Corneliope espíritu santon utik køn

Cesareasrø kan møk Cornelio taik tsupik kuik køn, suldaumeran nø karup pera pasrapik, nøpe judío kømuinkucha, judíosmerape kørikpala ashipelø kuik køn kakentø nøpe merømíik, waachameran purukup, trektøwai Jeupawan kørewa nøpa wamintamikwane elachimíik køpen, kan kualøm ángel kenamisra trentaik køn: “Ñi miailan Tiuspe møran cha inchawai tru Jope ciudamay ñui møkelan ør, Pedro ñun ashchap attrai eshkantrain cha”. Tru urastø Corneliope pøn møkelan Jopesrømay øren, truyukutri 50 kilómetros sursrø pasraik køn.

Jopesrø Pedrope kan piap lataiku, tru ushamera judíosmera maimíikwan asik køn, inchen kan wam ushawan ma chipen, truikwan mørape Pedrope mamøntrap trentaik køn: “Nape manaken chish kømø ushamerane ma kømur cha”. Inchen tru wampe trentaik køn: “Ik ushamera chishelø kømøn chimøta, møimpe Tiuspe chishelø køntrai maran cha”. Incha trentaik køn: “Ñui yaskapyu pøn møkelø pøntran nømpa intrø cha”. Pedrope yaskapsrømay ya møkelan paik køn: “¿Chinchap amtruke? Nømpe trentaik køn: “Namune Cornelio ørtan, ñun nui yamay pera amtrumtrai”. Pedrope tru yem nøpa køtrømisrinkarua, katø kualømpe Cesareamay ipen, møilø Cristoi wentautø ampupeløkucha nøpa ampik køn.

Inchen, Corneliope Pedro puik asha tømpasren, Pedrope trentaik køn: “Kutrø, nakucha ñi lataiktøwai kan møktøwain kur cha. Tiuspe ñui yamay ashchai ørtan. Tru nam judíos kømelø yau kepammelø kuintøkucha, inchawai møimpe tiusmanta chikutri nan wama ørikwan eshkatra”.

Corneliope Pedron trentaik køn: “Pip kualømken køn, na Tiuspa waminchip wapen kan ángel kenamisra ñun wamøntrai taikpe, inchawai Jeupa chi taikwan kusrenantra cha”. Pedrope trentaik køn: “Møimpe ciertonwai wetøpeñar Tiuspe møilane ørømara, katøkanelantø tap inchimøtø, lata isupik køp sølkantø tapik marøpikwane Tiuspe kashmíik kui”. Treekkutri, Pedrope Jesúswaimpurap chinetø kusrenanen, Corneliopa truyu pøntrapeløpa espíritu santon uta, piu umpu ulsraik køn.