Gedeónpe madianitasmerapa kuayainuk kanaik køn

Yanayutø israelitasmerape katøken Jeupawan wentøpasra, pek tiusmeran adorap mentik køn. Siete pilamera ørøpa madianitasmerape israelitasmerai ushameran nilap nømui ellmarilan mintishipen, israelitasmerape nømun kalø marmøntrai tunmerasrø, peña trapsrø trupapelø kuik køn. Treekkutri, israelitasmerape Jeupawan katø purukutra cha miapen, Jeupape kan ángelwan øra matsinø Gedeón taikwan trentaik køn: “Jeupa ñun wesrun, kan tap suldau køntrain cha”. Nøpe trentaik køn: “Nape chikucha kømuikkutri israelitasmeran purømisrtrap kaimamøntrun cha”.

Gedeón nun cierton Jeupa lawa wesruik kui nepua ashchap, ¿chi marik kø? Kan isi pitin pirau tratra Jeupawan trentaik køn: “Srøna løtsø ik isipe søik incha pirøpe pur kualmapene nepua asamøntrun ñi nan lawa wersuik kui”. Inchen katø kualømpe isipe latrø søik pirøpe latrø pur kualmapen, katøle trencha miaik køn, tru isipe pur inchen pirø latrø søik kualmantrain cha. Jeupa Gedeón maik miaikwan katøyu treek marik køn. Gedeónpe Jeupa nun lawa wesruik kui nepua ashape, nui suldaumeran tamarøp mentik køn madianitasmerapa kuayantrap.

Jeupa Gedeónwan trentaik køn: “Israelitasmera kanantrai maramøntrun. Inchentø suldaumera nu kuikkutri, ñimtø kanaitamap isumøntrai, kørik kui pøntrapelan nømui yamay amtray eshkantrik cha”. Inchawai 22.000 møkelø ampen 10.000 køtrømisrik køn. inchen Jeupa trentaik køn: “Katøkucha nu køn, pisusrø pera ya pi mutsinkaru, incha pi muchipelantø wesruntrik cha, inchentø ashiptø køntrikay ñimun tsalø ashipelø amtrumøtashchap”. 300 møkeløtø purø ashiptø pi muchipen, Jeupa trentaik køn: “Tru ik lamø søtøpape ñimpe 135.000 madianitasmeran kanantrun cha”.

Tru yem Jeupape Gedeónwan trentaik køn: “Madianitasmeran melampuntrap ampamik pun cha”. Gedeónpe nui suldaumeran kikulmera tranøp, køtsømeran nak pilapeløpa trana trentaik køn: “Na maik maren trektøwai martrikay cha”. Gedeónpe kikulwan utra køtsøn pusha nak pilapikwan kønisha mur trasaik køn: “¡Jeupawaimpa Gedeónwaimpa espada cha!”. 300 møkeløpe trektøwai maren, madianitasmerape kørik kui møra, mumayken kømui chukøpen luløp menta, nømasiktøwai kuetsiyap mentik køn. Katøyu Jeupape israelitasmeran nømui tsalø ashipelan kanantrai marik køn.