¿“Karuindiig megabig maig taigwan møra” marøpik, mu kera? ¿Chi marøpik kera?

Jesúspe kungrekasiunyu metrap pera aship pasrapik “tur” køn (Efesios 5:23). Møi kualøm, Jesúspe “karuindiig megabig maig taigwan møra” marøpikwan, yu Pirau Cristoi wentautø ampupelan metraptø perep intrai wesrua pasrik køn (leu Mateo 24:45). Karuintik mekapikwane Jesucristo wesrua pasrik køn, treekkutri møiløyupe nø isua martrai marik køn, treek kuintøkucha Jesucristoi nømpe karuintik melapelø køn incha Cristoi nunelan nuchalan purukupelø køn. ¿Mu kø karuintik mekapik? ¿Mømay namun ashipik kø?

1. ¿“Karuindiig megabig maig taigwan møra” marøpik mu kera?

Metrapsrønkutri møyankatik Jeupape kan søtøwan kape kan møkwantø wesrua pasrik køn nui misakmeran metrap pera ampup pøntrøntrai (Malaquías 2:7; Hebreos 1:1). Jesús kuainukkutri, Jerusalénsrø Cristo nøaship karua øriløpa, Tiuswaimpurapelan pera marøp pøntrapeløpa kungrekasiunwan pera marøp pøntrapelø kuik køn (Hechos 15:2). Srøtø siglosrø latawai, møin kualøm møilø metrap pera pøntrapelø trektøwai marøp pøntrapelø køn, Tiuswaimpurap mamikmera lataik tranøpelø køn incha latrø tap srø wamwan waminchip amtrai purukupelø køn. Truiløpe, Jeupawaiwan Marøp Metrap Pera Pøntrapelø køn. “Karuindiig megabig maig taigwan møra marøb, katø chi maramelan nøtø tsabø asha marøbigwan, ya puaig [Jesús] wesrua pønsraik køn” (Mateo 24:45​a). Jeupawaiwan Marøp Metrap Pera Pøntrapelan nøm kuawa srømpalasrø Jesucristopa aship karup pøntrøntrai espíritu santotøka lawa wesruilø køn.

2. ¿Karuntik mekapik maik taikwan møra marøpikpe Tiuswaimpurap chi mamikwantre tranøpik kø?

Jesús trentaik køn “karuindiig megabig maig taigwan møra” marøpikwan kanelan Cristoi wentautø ampupelan mamikmera ura pupen srøtramik køn cha (Mateo 24:45b). Mamikmerama kullaramøntrai asr mur pasrøntrai purukupik køn, trektøwai Tiuswaimpurap mamikmerakucha tranikpe Jeupawan tarømisrmø mur pøntrøntrai incha Jesús maik karuikwan martrai purukup inchipik køn (1 Timoteo 4:6). Tiuswaimpurap mamik tranikpe tuluntsuniløyu, Bibliayukutri pørin kilkamerayu, videumerayu ilø tranøpik køn. Iløpe kenamarøpik køn, Jeupa maik isupik kuikwan incha nøpa trak kantø lincha pøntramik purukupik køn.

MAS NEPUA KUSREU

3. Jeupawai misakmerape tap tamarøp kømik køn

Jesús nø pera aship pasrapik køn Jeupawaiwan Marøp Metrap Pera Pøntrapelan, nøm Jeupawaiwan waminchip pøntrapelan tapik tamara purukuntrai. Srøtø siglosrø Cristoi wentautø pøntrapeløpe trektøwai tamarik pasrapik kuik køn. VIDEUN asay.

VIDEU: Urkanisasiunyu nampe pøntramik køn (9:23)

Ley 1 Corintios 14:33, 40, yu leinuk pinaku paílan waminchap:

• Ik versículosmera taimpala, ¿Jeupape nui misakmeran isupik kuita tap tamara pøntrøntrai? ¿Ñipe chincha øyeek isuku?

4. Karuintik mekapik Jeupawaiwan waminchap ampen tamara pøntrøntrai wesrupik køn

Srøtø siglosrø Cristoi wentautø ampupelaimpe pøntrapelø Jeupawaiwan waminchap ampamikpe latrø nuik kuik køn incha trununmetrik marøpelø kuik køn. Ley Hechos 8:14, 25, yu leinuk pinaku paílan waminchap:

• Srøtø siglosrø Jeupawayelan waminchip amtrai, ¿mumeratre tamara pønsraik kø?

• ¿Cristo nø karua ørilø waminchen Pedropa Juanpape chi marik kø?

Jeupawaiwan Marøp Metrap Pera Pøntrapelaimpe Bibliatøka waminchap ampik, truik latrø nuik køn. VIDEUN asay.

VIDEU: Latrø nuik køn namuimpe Jeupawayelan kusrenanøp ampikpe (1:37)

Jesúspe trentaik køn Jeupawaiwan kusrenanøp ampikpe latrø nuik køn cha. Ley Marcos 13:10, yu leinuk pinaku paílan waminchap:

• ¿Jeupawaiwan Marøp Metrap Pera Pøntrapelaimpe chinchatre latrø nuik kø Bibliatøka waminchap ampikpe?

• ¿Chinchatre palailø kø “karuindiig megabig maig taigwan møra” marøpik Pirø mupa kuimpurap Jeupawaiwan waminchap amtrai tamarik?

5. Karuintik mekapik maik taikwan møra marøpik namun perep ipik køn

Jeupawaiwan Marøp Metrap Pera Pøntrapelø Pirø mupa kuimpurap Cristoi wentautø ampupelan perep ipik køn. ¿Nømpe mantø nepua ashipelø kø namun mantø pera pøntramikwan? Nepua ash, srøtø siglosrø Cristoi wentautø pøntrapelø mantø pera ampikwan. Ley Hechos 15:1, 2, yu leinuk pinaku paílan waminchap:

• ¿Srøtø siglosrø Cristoi wentautø ampupelø chincha alekiaik kø?

• ¿Pablopa Bernabépa katøkanelø Cristoi wentautø ampupeløpa mumeran laik kø ikwan tør martrap?

Ley Hechos 15:12-18 incha 23-29, yu leinuk pinaku paíkwan waminchap:

• ¿Srøtø siglosrø metrap pera pøntrapelø circunsiónpurap, mantø asha maramikwan chi marik kø Jeupa purukuntrai? (Ash versículosmera 12n, 15n incha 28n).

Ley Hechos 15:30, 31 incha 16:4, 5, yu leinuk pinaku paílan waminchap:

• ¿Srøtø siglosrø metrap pera pøntrapelø martrai karuikwan eshkapen Cristoi wentautø ampupeløpe chi marik kø?

• ¿Nøm metrap pera pøntrapelan møra marikkutri Jeupa nømun latrø tapelø tranikwan mantø nepua asha kø?

Ley 2 Timoteo 3:16 incha Santiago 1:5, yu leinuk pinaku paíkwan waminchap:

• Møya Jeupawaiwan Marøp Metrap Pera Pøntrapelø chikøpen isua martraptø, ¿Jeupa purukuntrai nømpe chi marøpelø kø?

CHI KUSREKU

Cristo “karuindiig megabig maig taigwan møra” marøpik lawa wesruikpe Jeupawaiwan Marøp Metrap Pera Pøntrapelø køn. Ik karuintik melapeløpe Pirø mupa kuimpurap Cristoi wentautø ampupelan chi maramikwan eshkap, Tiuswaimpurap mamikwan tranøp inchipik køn.

Kusreikwan katøle isuntrap

• ¿“Karuindiig megabig maig taigwan møra” marøpikwan mu lawa wesruik kø?

• ¿Jeupawaiwan Marøp Metrap Pera Pøntrapeløpe namun mømay asha purukup pasra?

• ¿“Karuindiig megabig maig taigwan møra” marøpik tru Jeupawaiwan Marøp Metrap Pera Pøntrapelø kui kørewa pasrøtitru?

MAS NEPUA ASH

Jeupawaiwan Marøp Metrap Pera Pøntrapelø mantø tamara pøntrapelø kuikwan nepua ash.

“¿Jeupawaiwan waminchipelai Metrap Pera Pøntrapeløpe maik kø?” (jw.org yu pørilø)

Jeupawaiwan Marøp Metrap Pera Pøntrapelø Bibliayukutri ciertonikwan kusrenantrap chi marøpelø kuikwan nepua ash.

Namui asin kilkamera videumerapa maik kuikwan kenamarøpelø køn (17:18)

¿Jeupawaiwan Marøp Metrap Pera Pøntrapeløpe Jesús nømun martrai karuikwan nømpe maik ashipelø kø?

Latrø tap kui marøpelø ker (7:04)

¿Namui tuluntsuna putrainuk mantø kenamara Jeupa nui urkanisasiunwan, Metrap Pera Aship Pøntrapelan nø pera ip pasraik?

Jeupape nui misakmeran kusrenanøpik køn (9:39)