Jesúswai kusrenanøp pera unilø espíritu santon utik køn

Jesús srømpalasrømay yaik, diez kualømmeraken puraipen, nui kusrenanøp pera uniløpe espíritu santon utik køn. 33 pilasrø Pentecostéswan marøp køpen, latrø nu misakmera peksreelø Jerusalénsrømay amtruik køn. 120 Jesúswai kusrenanøp pera unilø, kan ya pa pisuiku nepampa tuluntsuna køpen, køremkeik purayaik køn. Kan kan nømui tur pala nakurø lataik kenamisren, nømpe pek trikmaytø waminchipelø misren, ya ørøpa latrø mur wantrap pasramisrik køn.

Misakmera peksrønkutri Jerusalénmay amtrupelø, tru latrø mur wam trikwan mørape, yausrømay ashchap ampik køn chi purayaitashchap. Trusrø puape kuara asha køtrømisrik køn, tru Jesúswai kusrenanøp pera unilø pek trikmayktø waminchip køpen, trentaik køn: “¿Ik misakmerape Galileasreelø kuinkucha namuin trikwane mantø inchatre waminchip kø cha?”.

Inchen Pedropa Jesús nøaship karua øriløpa mayelai metrap pøntramisra, Pedrope trentaik køn: “Ñimpe Jesúswan kuetchen Jeupape katøle øsirana, møimpe Tiuswai kusrmay wamisra wan. Nø espíritu santon trantrap misrikwan møi tranen, marampurap marilan ñimtøwai asha møra pøntran cha”.

Misakmerape kuara asik køn, kakentø Pedro maik wamintikpe nømui mantrau kepatikkutri. Inchawai paik køn: “¿Nampe chi maramø cha?”. Nøpe trentaik køn: “Ñimui kalø marilan isua møra, Jesúswai munchiyu piu umpu ulsraik, incha espíritu santon ketik utøntrun cha”. Tru kualøm 3.000 misakmera piu umpu ulsrøpen, truyukutri Jesúswai kusrenanøp pera unilø nu misrøp yaik køn. Nøaship karua øriløpe espíritu santo purukuiktrawa kungrekasiunesmera marøp, truyu srøilan Jesús maik karuilan kusrenanik køn.