¿Biblia Tiuswainukkutri cierton atrupik kø chintera?

1. ¿Biblian mu pørinkaruik kø?

Nam manakatik øsik yu Pirau waramikwan tranikpe latrø tap wam køn, Biblia ikwan eshkan (Mateo 5:5). Jeupa 40 møkelø sølkantelø karuik marøpelan, Biblian 66 librosmera pørtrai wesrua pønsraik køn. Génesiskutri Deuteronomiokatik Moisés nø pørilø køn, 3.500 pilamera purayaik køn. Apocalipsiswane apóstol Juan pørik kuik køn, 1.900 pilamera purayaik køn. Tiuswainukkutri wesrua pønsraikpe Bibliayu pøntran, nui isupikwan espíritu santotøka eshkawa pørinkaruik køn (2 Samuel 23:2). Ik møkeløpe nømui isuitøka pørmuik køn, Tiuswai isuiløtøka pørilø køn. Inchawai, Jeupape nøtø Biblian pørønkaruik køn. Leu 2 Timoteo 3:16; 2 Pedro 1:20, 21.

Videun ash ¿Biblian mu pørinkaruik kø?

2. ¿Bibliape cierton eshkapik kui nam chincha kørewa pøntramik kø?

Kakentø Tiuspe Marampurap Marøpik kua, metrapsrø chi purayailan wentøsrø chi puraintrapikwan eshkantrapikpe møkelø kømø, Tiustøwain køn (Josué 23:14). Ilan Bibliayu Tius pørønkaruik køn. Leu Tito 1:2, 3.

Kan pørin kilkape Tiuswainukkutri atrupik køpene latrø nuik køn, møkelai kilka marilø lataik kømø. Latrø nøtrø Bibliamera pirisaik køn, latrø nu pek pek wammayelø, latrø yanaik kuinkucha Pirøpurap waminchipikpe cierton maik kuikwan eshkapik køn. Trektøwai, 40 møkelø Tiuswai wamwan pøren ampukutri ikutri asiamuinkucha pekmay pekmay kømø, kantø kua lataik pørik køn.a Katøkanpurappe, Tiuswai wam kilka pøriløyu nampe aser latrø untakik kui. Møyankucha, misakwan sølwan amtrai purukupik køn. Chishtø nepua kusreinuk latrø nøtrø misakmera nepua asha, kørewa pøntran, Biblia Tiuswai wam kui. Leu 1 Tesalonicenses 2:13.

Videun ash ¿Bibliape cierton eshkapik kui nam chincha kørewa pøntramik kø?

3. ¿Bibliape chipurap eshka?

Bibliape latrø tap wammørøsrailø eshkapik køn. Tius misakmeraimpurap latrø tapikwan isua martrap kuikwan eshkapik køn. Trektøwai eshkan, srøtøchitø misakmeran nøm kalø marikkutri tap Pirøchikwan trupisha pøntramisren, inchen Pirøwan katøle latrø tapchik køntrap kui mantø martrap kuiwan eshkapik køn. Leu Apocalipsis 21:4, 5.

Bibliape Tius maik karuilanpa, nam tap amøñintrai chi maramikwan eshkapik køn. Katøkanpurappe, Bibliape tapikwan marøpelanpa kaik marøpelanpa Jeupa maik marøpik kuikwan kenamarøpik køn. Jeupa maik kuikwan nepua ashchai, Biblia namun purukun. Incha nampe Tiuswan mas traktø kementa pøntramik kusrenanøpik køn. Leu Romanos 15:4; Santiago 2:23; 4:8.

4. ¿Biblian tap nepua asamik chi purukuntrera?

Biblian tap nepua ashchai, Jesúsma Tiuswai wamyukutri kan pititelan kemøra tørkantø eshkapik kuik køn. Ik fulletupe trektøwai martrai purukun, Biblia chi kusrenanikwan tør nepua asha kusrentrai. Leu Lucas 24:27, 45.

Tiuswainukutri latrø tap wammørøsrailø aship kusrep yainuk, ñipe mas ashik kui inchun. Møiløma nepua ashik kømuik pøntran. Møiløpe namik kui mørøp pøntran, truiløpe ñun chikøpen chipen elachimø pasrau, kakentø Bibliatøwai eshkapik køn Tiuswaimpurapikwan nepua kusrepeløpe yu Pirau manakatik øsik warøntrun cha. Leu Juan 17:3.