Jesúspe sábado kualøm kap kuantrøpaikwan tamarik køn

Fariseosmerape Jesúswan latrø tsalø kui-incha chikøpentø chipelø kuik køn pishirai yau kertrap. Trenchipelø kuik køn, Jesúspe sábado kualømpe kuantrø tøkarwan tamaramik kømøn cha kakentø isram kualøm kuikkutri. Kan sábado kualøm, Jesúspe kan møk ashchap kaimapikwan asik køn, tru misak puraampinuk an miap wapen. Inchawai nui kusrenanøp pera unilan trentaik køn: “Asay, Tiuswai marampurap marik nun mantø purukuntrap kuikwan”. Incha Jesúspe pirau illimpi tucha, tru illimpitøka kaichik chillik marape, trutøka ashmíikwai kapyu srølape trenchipik køn: “Siloé pisusrø maløwan kwallchab inrrø— cha”. Inchen treek maren yantø ashipik misrøpik køn.

Misakmera trupa kuara trenchipelø køn: “¿Tru ik møkpe chikøpen kettra chip miap wapik truik kø chinta cha?”. Katøkaneløpe trenchipelø køn: “Truig lataig asønabendø, nø kømøn— cha”. Inchen nøpe nøaship trentaik køn: “Nawain kur tru ashchap kaimapik”. Inchen misakmerape trenchipelø køn: “¿Chincha ashibik misrku?— cha”. Inchene nøpe chi purayaikwan chishtø eshkapen, nømpe fariseosmerapa waminchai pera ampik køn.

Møkpe fariseosmeran trencha eshkapik køn: “Tru Jesúspe chillik mara nai kapyu srøla piyu maløwan kuallchap intrø taikkutri yantø ashipik misrar cha”. Inchen fariseosmerape trenchip mentapelø køn: “Tru Jesús sábado kualøm tamarøpik køpene nui marampurap marikpe Tiuswainukkutri atrumuintrun cha”. Katøkaneløpe trentaik køn: “Nui marampurap Tiuswainukkutri atrumupene trupe, ¿chintimpatre kuantrø tøkarwan tamara cha?”.

Fariseosmerape tru møkwai møskalan wama trencha paipelø køn: “¿Tru ñimui nusrkaimpe mantø incha ashipik misra cha?”. Møskaløpe kørik kui pøntraik køn, kakentø fariseosmerape trentaik køn møikkøpen Jesúswan kørepikpe judíosmera tuluntsunik yaukutri wepusrilø køntrun cha. Inchawai trencha løtik køn: “Nampe nepua ashmer, nunaship payay cha”. Inchen fariseosmerape katøle tru møkwan paya møren nøpe trentaik køn: “¿Chukatik eshkamik paløta, chintimpatre más paya mørke cha?”. Fariseosmerape latrø trømpøik nama truyukutri wekuchipelø køn.

Jesúspe tru møkwan ashchap ya trentaik køn: “¿Mesíaswan ñikan køretitru cha?”. Inchen møkpe trentaik køn: “Mu kui nepua asimpe kørepsruintrun”. Jesúspe trenchipik køn: “Tru Mesíaspe na kur cha”. Jesúspe tru ashchap kaimapikpa latrø tammay kua, nui kuantrøwan purøra, fe tøkakøntrai purukuik køn.