Møinkutrimpunø purukukun Tius Nø Aship Karup Waikwan

Kan latrø mur sre pup isik ichip lataikwan, Jesúspe trencha wamik køn, tru kualømmerawane purø trømpøik melamik attrun cha (Mateo 24:21). Tru latrø mur sre pup isik ichipyukutri wepampamkeik kuinkucha, kan tap tsumsrø trupap ampamtik køn. Trupe, ¿chi martrap?

Jesucristo nu tunyu wamisra nam mømay maramikwan kusrenanik køn: “Inchawei Tius nø ashib karub wainuguigwanba, katø tru sølgandø tabigwanba, truilanmerrig lab maramig køn” (Mateo 6:33). ¿Iktrawa chi chintrai intik kera?

Tius Nø Aship Karup Waikwan truilan metrik lap maramik køn. Chipurapikutøkucha mas nuik kømikpe, Tius Nø Aship Karup Waik køn (Mateo 6:25, 32, 33). ¿Chikutri øyeek isumik kø? Kakentø nampe yu Pirau chi trømpøik purep pasrapikwane tamartrap kaimapelø ker. Tamartrapikpe Tiustø køn.

Tius sølkantø tapikwan lap maramik køn. Tius maik martrai karuilan Tiuswai, latrø nuilø ciertonelan møra martrap trantramik køn. ¿Chintimpa? Kakentø tapikwanpa kaikwanpa namasiktøwai maik kuikwan isua marene, namuntøwai kalø puinap amønamik køntrun (Proverbios 16:25). Katøkanpurappe, nam Jeupa maik taikwan møra marene nun kasrak køn karuntrun incha namuntøwai tap amtrun (Isaías 48:17, 18).

¿Jesúspe chincha trentaik kø: tru Tius Nø Aship Karup Waikwanpa katø tru sølkantø tapikwanpa truilan metrik lap maramik køn cha? Kakentø nøpe tørkantø eshkaik køn, møilø pøtøpurap aship menta latrø nu an tøkamisra tap waramuitamap isuntrapelø kui. Inchen katøkaneløpe ñimun chi palapelan tøkakøntrap latrø isuintelø amøñipelø køn inchakutri Tius Nø Aship Karup Waikwan lantrappe utø wesramelø køn (Mateo 6:19-21, 25-32).

Jesúspe treek martrap misrik køn tru mumera køpen Tius Nø Aship Karup Waikwan purukupelane, nømun chi palapelane tøkakøntrai tranøp trektøwai wentøsrønkucha latrø tapelø ketik utøntrun (Mateo 6:33).

Jesús tru srøtøchitø kusrenanøp pera uniløpe Tius Nø Aship Karup Waikwanpa katø tru sølkantik tapikwanpa truikwan metrik lapelø kuintøkucha nømun latrø isuintelø amønaikwan patsikpe ashmuik køn inchentø tap tsumsrømay trupap ampamtik wetøtraik køn. Trupe, ¿maik marik kera?

Tiuswan møra marmelø latrø trømpøik puilø amønainukukutri, Nø maramikwan tru sølkantø martrai karuikwan møra marøpelane truyukutri treek pumøntrai purømisrøpik køn. Nømui isupikwan Tiuswainuktø pasra tøkakuik latrø mur kuik køn tru Tius Nø Aship Karup Waik attrapik kui. Nømun purukuik køn tru nøm øsik amønainuk purø trømpøik puintøkucha metraptø ka ampik køntrai. Tiuspe nømun tranik køn marampurap marøpik purø nuik tapikpe nømuin kømøtø Tiuswaintø køn, trømpøik puintøkucha tap puraampup amtrai purukuik køn (2 Corintios 4:7-9).

¿TIUS NØ ASHIP KARUP WAIKWAN METRIK LAPSRUKU?

Srøtø siglo Cristoi wentautø ampupelan Jesúspe trentaik køn, Tius Nø Aship Karup Waikwan metrik lay chipen nømpe treek marøpelø køn. Tius Nø Aship Karup Waikwan nømpe tap srø wamwan nøm waraik srøilan, pøtøkatan warapelankucha wamintik køn (Colosenses 1:23). ¿Møi kualømmerawan øyektøwai marøpelø kø chinta?

¡Øø! Jeupawaiwan waminchipelø tørkantø nepua asha køn tru Tius Nø Aship Karup Waikpe yu Pirau chi trømpøik purep pasrapikwan pinishintrap kui. Inchakutri Jesús tap wammera tranikwan, nømpe møra mara martraptø trantrapelø køn: “Tius nø ashib karub waigwei tabig srø wambe yu pirau pirø muba kuimburab chi misaamerandøgucha eshkab kusrenanig kønrrun, chigúi nebua ashchai misaamera. Inchen yandø srabe kwaløm punrrun” (Mateo 24:14).

¿Tap wammørøsrailan mørape chi marøpsruku? Srøtø siglosrø Macedoniakutri Bereasreelan apóstol Pablo tap wammørøsrailan kusrenanen, nømpe trupa chull møra utik køn incha, Tiuswai wamwan chi køtashchap maik køtashchap ashipelø køn, trukutri nøm øsik amønainuk treek marøpelø køn. Ñi latawai marene tap asønantrun (Hechos 17:11, 12).

Ñikucha trektøwai maramtik køn, Tius Nø Aship Karup Waikwanpa sølkantik tapikwanpa møya lawape, tap tsumsrømay trupap yamikwan purømisrik kømikwan tøkakøntrun, incha wentøsrømpe chi isumø manakatik pishintø waramtik køntrun.