¿Ñuimpe chincha tapik kø Jeupawaiwan waminchipelai tuluntsunik yamay yamik?

¿Ñunkan mana tuluntsuninukmay tru Jeupawaiwan waminchipelai alik kuita? Manaken ya kømui sruantøpe, srøtø yape kørik køntrun. Ñipe paya mørintre: “¿Jeupawaiwan waminchipelainukpe chi marøpelø kera? cha. ¿Chinchatre tapik kø nømuimpe? ¿Nakucha intrap kø chinta?”. Ikyu ashchap, tuluntsuninukmay atruape Tiuswainuk mas trak pasramikwan, ñui øsik uninuk tap unamikwan purukuntrun.

1. ¿Nampe chinchakutri tuluntsunik yamay ampamik kø?

Kan Biblian pørøpik chinchakutri tuluntsunik yamay ampamikwan eshkaik køn. Nø trenchipik køn: “Nu kungrekasiunyu Jeupawan mayanken tapik wamintamøntrun” cha (Salmo 26:12). Jeupawaiwan waminchipelø møyankucha kasraktø tuluntsunapelø køn. Pirø ørøpa trune mørik pa kualøm tuluntsunapelø køn, Tiuswan unkua chintrap, nun miirailøyupa miailøyupa, trektøwai pilayu pønmay tuluntsunapelø køn nøtrø tuluntsuninuk.

2. ¿Ñi chi kusrentrera tuluntsunik yau?

Tuluntsuninukpe Tiuswai Wamwan chi taikwan tørkantø ashchai kusrenanøpelø køn (leu Nehemías 8:8). Ñi tuluntsuninukmay atruape, Jeupawaimpurap trektøwai nø tapelø tøkakuimpurap mas kusrentrun. Jeupa ñun untarapik kui mas nepua ashape, ñi trak linchipik køntrap isuntrun. Ñipe nepua ashchun nø mantø purukupik kuikwan kasraktø unamik (Isaías 48:17, 18).

3. ¿Ñune mantø purukuntrera nuchalan tap nepua asamik tuluntsunik yau?

Jeupa karupik køn “puruguyamigwan isua asiyagun, undag købigwan tøgagømig kønrrai martrappa, [...]. Nambe kanbalatø linchib Tiusweiwan marøb tulundzunamigwane elachimugun” (Hebreos 10:24, 25). Tuluntsunik yau cierton untarapelø wetøtrantrun, trektøwai nøm ñi latawai Tiuswayelan mas kusrek kui inchipelø køn. Bibliayukutri tap wammera mørtrun (leu Romanos 1:11, 12). Trektøwai, kasherawarmerapa nømteløpa isuinteløyu puraampilan waminchun. Treekkutri, nam tuluntsuniksrø palømø amtrai Jeupape isupik køn.

MAS NEPUA KUSREU

4. Jeupawaiwan waminchipelai tuluntsunik

Kan siglosrø Cristoi wentautø ampupeløpe Jeupawan adorantrap tuluntsunapelø kuik køn (Romanos 16:3-5). Ley Colosenses 3:16, yu leinuk pinaku paíkwan waminchap:

• ¿Kan siglosrø Cristoi wentautø ampupeløpe mantø Jeupawan adorapelø kuik kø?

VIDEU: ¿Nam tuluntsuna putrainuk mailø kø? (2:12)

• ¿Tuluntsunik yau Colosenses 3:16 kenamarikyupa treek lataiwaimpe mantø kenamara?

• ¿Videu asinuk kape pisinuk ñune møikwan kustata nam tuluntsuna putrainuk?

Ley 2 Corintios 9:7, yu leinuk pinaku paíkwan waminchap:

• ¿Jeupawaiwan waminchipelø tuluntsuna putrainuk chincha an miamelø kø?

Ñun Biblian kusrenanøpikpa møi trune tuluntsunik yau chi kusremikwan ash.

• ¿Tuluntsuna putrainuk kusrep puraampamikwan møikwan mas kustata?

¿Nepua asha køtitru?

JW.ORG yu kepi attrik Pirø ørøpa namui tuluntsunilø chu marøpelø kui, chi kualøm kui.

1. Namui tuluntsuna putrainuk ashchap Bibliayukutri tap wammera wamintik, mayelai metrap kenamarilø, videumerapa. Pølpasrtraptø patsøkøntrap lata Tiuswan mirawa nun unkua chipelø ker.

2. Tuluntsuna putrainuk møiløkøpen tru paílan løtøntrappe tasikwan kusrumik køn.

3. Mutøkucha amtrumik yaskappe kurin pasran: møkelai, ishumpurwai, køllielai, srusralmerai, matsørelai, urekmerai...

4. Jeupawaiwan waminchipelø tuluntsuna putrainuk anwai kømøwai, an miamøwai inchipelø køn.

5. Tuluntsunik yamay amtrap trantramik køn

Jesúswai yawelan isukun. Nømpe Jerusalén templosrømay amtrap pila mørik Nazaretsrønkutri 100 kilómetrosmera tunmeragøba tøga pirømerasrø puraampup ampamik kuik køn. Ley Lucas 2:39-42, yu leinuk pinaku paílan waminchap:

• ¿Jesús uñip uras templosrømay ampamik mur kuik kø chintera?

• ¿Ñi tuluntsuninukmay intrap isuinuk chi søtøkatapelan kanawa køpsru?

• ¿Kanmay mur kuintøkucha tuluntsunik yamay utø wesrua yamik tap kø chinta? ¿Chincha?

• ¿Nam chinchakutri ampamik kø palømø tuluntsunik yamay?

¿CHI KUSREKU?

Ñi tuluntsunik yamay yape, Jeupawaimpurap mas kusrentrun, nun mas trak kemallchun trektøwai nømpa Jeupawan adorap pøntramik køntrun.

Kusreikwan katøle isuntrap

• ¿Jeupape chincha namun tuluntsunik yamay amtrai alapik kø?

• ¿Jeupawaiwan waminchipelø tuluntsuna putrainuk ñipe chi kusrentrera?

• ¿Ñune mømay purukuta tuluntsunik yamay yamik?

MAS NEPUA ASH

¿Ñune tuluntsunik yamay yamik kørik køpik kuita? Kan møkma kørik kui mørik køn tuluntsunik yamay yamik, pero yanayupe tap kui mørik køn. Chincha øyeek isuikwan ashkun.

Namun mantø utikwan manaken pesannamumøntrun (4:16)

Kan matsinø tuluntsunik yamay yamikwan latrø tap kui asikwan nepua ash. Nø mantø marikwan nepua ash.

¡Tuluntsuna putraikwan latrø køtrø kustaik mørar! (4:33)

Tuluntsunantrap ampimpurø møilø maik isupelø kuikwan leu.

“¿Chincha tapik kø tuluntsunik yamay yamik?” (jw.org yu pørilø)

Kan kaik marøp søtømerapa uñipik kua mantø Jeupawaiwan waminchipelø tuluntsunik yamay uña yunømarikwan nepua ash.

“Chu llirau uñatøkucha nai revólverwane sruatø uñipik kuik køn” (Asha Eshkapik, 1 julio 2014wai)