Jerusalénsrø nøtrø sruk pantrikmera

Nehemías kan israelita Persia pirau Susasrø tsupik, rey Artajerjeswai karuintik mekapik kuik køn. Kan kualøm Nehemíaswai nunek Judásrønkutri pua, tap kømøtik wammera trencha eshkaik køn: “Babiloniosmera Jerusalénsrø yaskapmeran, sruk pantrikmeran mintisaikkutri, israelitasmera Jerusalénsrø katø pupelan nømun purømisrtrapik chikaakøn cha”. Truikwan wammørape, Nehemíaspe latrø isui inchip menta, nømun purukuntrap isuikkutri Tiuswan miaik køn Jerusalénsrømay rey ipashchai.

Yanasrø reype Nehemías isuintik waik asha, chincha isuintik uñku cha paya møren, Nehemíaspe trencha løtik køn: “Nai ciuda Jerusalénsrø purø trømpøik mintin pasran, treekkutri latrø isuin pasrar cha”. Inchen Reype paya mørik køn: “¿Mantø purukumø cha?”. Nehemíaspe tru urastø nui umputø Jeupawan miawape trentaik køn: “¿Jerusalénsrømay ipsru chintera sruk pantrikmeran tamaram purukuntrap?”. Rey Artajerjespe ka intrai marøp, Jerusalénsrømay yainuk chikucha puraimøntrai purukup intik køn. Incha Judásrø aship karup pasrøntrai wesrup, yaskapmeran martrai tsikmerakucha trana ørik køn.

Nehemías Jerusalénsrø pua, nøtrø sruk pantrikmera maik pøntraik ashape, sacerdotesmeran, gubernadurmeran tuluntsunin karua trentaik køn: “Purø trømpøik mintin pasran treekkutri kuallip pølpasramik køn cha”. Inchen misakmerape ikwan møra sruk pantrikmeran tamarøp pølpasrik køn.

Møilø israelitasmeran tsalø ashipeløpe trentaik køn: “Nøm sruk pantrik marøp kuikwane kan zorro nepiaken mintishintrun cha”. Inchentø kuallipeløpe trunun mørmøtø, sruk pantrikmeran más palai kusrup tamarøp ampik køn.

Yam misakmera nømun tsalø ashipelø Jerusalénsrø kepampa kuayantrap mentøpen, judíosmerape kuenta køtra kørik kui inchip mentøpen, Nehemíaspe trentaik køn: “Kørik kui inchimøtay, Jeupape nampa pasran cha”. Inchen Nehemíaspe ashipelø pønsrøpen, tsalø ashipeløpe kepampa kuayantrap kaimaik køn.

Nøtrø sruk pantrikmeranpa yaskapmeranpa 52 kualømmerayutø patsøkaik køn. Inchawai Nehemíaspe levitasmeran Jerusalénsrømay pera atrua. Pa søtø mara kan søtøwane Esdras pera ipen, katøkan søtøwane Nehemías pera ya, escaleraswan nepampa nøtrø sruk pantrik palawan kan søtøpe atsikmay ampen, katøkaneløpe kusrmay ampa Jeupawan miirap ampik køn trompetastøka, platillostøka, arpastøka templosrø kanpalatø misramnekatik. Møkelø, ishumpurmera, urekmera Jeupawan keta trana, mayeløpa latrø kasrak puraampik køn.