YEMBOE 38
Ñamee yasoropai Jehová pe yanderekove re
Opaete vae yayerovia katu yanderekove re. Yepe tëi yaasa yave yemboavai reta rupi, yandepuere jekuaeño yayerovia mbaembae ipöra ñanoi vae re. ¿Kërai pa ñamee yasoropai Jehová pe yanderekove re? Jare ¿mbae pa ñanemokɨ̈reɨta ñamee vaerä yasoropai chupe?
1. ¿Maera pa yaaɨuta yanderekove?
Yaaɨuta ko yanderekove echa yandeRu Jehová, omee yandeve yanderaɨu ramo. Jae oyapo opaete mbaembae oikove vae reta (Salmo 36:9). “Echa jae ko omee yandeve tekove jare ñanepɨ̈túe, jare opaete mbaembae” (Hechos 17:25, 28). Jehová omee yandeve mbaembae ñamonecesita vae jekuaeño yaikove vaerä, jare yaiko vaerä yerovia katu reve (emongeta Hechos 14:17).
2. ¿Kërai pa yaechauka Jehová pe yaaɨu ko yanderekove?
Nderu reta ndeapo ramo ete yave, Jehová oyemoambeko ma nderé. Espíritu santo rupi, metei Tumpa jembiokuai, David jee vae, oyerure yave jei: “Nde chereecha ayeapo ramo etei yave” (Salmo 139:16). Jehová pe ikavi ete ko nderekove (emongeta Mateo 10:29-31). Jehová pe jasɨ yae kia oyuka yave japicha ani jae etei oyeyuka yave (Éxodo 20:13).a Jasɨ vi chupe yayangarekoä yave yanderekove re ani mbaetɨ yave yayangareko ïru reta jekove re. Yayangareko yave yanderekove re jare ïru reta jekove re, yaechauka ko yaaɨu tekove Tumpa omee yandeve vae.
YAIKUAA KATU VAERÄ
Yaecha kërai yandepuere ñamee yasoropai yanderekove re.
3. Eyangareko nderekove re
Cristiano reta omopromete Jehová pe oyapo vaerä jemimbota, jáeramo oiporu jekove jae oipota rami. Omee Tumpa pe opaete jete metei sacrificio rami, jáeramo oyangareko kavita jete re. Pemongeta Romanos 12:1, 2 jare peyemongeta jese:
¿Maera pa reyangarekota nderekove re?
¿Kërai pa reyapota jókuae?
4. Eyangareko ndeyé jare ïru reta re agüɨye vaerä oasa mbaesusere
Biblia yandemboarakuaa agüɨye vaerä yayapo mbae ikaviä yanderekove pe. Pemae VIDEO re jare peyemongeta kërai pepuere peyeangareko kavi peguataa jare peikoa rupi.
Pemongeta Proverbios 22:3 jare peyemongeta mbae pa ipuere oyapo metei kia oyangareko vaerä jekove re...
... jëta pe.
... iparavɨkɨa pe.
... oyuvangaa pe.
... omboguata yave iauto ani omboviaja yave.
5. Eyangareko sambiaɨ raɨ ndei vɨteri oa vae re
David oikuatía kërai Jehová oyemoambeko sambiaɨ jekove re yepe tëi ndei vɨteri oa. Pemongeta Salmo 139:13-17 jare peyemongeta jese:
Jehová peguarä, ¿kërai yave pa omboɨpɨ kia jekove: oa yave, ani ichɨ ipurúa ramo yave?
Jehová omee mborookuai israelita reta pe oyangareko vaerä kuña ipurúa vae jare imembɨ ndei oa vae: “Oñoraro vae reta oipɨaka yave metei kuña ipurúa vae, jare jókuae kuña imembɨ oa ndei oväe iara mbove, ërei mbaetɨ kia ave omano, jayave jókuae kuimbae tomboepɨ, kuña ime okovara chupe rupi, oporojäa vae reta jei rupi. Ërei oime kia omano yave, jókuae tekove tomboepɨ jekove pe” (Éxodo 21:22, 23, TNM). Emoësaka:
¿Kërai pa Jehová oecha kia oipotambae reve oyuka sambiaɨ ndei oa vae?
Jayave, ¿kërai pa oñemosiente Jehová kia oipota oyuka ramo sambiaɨ ndei oa vae?b
Jare, ¿kërai pa ndeve Tumpa omopiensa vae?
Metei kuña oaɨu tekove vae ipuere omopiensa mbaetɨ ye mbae ipuere oyapo, jaeño oyuka imembɨ. Pemongeta Isaías 41:10 jare peyemongeta jese:
Kia omokɨ̈reɨ yave kuña oyuka vaerä imembɨ, ¿kia pe pa oiporuta yemborɨ? ¿Maera pa?
AMOGÜE RETA JEI VAE: “Metei ñavo kuña reta ipuere oiparavo oyapota vae jete ndive”.
¿Maera pa rerovia katu Jehová oaɨu kuña jekove jare oaɨu vi imembɨ jɨe pe güɨnoi vae?
YAYEMBOE MA VAE
Tekove jae ko mbae ikavi ete Jehová omee yandeve vae. Biblia yandemboe yamborespeta, yayangareko jare yaaɨu vaerä yanderekove jare ïru reta jekove.
Emoësaka
¿Kërai pa yaikuaa Jehová oaɨu yanderekove?
¿Kërai pa oñemosiente Jehová kia oipota ramo oyeyuka ani oyuka japicha?
¿Mbae pa má ikavi ndeve tekove Tumpa omee ndeve vae güi?
EEKA KUAE
¿Cómo le podemos dar gracias a Jehová por el regalo de la vida?
¿Puede Dios perdonar a una mujer que haya decidido abortar en el pasado?
Vea qué relación hay entre el punto de vista de Dios sobre la vida y nuestras diversiones.
“¿Se justifica la participación en los deportes de riesgo?” (¡Despertad!, 8 de octubre de 2000)
¿Y si una persona ha pensado en suicidarse? Descubra los consejos que da la Biblia.
“¿Puede ayudarme la Biblia si ya no quiero vivir y he pensado en suicidarme?” (Artículo de jw.org)
a Jehová oyemoambeko yae ipɨatɨtɨ vae reta re (Salmo 34:18). Jehová oikuaa kavi kia oiporara ñogüɨnoi jare maera oipota oyeyuka. Jae oipota omborɨ kia oñemosiente jökorai vae. Emongeta kërai ipuere ndemborɨ kuae artículo “¿Puede ayudarme la Biblia si ya no quiero vivir y he pensado en suicidarme?”, kuae yemboe pe reväeta sección “Eeka kuae” jókope oime kuae artículo.
b Kia imembɨ okua oipota ramo ndei oikuaa mbove Tumpa jei vae yave agüɨye toiporara jókuae teko re; Jehová oipota iñɨ̈ro chupe. Reikuaa katu vaerä kuae regua emongeta artículo “¿Qué dice la Biblia sobre el aborto?”, kuae yemboe pe reväeta sección “Eeka kuae” jóko pe oime kuae artículo.