Piudai nusrkawan katøle øsiranik køn

Latrø mur kuarø køpen Jeupape Elíaswan trentaik køn: “Sareptasrømay intrø, truyupe kan piuda ñun mamik srøttrun cha”. Inchen tru ciuda yaskap pulu pupen, Elíaspe kan latrø waacha piudan trar tuliship pasraik ashape, pi pasopa, kan pitrin pitipa miapen piudape trentaik køn: “Nape pitrimpe chikaa kur, inchawai ñune chikucha trantrap kaimamøntrun, kakentø harinapa aceitepatø tøkakur naimpa, nai nusrkawainpatø maramik”. Inchen Elíaspe trentaik køn: “Ñi nan kan pitrin piti mara srøtrene, aceitepa harinapa manaken palømøntrai Jeupape trantrap misran cha”.

Inchawai piudape nui yamay ya, Elíaswan kan pitrin piti mara srøtrikkutri, piudapa nui nusrkaimpa latrø mur kuarø utu chu urastøkucha mamik tøkakuik køn, kakentø Jeupape tru harinapa aceitepa manaken patsømøntrun taikkutri.

Inchentø latrø mur kualøm purayaik køn, kakentø tru piudai nusrkai latrø mur kuantrø tsua kuapen, usrimpe Elíaswan purukutra cha miapen, Elíaspe usrai taskukutri unan muta, pala piesasrømay sruaya, kamayu tratra Jeupawan miaik køn: “Katøle unan øsik kømikwan trantra cha”. Jeupa øyeek marikpe kuara asamtik kuik køn, kakentø tru uraspe kan kuapikwan katøle øsiranik kømuikkutri, trektøwai piudapa nui nusrkaimpa israelitasmera kømuikkutri.

Inchen unøpe katøle øsirapen, Elíaspe piudan trentaik køn: “Ash, ñui unøpe katøle øsiran cha”. Inchen usrimpe latrø kasrak Elíaswan trentaik køn: “Møimpe si tør nepua ashar ñipa, ñi wamintiløpa Jeupawainukkutri atrupik kui, kakentø ñi maik taikpe treek puikkutri”.