Israel pirøwane par køntrai pirisaik køn

Salomón Jeupawan adorap pasraikkutri, Israel piraupe pishintø waramtik kuik køn. Inchen yanayupe Salomón pek pirausrø ishumpurmerapa kasharaikkutri, katøkan tiusmeran adorap mentik køn. Treekkutri, Jeupa namik trentaik køn: “Israel pirøwan aship karup waikwan ñui yawelan ketrawa, par køntrai pirisha ñui karuintik mekapikwan más nuikwan trana, ñui yaweløpe lamø pirøyutø aship karup køntrun cha”.

Nø maik taikwan tør martrap Jeupa øyeek marik køn: Salomónwai karuintik mekapik Jeroboán munchi taik, Tiuswaiwan eshkapik Ahíyapa asikyawape, Ahíya nui kewa kuikwan wesrua, doce pitismera kølsra, Jeroboánwan trentaik køn: “Jeupape Israelsrø Salomónwai yawelø aship karup kuikwan ketrawa, par køntrai pirishintrap køn cha. Kewa kuikwan diez pitis kølsraikwan utøtra, kakentø diez tribuswan ñi aship karup wantrapik køn cha”. Salomón wammøra, Jeroboánwan kuetchap isupen, nøpe Egiptosrømay welula yaik køn. Yanasrø Salomón kuapen nui nusrkai Rehoboam aship karup wamisren, Jeroboánpe Israel pirausrømay katøle atrik køn.

Israelsrø metrap aship pøntrapelø køllik misakmera Rehoboamwan trentaik køn: “Ñi misakmeran tammay køpene, nømpe ñun møra martrun cha”. Inchen nui linchipelø urektø misakmerape trentaik køn: “Ñiken más mur kualin karu cha”. Inchen Rehoboampe nømun møra marikkutri, misakmeran namik karup mentik køn. Inchawai Israelsrø misakmerape Jeroboánwan diez tribuswan aship karup wantrai wesrua pasrik køn. Diez tribuswan aship karup waikwan Israel cha wamøpen, pa tribuswan aship karup waikwane Judá cha waminuk Rehoboam aship karup waik køn. Øyamay doce tribuswan par køntrai pirisaik køn.

Jerusalénpe Rehoboam karup wainuk pasraikkutri, Jeroboánpe nui misakmera trusrø Jeupawan adorantrap ammøntrai isuik køn, kakentø nun wentøpasra Rehoboamwan møra martraitamap. Treekkutri, pakatø wara urekmera orotøka mara pønsra, misakmeran trentaik køn: “Jerusalénpe purø yap pasran, yu køtrømisray wara urekwan adorap”. Inchawai, Israel misakmerape katøle Jeupawan pesannaik køn.