¿Chincha Jeupawaiwan waminchipeløpe Señorwai Mamikwan marinuk pekmay marøpelø kø katøkan religiónesmera lata kømø?

Nampe Biblia maik kusrenanøpik køpen treekwan marøpelø ker tru Jesucristo Kuaikwan Isuntrap kape Señorwai Mamik kape “Srape Mamik” taikwan (1 Corintios 11:20). Treek kuintøkucha ikpurap marikyu mø religionesmera nøm køreilø isua mariløpe Biblia treek kusrenanmupentø marøpelø køn.

¿Chincha marøpelø kø?

Señowai Mamikwan isua marøpelø ker Jesucristo namuimpurø kuaikwan isua unkua taikwan kenamartrap (Mateo 20:28; 1 Corintios 11:24). Ik marikpe kan sacramento kømøn kape mø religiónmera køpen nøm køreilan marilø, por ejemplo tru nøm kalø marilan ulø paymø pesannaik køtrømisrtrain cha isua.a Bibliape kusrenanøpik køn Tiuspe nam kalø marilan ulø paymø pesannapik kui nam Jesúswaiknutø fe tøkakøpene, tru religiónmera nøm chikøpen køreilan mariløyukutrin kømø (Romanos 3:25; 1 Juan 2:1, 2).

¿Maya yanayutø maramik kø?

Jesúspe nøaship nui kusrenanøp pera unilan Señorwai Mamikwan martrikay karuik køn inchentø mam piejis maramikwane eshkamuik køn (Lucas 22:19). Møiløpe ikwan maramikpe pølmørik kape trunemørik kape kualømmørik kape kan kualømyutø yam piejes maramik kui, kape nøm isuinuk mam piejes maramtik køpen. Treekuintøkucha, chikøpentø purayailan kuenta tøkakømik køn.

Jesúspe tru Señorwai Mamik taikwan Pascua judía kualøm køpen tru kualøm pølpasrtrai mara yanakøpyupe kuaik køn (Mateo 26:1, 2). Øyeek purayaikpe ka yantø kømøn. Bibliayupe trenchipik køn, tru Jesucristo namuimpurø kuaikpe tru Pascua kualøm tru upisha maik lataitøwain køn cha (1 Corintios 5:7, 8). Pascua kualømwane pilayu kan piejitø marøpelø kuik køn (Éxodo 12:1-6; Levítico 23:5). Srøtø siglosrø Cristoi wentautø ampupelø trektøwai marik asha møyankucha Jeupawaiwan waminchipeløpe Bibliayu maik chipik køpen pilayu kan piejitø marøpelø ker.b

Mana incha chu uras

Jesús maik marikwan asikpe, namun kusrenanan tru mam piejis maramikwantø kømøtø, tru chi kualøm incha chu uras maramikwan kucha eshkan. Ikwan marøppe 14 de nisán 33 pilasrø pøsr pinaipen marik køn, calendario lunar maik kenamarim pala (Mateo 26:18-20, 26). Jeupawaiwan waminchipeløkucha pilayu kan piejitø marøpelø ker, srøtø siglosrø Cristoi wentautø ampupelø mantø marøpelø kui asha.c

33 pilasrømpe 14 de Nisánpe kan viernes kualøm penik køn, inchentø pilamørik tru kualømpe yunømarøpik køn. Tru 14 de Nisán chi kualøm pentashchap ashchappe, tru Jesucristo uñip uras maik asha marikwan marøpelø ker mu møya Judiosmera nøm maik asha marikwan kømøtø.d

Pitrimpa, vinopa

Tru Señorwai Mamikwan pølpasra marøppe, Jesúspe Pascua kualøm mamik uñchipik tru pitri levadurakeik incha vino tintotrawapa marik køn (Mateo 26:26-28). Treekkutri namkucha pitri levadurakeik chikucha lintisaimiktrawa marøpelø ker, incha vino tinto tru uvas jugo øl-laik kømø, kape vino chikucha lintisaik kømik: licorkeik ni azúcarkenkeik.

Mø religiónmerape pitri fermentaiktrawa marøpelø køn. Inchentø Bibliayupe levadurane kalø marik, tapik kømikwanpa kemesra waminchipelø køn (Lucas 12:1; 1 Corintios 5:6-8; Gálatas 5:7-9). Treekkutri, pitri levadurakeikwan Jesucristoi asr chikucha kalø marimíik sølkantik kuikwan kemesra wamintan (1 Pedro 2:22). Trektøwai mø religionesmerape vino tinton kømø uvas jugotrawatø marøpelø køn, Biblia maik taikwan møra marmø, treek marøppe pachipik muchimumik køncha treek marøpelø køn, Biblia treek kusrenanik ashmupentø (1 Timoteo 5:23).

Ka kemesra wamintiktø køn Jesúswai animpa, yaumpa kømøn

Pitri levadurakeikpa, vino tintopape Jesucristo Kuaikwan Isuntrap tru nui asrpa, nui animpa kui lataik kemesra asha isua marøpelø ker. Møilø isuik lata kømø tru cierton Jesucristoi asrpa animpa misrøpik køn cha kape pitriwan tru Jesucristoi asrpa lintisaik køn cha incha vino tintope Jesucristoi animpa. Ashkun Biblia chi taikwan ikpurap.

• Jesucristo nui kusrenanøp pera unilan nui aniwan cierton mutsøn karuik kuimpe tru Jeupa karuikwan møra marmup pasrapsruintrun tru aniwanetøka mamumik køn taikwane (Génesis 9:4; Hechos 15:28, 29). Øyeek marikpe søl kømupsruintrun kakentø Jesúspe manaken karumupsruintrun Jeupa aniwaimpurap maik karuikwan møra marmøntraimpe (Juan 8:28, 29).

• Jesucristo nøaship karua øriløpe cierton Jesúswai aniwan muchimuik køn, kakentø nøtøwain trentaik køn: nui animpe lusik køntrap køn cha, øyamay kenamaran tru nømuimpurap kuamikpe katøkucha palaik kui (Mateo 26:28).

• Jesucristo øyeek marøppe, “nøbe kan pijitø managatigwei” nøaship kuaiktøka kaik marilan patsøka pasrik køn (Hebreos 9:25, 26). Tru pitrimpa vinopa cierton Jesucristoi asrpa animpa misrøpik kuimpe, pilamørik Jesucristope namuimpurø kuamik køpsruintrun.

• Jesucristo trentaik køn: “Iigwan øyeeg marøppe, nan isub kønrrab martrigay” cha. Nøpe trenchimuik køn: “Ikwan øyeek marøppe, na katøyu katøyu kuantrai isua kømø”. (1 Corintios 11:24).

Misakmera transubstanciaciónpurap kørepeløpe kape tru pitrimpa vinopa cierton Jesucristoi asrpa animpa misrøpik køn chipeløpe, tru mø Bibliamerayu versículosmeran lliska pørilan asha trenchipelø køn. Kan ejemploma Mateo 26:28 mø Bibliamerayupe Jesucristo vinopurap waminchippe “Ikpe nai anin køn taik køn” chipik køn. Inchentø Jesucristo taikpe øyeek chintrenchipsruintrun “Ik vinope nai ani lataik køn cha” kape “Ik vinone nai anin kui lataik kui, kemesra waminchip pasrar cha”.e Kakentø Jesúspe chikøpen kusrenanøppe manakucha chiwan køpen kemesra waminchipik kuik køn (Mateo 13:34, 35).

¿Vinonpa pitriwanpa mumera map, muchip intamik kø?

Jeupawaiwan waminchipelø Señorwai Mamikwan marinuk, mameløtø pitriwan vinonpa map muchip inchipelø køn ¿Chintimpa?

Jesús ani lusiktrawa katøkan srø acuerdo marik køn, tru Jeupa Israelitasmerapa marikwan yunømartrapik (Hebreos 8:10-13). Ik srø acuerdoyu umpu pøntrapelø tru Señorwai Mamikwan marinuk, pitriwan, vinonpa map, muchip inchapelø køn. Maya Cristoi wentautø ampupelø treekwan marmelø ker, kakentø tru Jeupa nøaship, nømuntø pekmay wamiløtø treekwan marøpelø køn (Hebreos 9:15; Lucas 22:20). Iløpe Jesucristopa srømpalasrø aship karup putrøntrapelø køn. Bibliape tør marøpik køn 144.000 køntrap kui, ik wamikwan utøntrapeløpe (Lucas 22:28-​30;Apocalipsis 5:​9, 10; 14:​1, 3).

Ik mantø upishamera srømpalasrø Jesucristopa aship karup putrøntrapelø lata kømø, kaneløpe “misak purø nu, muken muntsamkeilai utu pøntrøntrap køn, tru yu Pirau manakatik øsik warøntrapelø (Lucas 12:32; Revelación 7:​9, 10). Yu Pirau manakatik øsik waramikwan munirapeløpe, pitriwan incha vinon map, muchip inchimuinkucha Jesucristo Kuaikwan Isuntrap marinuk linchipelø ker, Jesucristo namuimpurø kuaikwan, unkua taikwan kenamartrap (1 Juan 2:2).