KUSRENANIK 100
Pablopa Timoteopa
Timoteope kan matsinø kungrekasiun Listrasrø tuluntsunapik kuik køn. Nui møskaimpe griego køpen, nui usrimpe Eunice taik, judía kuik køn, nui awelape Loida. Nømpe Timoteowan lamikkutri Jeupawaimpurap kusrenanøpelø kuik køn.
Pablo, Listrasrømay Tiuswai Wamwan kusrenantrap pamay yainuk kuenta penik køn, tru Timoteope trusrø nuchalan cierton untarap, purukuntrap isupik kui. Inchawai nøpa truurø uñchai eshkawa, Tiuswai tap srø wamwan latrø tap kusrenanøpik køntrai purukuik køn.
Pablopa, Timoteopa chu ampinkucha espíritu santope metraptø pasraik køn. Kan yem Pablo asønainuk, kan møk Macedoniasrømay purukuntrap amtruy cha eshkapen asik køn. Treekkutri Pablope, Timoteopa, Silaspa, Lucaspa trusrømay Tiuswai tap srø wamwan eshkantrap, kungrekasiunesmera martrap ampik køn.
Macedonia ciudasrø latrø nu møkelø ishumpurmera Cristoi wentautø ampupelø misren, møilø judíosmera Pablonpa, nui linchipelanpa tsalø kui intikkutri kaik misakmeran tuluntsuna, ciudayu karup pøntrapelai metrap srua ampa trencha trashipelø køn: “Ik møkeløpe Romasrø karup aship wapikwai tsalø ashipelø køn cha”. Pablopa Timoteopa nømun kalø puntrap kui asha yemsrø Bereamay wepampa ampik køn.
Bereasrø misakmerape Tiuswai tap srø wamwan mørøk kui intikkutri, latrø yam griegosmera, judíosmera Cristoi wentautø ampupelø misrik køn. Tesalónicakutri møilø judíosmera kalø martrap amtrupen, Pablope Atenasmay ipen, Timoteopa, Silaspape Bereasrø køtrømisrik køn, trusrø nuchalan purukuntrap. Yanasrø Pablope, Timoteowan katøle Tesalónicamay ørik køn, tru nuchalan pasrarinkucha mur awentawa melamik purukuntrai. Trukutri, Pablope Timoteowan latrø yam kungrekasiunesmeran purukuntrai ørik køn.
Pablope Timoteowan trentaik køn: “Tru Jeupawayelantø martrap inchipelane pasrarilø køntrun cha”. Treekkutri, Timoteope kaik intinap mekap, nui fekutri kailan keeri yau pasraik køn. Treek kuinkucha, nøpe latrø kasrak mørørai inchipik kuik køn, kakentø Jeupawan tarømisrmø pasrapik kui kenamartrap kuikkutri.
Pablope filipensesmeran trentaik køn: “Timoteowan ørtrai-inchar. Nøpe tru ciertonik mayu mantø ampup pøntramikwan, Tiuswai Wamwan mantø eshkamikwan kusrenantrun cha”. Pablope, Timoteowan latrø tap kui ashipik kuikkutri, yam pilamera Tiuswayelan marøp, latrø tap linchipelø kuik køn.
“Pøs katøgan munguen nø lataibe tøgagømur, ñimuimburab tab kønrrai inchib, treegwan martrab truba truba isubig, trurrigu ka isatø inchib pasrømíig. Kaguende mayeeløba nømuimburab tabig pub attraingøba labelø køn, Cristoimburab tab kønrrain kømøtø” (Filipenses 2:20, 21).