KUSRENANIK 30

Rahab trupatø ashipelan sørik køn

Israelitasmera trupatø ashipelø Jericósrø pua, Rahab munchi taik yausrø køtrømisrik køn, inchen Jericósrik rey wam mørape suldaumera ørik køn Rahabwai yausrømay. Rahabpe nømune ya pala trupinkarua yupe mukaakøn cha peeksrø lantrap ampay taik køn. Nøpe trupatø ashipelan trentaik køn: “Ñimun purukuntrap isur kaken Tius ñimpa pasran, ik pirø ñimuin køntrap køn tiusmanta nai yawelan purømisrtruntrikay cha”.

Trupatø ashchap ampupeløpe Rahabwan trentaik køn: “Ñui ya pentanayu kan tsi pikikwan licha mesrøpene yampu putrapelan chikucha puraimøntrun øyamay ka øsik wepamtrun cha”.

Rahabwai ya pentanayu pikø tsi lusrik tøkaik ka pasraik køn pøtøkatan sruk pantrikmera chap køtrinkucha

Rahabpe trupatø ashipelan kan tsitrawa nui pentanapurap pinøkucha Jericósrønkutri wepamtrain purukuik køn. Truyukutrimpe trupatø ashchap amtrupeløpe tunsrø pøn kualømkatik trupa waraik køn Josuéwaisrømay amtraptø. Trukutrimpe israelitasmerape Jordán piyu chap latraampa Jericó ciudawan nømuyasik kanawa kekøtrøntrap tamarøp mentik køn, kakentø ik ciudawanmetrik kanawa kekøtrøntrai Jeupa tranikkutri. Jeupape israelitasmeran øyeek karuik køn: ciuda pøtøkatan kan kualømyu kan piejetø llirantrai, trattrø kan kualømkatik, inchen trattrø pa kualøm køntrapsrømpe siete piejeskatik ciuda pøtøkatan llirapen, sacerdotesmerape trompetaswan latrø mur utren, trukekøtø suldaumera, israelitasmerakucha latrø mur trashipen Jericósrø nøtrø sruk pantrikmerape chishtø køtrik køn. Rahabwai ya tru sruk pantrikmerai ututøka pasrainkucha peñmuikkutri Rahabpa nui yaweløpa kuamuik køn kakentø nømpe Jeupawan kørewa pøntraikkutri.

“Katø treetøwein kuig køn, ¿tru Rahab, [...] tru maig køtasha asha wam sruamrrunrrab ambubelan nøbe ya pebamba, katøgan peg maywan amrrai eshkamba, øyeeg tabig marikkurri nune chi kaig kømíig lataig tabig kørrømarig kømuitarru?” (Santiago 2:25).