¿Mbae pa yandemboe Biblia ángel reta re?

Jehová oipota yaikuaa jëtara reta ara pe oiko vae. Tumpa jëta pe oime ángel reta, jae reta ko “Tumpa taɨ reta” (Génesis 6:2; Job 38:7). ¿Mbae pa yandemboe Biblia ángel reta re? ¿Mbae pa oyapo reta? ¿Opaete ángel reta Tumpa jëtara pa?

1. ¿Kia pa ko ángel reta?

Ndei oyapo mbove ɨvɨ, Jehová oyapo ángel reta. Jae rami, jae reta ko espíritu, yaechambae vae, jare oiko ara pe (Hebreos 1:14). Oime millones ángel reta jare metei ñavo ambueye (Apocalipsis 5:11). Jae reta oyapo Jehová “iporookuai reta vae” (Salmo 103:20). Arakae yave, Jehová ombou ángel reta omombeu vaerä iñee, omborɨ jare oepɨ jembiokuai reta. Añave rupi, ángel reta omborɨ cristiano reta oväe vaerä kia oipota oikuaa Tumpa re vae.

2. ¿Kia pa ko Aña guasu jare iaña reta?

Amogüe ángel reta mbaetɨ ma jupi Jehová kotɨ. Tenonde oñemopüa vae ko “aña guasu Satanás jee vae, jae ko ombotavɨ opaete ɨvɨ pegua reta vae” (Apocalipsis 12:9). Aña guasu oipota omogobierna ramo, ombotavɨ Adán jare Eva. Jare jaɨkue rupi omokɨ̈reɨ vi amogüe ángel reta oñemopüa vaerä Tumpa kotɨ. Kuae ángel reta ko aña reta. Jehová omombo ara güi ɨvɨ pe, jare kuri oyemboaita (emongeta Apocalipsis 12:9, 12).

3. ¿Kërai pa oipota yandembotavɨ Aña guasu jare iaña reta?

Aña guasu jare aña reta ombotavɨ kia reta espiritismo rupi. ¿Mbae pa ko espiritismo? Kuae ko kia reta oipota yave oyemongeta espíritu reta ndive. Kuae mbaetɨ ko ikavi. Amogüe kia reta omongeta horóscopo oikuaa vaerä maratuta kuri vae, ïru reta oeka yasɨtata re oyemboe vae, oyembosuerteuka vae, oecha oasata kuri vae, ipaye jare imbaekuaa vae. Amogüe kia reta oeka ipaye vae ombogüera vaerä espiritismo rupi. Aña guasu güɨroviauka kia reta ipuere ko oyemongeta omanogüe reta ndive. Ërei Jehová jei yandeve: “Agüɨye pekua imbaekuaa vae reta kotɨ ani mbae outa vae re omombeu vae reta kotɨ” (Levítico 19:31). Jae oipota yandeangareko Aña guasu jare iaña reta güi, jae reta ko jovaicho jare oipota marai yandeapo.

YAIKUAA KATU VAERÄ

4. Ángel reta omborɨ kia reta oikuaa vaerä Jehová

Tumpa iángel reta mbaetɨ ko omoërakua kia reta pe. Jae reta omborɨ Tumpa jembiokuai reta oväe vaerä kia oipota oikuaa Tumpa regua. Pemongeta Apocalipsis 14:6, 7 jare peyemongeta jese:

• ¿Maera pa ñamonecesita ángel reta yandemborɨ vaerä ñamoërakua yave?

• ¿Nemomɨ̈rata pa reikuaa yave ángel reta ndemborɨ reväe vaerä kia oipota oikuaa Biblia regua? ¿Maera pa?

5. Eröɨro espiritismo jare opaete mbae oyea aña reta ndive vae

Aña guasu jare aña reta Jehová jovaicho ko, jare yanderovaicho vi. Pemongeta Lucas 9:38-42 jare peyemongeta jese:

• ¿Mbae pa oyapo aña reta kia reta pe?

Agüɨyeta ko ñamaeño aña reta oï yande ndive. Pemongeta Deuteronomio 18:10-12 jare peyemongeta jese:

• ¿Kërai pa aña reta oipota yandereroata jare oyemongeta yande ndive? ¿Mbae aña jembiapo pa kia reta oyapo nde reiko vae pe?

• ¿Ikavi pa ndeve Tumpa jei vae agüɨye vaerä yayea aña reta imbae reta pe? ¿Maera pa?

Pemae VIDEO re jare peyemongeta jese:

VIDEO: “Opónganse al Diablo” (5:02)

• ¿Ikavi ra jókuae Palesa imembɨ ipo re güɨnoi vae? ¿Maera pa?

• ¿Mbae pa oyapo Palesa oyangareko vaerä iyé aña reta güi?

Cristiano reta añetete vae osɨrɨ ñoi aña reta güi. Pemongeta Hechos 19:19 jare 1 Corintios 10:21, jare peyemongeta jese:

• ¿Maera pa ikavi yamboai vaerä oipotagüe mbae oyea aña reta ndive vae?

6. Ñamoamɨri Aña guasu jare iaña reta

Aña guasu omogobierna aña reta. Ërei araɨgua tenondegua Miguel, kuae ko ïru tee Jesús güɨnoi vae, ombodirige ángel reta jupi vae. ¿Imbaepuere ra ko Miguel? Pemongeta Apocalipsis 12:7-9 jare peyemongeta jese:

• ¿Kia reta pa oyapɨraa imbaepuere pe: Miguel jare iángel reta, ani Satanás jare iaña reta?

• ¿Cristo jemimboe reta okɨɨye pa Aña guasu jare iaña reta güi?

Ndepuere vi remoamɨri Aña guasu jare iaña reta. Pemongeta Santiago 4:7 jare peyemongeta jese:

• ¿Kërai pa ndepuere reyangareko ndeyé Satanás jare aña reta güi?

YAYEMBOE MA VAE

Ángel reta jupi vae yandemborɨ. Aña guasu jare iaña reta jae ko Jehová jovaicho, jare oiporu mbaekuaa reta ombotavɨ vaerä kia reta.

Emoësaka

• ¿Mbae pa oyapo ángel reta jupi vae kia reta oikuaa vaerä Jehová?

• ¿Kia pa ko Aña guasu jare iaña reta?

• ¿Maera pa ikavi reyembosɨrɨ aña reta imbae güi?

EEKA KUAE

Compruebe por qué Jesús es el arcángel Miguel.

“¿Quién es el arcángel Miguel?” (Artículo de jw.org)

Lea qué pruebas hay de que el Diablo no es un simple símbolo del mal.

“¿Existe el Diablo?” (Artículo de jw.org)

Vea cómo una mujer se liberó de la influencia de los demonios.

“Halló propósito en la vida” (La Atalaya, 1 de julio de 1993)

Descubra cómo engaña Satanás a la gente con el ocultismo.

“La verdad acerca de la magia, la hechicería y la brujería” (¿Ha encontrado usted el camino a la vida eterna?, parte 5)