YEMBOE 35
Mbae pa yandemborɨta yaiparavo kavi vaerä
Metei ñavo yaiparavo mbae yayapota vae. Jókuae yaiparavota vae ipuere yandemborɨ yanderekove pe jare yandeamistad Jehová ndive. Ejemplo rami, yaiparavota ketɨ ra yaikota vae, mbae pe ra yaparavɨkɨta vae jare ñamendata ra ani mbaetɨ. Yaiparavo kavi yave, yandepuere yaiko yerovia reve jare yamboyerovia Jehová.
1. ¿Kërai pa Biblia ndemborɨta reiparavo kavi vaerä?
Ndei reiparavo mbove mbae reyapota vae, eyerure Jehová pe ndemborɨ vaerä. Jare emongeta Biblia reikuaa vaerä mbae pa oyemongeta Jehová (emongeta Proverbios 2:3-6). Ámope Jehová omombeu kavi mbae yayapota vae. Jökorai yave, neñeereenduta ko chupe.
Ërei, Biblia pe mbaetɨ yave mborookuai reiparavota vae re ¿mbae pa reyapota? Jehová ndemboeta “kërai reiko vaerä vae” (Isaías 48:17). ¿Kërai pa ndemboeta? Biblia yandemboe vae yandemborɨta. Oime versículo reta yandemboe yaikuaa vaerä Jehová omopiensa jare omosiente vae. Jókuae yaikuaa yamongeta yave Biblia pe metei kia oasa vae re. Yaikuaa yave Jehová omopiensa vae yandemborɨ yaiparavo kavi yamboyerovia vaerä.
2. ¿Mbae re pa ikavi remopiensa ndei reiparavo mbove?
Biblia jei “oyeandu reve kavi oiko vae, omae kavi kërai oiko vaerä” (Proverbios 14:15). Kuae yandemboe ndei yaiparavo mbove ñamopiensa kavi mbae ra yayapota. Ndei reiparavo mbove mbae reyapota, eparandu ndeyeupe: “¿Mbae versículo reta imiari kuae re? ¿Këraita ra añemosiente aiparavo yave kuae? ¿Omborɨta ra ïru reta aiparavota vae? Jare, aiparavo vae rupi, ¿amboyeroviata ra Jehová?” (Deuteronomio 32:29).
Tumpa oikuaa kavi mbae ikavi ani ikavimbae vae. Yaikuaa yave iporookuai jare omopiensa vae jare yaipota ñaneñeereendu, yandemborɨ ñanoi vaerä conciencia ikavi vae. Conciencia jae ko yandeyemongeta omombeu yandeve ikavi vae ani ikaviä vae (Romanos 2:14, 15). Yayemboe kavi yave yandeconciencia yandemborɨta yaiparavo kavi vaerä.
YAIKUAA KATU VAERÄ
Añave yayemboe kërai Biblia jei vae jare yandeconciencia yandemborɨ yaiparavo kavi vaerä.
3. Biblia tandereroata kavi
¿Kërai pa yandereroata Biblia jei vae yaiparavo kavi vaerä? Pemae VIDEO re jare peyemongeta jese:
¿Mbae pa omaeño Jehová yayapo vaerä?
¿Maera pa Jehová oeya yayapo vaerä mbae yaiparavo vae?
¿Mbae pa omee yandeve Tumpa yandemborɨ vaerä yaiparavo kavi?
Yaecha vaerä metei ejemplo Tumpa omopiensa vae, pemongeta Efesios 5:15, 16. Javoi peyemongeta kërai yandepuere yaiporu “kavi ara reta”...
... yamongeta vaerä Biblia ara ñavo.
... yaiko kavi vaerä menda pe, tu reta, taɨ jare tayɨ reta.
... yaja vaerä yemboatɨa congregación pe.
4. Emboe kavi ndeconciencia reiparavo kavi vaerä
Oime yave metei mborookuai Biblia pe mbae yayapota vae re, yandemborɨ yaiparavo kavi vaerä. Ërei ¿mbaetɨ oime yave? Pemae VIDEO re jare peyemongeta jese:
Video pe yaecha rami, ¿mbae pa oyapo hermana omboe vaerä iconciencia oiparavo kavi vaerä jare omboyerovia Jehová?
¿Yaparandu ra kia reta pe yayapota vae? Pemongeta Hebreos 5:14 jare peyemongeta jese:
Ámope yaipota yaeka kia jei yandeve mbae yayapo vaerä, ¿maera pa metei ñavo ko yandepuereta yamboyoavɨ ikavi vae ikavimbae vae güi?
¿Mbae pa ipuere yandemborɨ yamboe vaerä yandeconciencia jare yaiparavo kavi vaerä?
Yandeconciencia ko mapa rami, omombeu yandeve mbae jare kërai yayapo vaerä.
5. Emborespeta kia reta iconciencia
Echa opaete yayoavɨ, metei ñavo ko yaiparavo mbae yayapota vae. ¿Kërai pa yaechauka yamborespeta ïru reta iconciencia? Yaecha mókoi ejemplo reta.
Ejemplo 1: Metei hermana omomora omopïta jova vae oyakavo ïru congregación pe, jókope hermana reta mbaetɨ omomora oñemopïta.
Pemongeta Romanos 15:1 jare 1 Corintios 10:23, 24, jare peyemongeta jese:
Oechauka rami kuae versículo reta, ¿mbae ipuere oiparavo oyapo vaerä kuae hermana? Oime yave kia iconciencia mbaetɨ ikavi chupe reiparavo reyapota vae jare ndeve ikavi ¿mbae pa reyapota?
Ejemplo 2: Biblia jei yandepuere yau michi mii alcohol. Metei hermano oikuaa jókuae, ërei oiparavo agüɨye etei jou. Metei ara oparea chupe okaru vaerä, jare oecha hermano reta jou vino.
Pemongeta Eclesiastés 7:16 jare Romanos 14:1, 10, jare peyemongeta jese:
Kuae versículo reta jei rami, ¿mbae pa ipuere oyapo kuae hermano? Jare nde, ¿mbae pa reyapota kia oyapo vae mbaetɨ ikavi ndeconciencia pe vae?
¿Mbae pa reyapota reiparavo kavi vaerä reyapota vae?
1. Eyerure Jehová pe ndemborɨ vaerä reiparavo reyapota vae (Santiago 1:5).
2. Eeka yemboarakuaa reta Biblia pe jare tembikuatía reta pe reikuaa vaerä Tumpa omopiensa vae kuae regua. Jaenunga vi ndepuere reeka yemborɨ hermano reta täta iporogüɨrovia pe vae.
3. Eyepɨayemongeta oasata vae reiparavo vae rupi ndeconciencia re jare ïru reta iconciencia re.
AMOGÜE RETA JEI VAE: “Ndepuere ko reyapo reipota vae. ¡Agüɨye eyemoambeko ïru reta jei vae re!”.
¿Maera pa ikavi ko ñamopiensa Tumpa jare ïru reta omosiente vae?
YAYEMBOE MA VAE
Yaiparavo kavi yaeka yave Jehová omopiensa vae jare ikavi ko ñamopiensa yaiparavo vae yamborɨ ra ïru reta ani mbaetɨ.
Emoësaka
¿Kërai pa ndepuere reiparavo kavi Jehová omboyerovia vae?
¿Kërai pa ndepuere remboe ndeconciencia?
¿Kërai pa remborespeta ïru reta iconciencia?
EEKA KUAE
¿Cómo puede tomar decisiones que fortalezcan su amistad con Dios?
“Tomemos decisiones que honren a Dios” (La Atalaya, 15 de abril de 2011)
Comprenda mejor cómo nos aconseja Jehová.
Descubra qué le ayudó a un hombre a tomar una difícil decisión.
Vea con más detalle cómo complacer a Jehová cuando él no ha dado instrucciones específicas sobre un tema.
“¿Hace falta siempre un mandato bíblico?” (La Atalaya, 1 de diciembre de 2003)