Jeupawaiwan Marøp Metrap Pera Pøntrapelai ñimuyasik pørik

Namui untaraik nuchalø:

Jeupawan adorapeløpe nui Wamwan untarapelø ker. Bibliape metrapsrø maik kuikwan eshkap, øsik amønamikyu tap wammera tranøp, Jeupa misakmeran untak tøkakuikwan kenamarøpik køn (Salmo 119:105; Lucas 1:3; 1 Juan 4:19). Namui isuinukpe katøkan misakmera Tiuswai Wamwan nepua asha kusrentrain køn, inchawai namuimpe latrø tapik køn, ik pørin kilkawan kenamaramik: “Nan Bibliayukutri tapelø kusrenanilø”. Møimpe chi tøkakuikwan eshkantrap.

Ik kilka pørik shush urekwain kuinkucha, kølelankucha nu purukuntrapik køn Bibliaimpurap kusremik. Biblian mayelayasik pørinkaruik køn, trektøwai ik pørin kilkakucha mayelan purukuntrun kasraktø amønamik.

Biblia maik eshkapik køpen, srøtø misakmeran ellmarinukkutri nømun chitø purayaikwan eshkapik køn. Bibliayu maik eshkaikwan lutøkutri maik purayaikwan tørtø eshkantrap trantrapelø ker.

Katøkanpurappe, Bibliape chi purayaikwantø eshkamøtø, tru pøriløpa, pisiløpa tøkakuiløpe, Bibliayuilø misakmera wamintilø, tru nømun maik mørørailø, maik isupelø kuikwan kenamarøpik køn.

Ik pørin kilkape kenamaran, Bibliape yam misakmeraimpurø waminchipik kui. Møiløpe Jeupawan møra marøpelø inchen møiløpe møra marmelø. Misakmera chi marikwan asha, chi kusremtik kuikwan kenamaran (Romanos 15:4; 1 Corintios 10:6). Ik pørin kilkape 14 seccioneskatik pirisha wesruik køn. Srøtø secciónyu eshkapik køn, truyu chitø aship puraampamikwaimpurap.

Ñi shush urek tøkaik kuape, kan kapítulo nømpa lentrik, incha truyu pisik pøntrapelankucha asha, trupurap waminchi. Trukutri, Bibliayu versículos pøntrapelantøka lep intrø. Ñui urek ashchai puruku tru Bibliayu lewa kusreiløpa ik pørin kilka leikpa, kusremtik kui. Ik pørin kilkatrawatøwai kølelankucha purukumtik køn, Biblia chi kusrenanøpik kui ashchai.

Nam isuikpe ik pørin kilka tammayelø misakmeran purukuimpermap isup ker, urek køntrun kølelø køntrun. Tru Bibliayu Tius maik kusrenanik asha namui øsik amønainuk trektøwai mara ashchai. Treek marape Jeupawan adorap, nui untaraik yawelø misrtrun.