Cristoi wentautø ampupeløpe latrø yapsrønken kusrenanøp ampik køn

Jesús nøaship karua øriløpe, Pirø mupa kuimpurap tap srø wamwan waminchain taikwan møra marik køn. 47 pilasrø Antioquíasrø kungrekasiunyueløpe Pablonpa, Bernabéwanpa Tiuswaimpurap kusrenanøp amtrai øren, nømpe Asia Menor, Derbe, Listra, Iconiosrø latrø kasrak kusrenanøp ampik køn.

Pablopa, Bernabépa munken kashmø puarmeran, waachameran, urek misakmeran, køleelan tap srø wammeran waminchen latrø yam misakmera Cristoimpurap kusrenanilan utik køn. Trektøwai Chipresrø, gubernadur Sergio Paulo taikwankucha, tap srø wamwan eshkap køpen kan pishi marøpik atrua, Pablo waminchip pasraikwan søtøkatøntrai-inchen, nøpe trentaik køn: “Jeupape ñuinkatø pasrømøn”. Pishi marøpikpe ashchap kaimapik køtrømisren, Sergio Paulope ikwan asha Cristoi wentautø uñipik misrik køn.

Pablopa Bernabépa yamørik, chikøpen penap yaniksrø, mayu, judíosmera tuluntsuniksrø tap srø wamwan kusrenanøp ampik køn. Kan kualøm, Listrasrik intrap kaimapikwan tamaren, misakmerape nømun, tiusmera kuitamap adorantrap mentøpen nømpe trentaik køn: “Tiuswantø adoramik køn, kakentø namkucha ñim latawai ka møkeløtø ker cha”. Inchen judíosmera pua, misakmeran tru Pablon kuetchain karupen, nømpe sruktøka sølpeta ciuda wampiksrømay srua ampik køn yantø kuaitamap isua. Inchentø Pablope katøkucha øsik tsupen, tru urastø Cristoi wentautø ampupelø amtrua, Pablon ciudasrømay srua ampen, yanayupe katøle Pablope Antioquíasrømay yaik køn.

49 pilasrø Pablope Asia Menorsrø Cristoi wentautø ampupelan ashchap ya, katøpe más yapsrø, Europamay yaik køn, Tiuswai tap srø wammeran kusrenantrap. Trektøwai Atenas, Éfeso, Filipos, Tesalónica, katøkan pirausrømaykucha ipen truyu nøpa Silas, Lucas, kan matsinø Timoteo taik, lincha ampa trusrø kanpalatø misra srø kungrekasiunesmera mara mur pøntrøntrai purukuik køn. Pablope Corintosrønkucha kan pila mentra køtrømisrik køn, trusrø Cristoi wentautø ampupelan mur pøntrøntrai purukuntrap. Nøpe tap srø wammeran waminchip, kusrenanøp, kungrekasiunesmerayasik cartasmera pørøp, trektøwai carpas ya-urek marøp kuallchipik kuik køn. Yanayupe katøle Antioquíasrømay yaik køn.

Yanasrø 52 pilayu, Pablo pønmay intrapyu Asia Menorkutri pølpasra Filipossrø pua, Corintosrømay yaik køn. Trektøwai, Pablope Éfesosrø kusrenanøp, kuantrømeran tamarøp, kungrekasiunmeran purukup, yam pilamera uña trusrø kan kusrenanik yau Tiuswai pøriløyukutri tap wammera waminchipik køpik køn. Treekkutri, latrø nu misakmera tap srø wamwan uta, nømui øsik amønaikwan yunømarøpelø kuik køn. Yantø srape latrø yapsrø waminchip uña Jerusalénsrømay yaik køn.