae vae oikuaa vaerä añetete Tumpa Iñee oporomboe vaere?

• ¿Mbaera reipota reeka oresitio Internetpe?