Kailan keeri yau aship pasrapik ciertonikwan kusreik køn

Filiposrø, kan srusrø karuintik mekapik wentøsrø chi puntrapikwan eshkapik kan kuaimantsik tøkaik kua, nun karup pera køpelane trupa nøtrø an asinkarupik køpik køn. Pablopa, Silaspa Filiposrø puik ashape, nøpe latrø yam kualøm, wentautø uña trencha trashipik køn: “¡I møgueløbe Tius Mayeelaim Pala Pasrabigwei karuindiig melabelø […] køn!— chib”. Pablope tru kuaimantsikwane trentaik køn: “Jesucristoi i srusrainukkurri nabe webinrrø tamønrrun— cha”. Tru urastø kuaimantsikpe wepiaik køn.

Tru srusran karup pera køpelø yantø más an kanamik kømui nepua ashape, latrø trømpøik nama, Pablonpa Silaswanpa tru karupelaisrømay srua ampa trentaik køn: “Ik møkeløpe maik karuikwan mørmø ciudawane ke chi marinken asamkeik marøp amtrun cha”. Maik køntrapikwan asha marøp putrapeløpe, Pablonpa Silaswanpa itsinkarua kailan keeri yau kepusrin karua, truyu aship pasrapikpe latrø løstøsrø keera, nømui katsikmeran cepoyu kekuana putrønnøpik køn.

Pablopa, Silaspa Tiuswayasik miirap køpen katøkanelø truyu keeri putrapeløpe mørøpelø køn. Inchen kaakøppa mur pirø kønøpen, maya yaskapmera kurin pøntramisren, tru keeri putrapelai cadenasmerape mayelaimpa picha køtrøpen, truyu aship pasrapikpe yaskapmeran kurim pøntraik ashape nui espadan wesrua nøasiktø kuantrap inchipik køn, kakentø nømpe chap wekøtra ampitamap isua.

Pablope mur trashipik køn: “¡Ñiken øyeek kaik marmøta! ¡Nampe søtøpa yu pøntrer chip!”. Inchen kailan keeri yau aship pasrapikpe lula nømui metrap tømpøsra trenchipik køn: “¿Na kaigyugurri wesraig kømibe chi maramig palønrrerah?— cha”. Nømpe trencha løtapelø køn: “Ñipa ñui yaweløpa Jesucriston køremik køn cha”. Inchen Jeupawai wamwan kusrenanen nøpa nui yaweløpa piu umpu ulsrøpelø køn.