Jeupape Jehosafatwan purømisrik køn

Jehosafatpe Judásrø kan rey kuik køn. Nøpe tru Baalwan adoraik altarmeran piniship, taska marik tiusmerankucha pinisaik køn, kakentø Jeupa maik karuilan misakmera nepua ashchai intikkutri. Inchawai tru príncipesmeran, levitasmeranpa Judásrømay ørik køn, maya misakmeran Jeupa maik karuilan kusrenantrai.

Judá pøtøkatanelø kørik kui mørik køn Judápa kuayamik, kakentø Jeupa nømpa pasraik nepua asikkutri. Inchawai tru rey Jehosafatwayasik chikøpen kettrap srua ampupelø køn. Inchentø Ammón, Moab, Seírsrø warapeløkucha Judápa kuayantrap intikkutri, Jehosafatpe Jeupa purukuikwan palaik møra, maya Jerusalénsreelan møkelan, ishumpurmeran, urekwan tuluntsuninkarua, nømui metrap Jeupawan trencha miaik køn: “Jeupa ñi purukuiktøkatøwai ik kuayaikwan kanamtik køn. Inchawai tiusmanta, nam chi maramikwan eshkatra cha”.

Jeupape nun møra trencha løtik køn: “Kørik kui inchimøtay, na purukutrumøn cha. Ñim chu pøntrøntrap ampiksrø kønømø pøntrøntrikay. Incha na ñimun mantø purømisrtrap kuikwan ashchikay”. ¿Jeupape nømun mantø purømisrtrera?

Katø kualømpe, Jehosafat miirapelan lawa trentaik køn: “Ejércitoi metrap ampay cha”. Nømpe Jerusalénkutri wepampa, Tecoasrømay ampik køn, kakentø trusrø kuayantrap kuikkutri.

Miirapeløpe Jeupawan latrø kasrak mur miirap køpen, Jeupape nømuimpurap kuayap pasraik køn. Ammonitasmera, moabitasmera nømasikyaitø melampuikkutri mayeløpa kuaik køn. Inchentø Jeupape Judásrø misakmeran suldausmeran, sacerdotesmerankucha purømisrikkutri, pøtøkataneløpe Jeupa chi marikwan wam møra kuenta køtrik køn, tru Jeupape katøkucha nui misakmeran tsalø ashipelø chinchimøntrai purømisrøp pasraik. ¿Jeupape nui misakmeran mantø purømisrøpik kø? Mumaykøpen purømisrøpik køn, misakmera purukuimíik.