Pablon Romasrømay srua ampik køn

Pablo pønmay Tiuswaimpurap kusrenantrap yaik Jerusalénsrø patsøpen, truyu kemøra pishirai yau kertrap srua ampik køn. Kan yem pishirai yau wapen, asønainuk Jesús trentaik køn: “Ñipe Romasrømay intrap køn, trusrø naimpurap waminchap”. Treekkutri, Pablon Jerusalénkutri Cesareasrømay pera ampen, pa pila pishirai yau waik køn. Kan kualøm gubernadur Festoi metrap pasrøwa, Pablo trentaik køn: “Romasrø César nø asha martrai paløtan cha”. Festope trentaik køn: “César mantø maramikwan ashchai paløpene trusrømay ørtrap cha”. Inchawai, Pablon Romasrømay intrai kan barcoyu øren, nøpa, Lucaspa, Aristarcopa lincha ampik køn.

Maryu ampen, yam kualømmera mur isik ichipyu puraampup kua søtøpa kuamuitamap isuik køn. Inchentø Pablo trentaik køn: “Kan piainuk ángel kenamisra trentan: ‘Kørik kui inchimøta, ñipe Romasrø puntrun incha barcoyu mayeløpa øsik puraamtrap køn cha’. Treekkutri, ¡kørik kui inchimøtay! Nampe øsik puraamtrun”.

14 kualømmera latrø mur sre isik ichip pasrainuk kan isla Malta tainuk, barcope illa chishtø mincha pasramisrik køn. Inchentø, 276 misakmera truyu ampupeløpe øsik wepampik køn, møiløpe nadap, katøkaneløpe barco pitisyu kemøra wepampen, Maltasreløpe nømun chi palailan trana, pachirantrai nakutra pasrik køn.

Pøn pøl puraipen, suldaumerape Pablon katøkan barcoyu Romamay pera ampen, nø pupentø kungrekasiunyueløpe utøntrap ampik køn. Pablo nømun ashape, Jeupawan unkua cha, tap kui mørøraik køn. Pablon kemøra srua kuinkucha, kan ya pepa, tru yau kan suldau aship pasrøntrai keerinuk truyu pa pila tsuik køn. Misakmerape nun ashchap pupen, nøpe Tius Nø Aship Karup Waikwaimpurap, Jesúswaimpurap kusrenanøp, kungrekasiunesmeran Asia Menorsrø, Judeasreelan cartasmera pørik køn. Ikpe tørtø kenamaran, Jeupape tru Pablon chu Pirausreelantøkucha tap srø wamwan kusrenanøp intrai purukuik kui.