Mananasrønkutri manasrønkatik Biblia latrø tap kusrenanøpik køntrun

ÑIKEN ISU, ñipe museosrø ashchap yaik intrø metrapsrø nøtrø chi køpelø køtrømisrilan. Iløpe ketrikupa chaptelø pøntran. Møiløpe pusra wekøtrilø mu palapelø, pero kan pasran cierton kømíik lataik køpentø chikucha lintimíik. Ik mara pasrikpe tsøntatø tap asha marik køn. Ñipe pera ashipikwan payan: “¿Katøkanelø lataik kømø ikpe mas srøik kø?” Nøpe “ka” cha løtapik køn, ikpe purø yanaik køn manaken tamarimíik køn”. Trukutrimpe ñipe payan “¿chu urastøkucha yutø esekaik tsuik kuita?”, pera ashipikpe “ka” ta, “ik obra antigua kailø mintishintrap intik køn sre pupyu isik ichipyu purep atrik køn”. Pero ñipe paya mørtrape “¿treekpe chitøka marik kø cha?”

Trektøwain køn, Bibliakucha øyeek purapwan purayaik kuara asamtik. Ik asin kilkape purø yanaik køn, katøkanelø lataik kømø. Iktø kømø, yam waran asin kilka pørilø purø yanailø pero ik asin kilkamerape yanayupe minchip yan. Por ejemplo, ik pøriløpe cienciawaimpurap waminchipik køn kan ashchap ik asinkilkamerape chishtø newan waminchimíik køn treekkutri yanayupe srøilø yunømarik køn. Medicinaimpurap wamintikpe newan ciertonik kømøn newan tapik kømøn. Ik asin kilkamera purø yanailø køn møiløpe trupilø kape møiløpe purø mintilø køn.

Bibliape ketriku pekmay køn. 3500 pilamera purayainkucha Bibliape chikucha yunømarimíik køn. Latrø yam pilamera purayaintøkucha Biblian mintishintrap intik køn patra, misakmeran chika køntrai intik køn, chikøpentø isa wamintik køn. Øyeelø marintøkucha Bibliape chikucha yunømarimíik køn. Katøkane kusrepelø srøilø wesruintøkucha, Bibliape, manawainken chap pørik tsuik køn (Nørøø tarømarikwan ash “¿Anticuada, o adelantada para su tiempo?”).

MØIN KUALØMMERAWAN NAMUI MANTRØYU ISUPIKU TAPELØ TØKAKØMIK PALAPIK KER

Treek kuintøkucha, ñipe paya mørtrape: “¿Bibliape cierton møyasrønkucha purukupik kø chintera?”. Møi paílan løtøntraimpe, møya yu Pirau purayailan ash. ¿Møilø kø más latrø kuaramtik? Inchippape, ñipe ilan isuntrappe pek misakmerape pek misakmerapa kuayailan, pirøwan mintisailan, namiktøka trømpøik chinsrattø inchipelan kape corrupciónwan. Møimpe Bibliayu kusreik yain kuintø isu: “¿Yu Pirau Biblia maik taikwan marikpe mas tap waramtik køntrauta?”.

PISHINTØ TAP WARAMIKWAN UNTARAP

“Mayanguen tab kuilø køn cha, tru ambugurri igurri tab kømigwan lab marøbelaimbe. Kaguende truilane Tiusbe ‘nai ureg køn’ chinrrun cha” (Mateo 5:9). “Ñimuimburappe, ñimun mayangatig tabig waramdiig køben mu misaamerabatøgucha ambugurri, igurri tabig warønrrab inday” (Romanos 12:18).

LÁSTIMA ASHIP KALØ MARILAN PESANNAP

“Mayanguen tab kuilø køn cha, katøganelan lastima ashibelaimbe. Kaguende nømungucha Tiusbe treetøwei lastima ashib tøgagønrrun cha.” (Mateo 5:7). “Kanikkurri kanikkurri chigúingucha lata inchimumigwan køben, møikkøben ‘øig øyeeg inndan’ chib pønrramig tøgaguabe, kanikkurri kanikkurri chi ulø paymø, pesannab inchibelø kømigwan købengue. Señora ñimun ulø paymø, mandø pesannaig køben, ñimbe treetøwei maray” (Colosenses 3:13).

KANPALATØ PEK MISAKMERAPA NAMIK ASHMØ

Tius “kan møkkurrindø truyugurri chi misaatø larrøbichib inrrabigwan nøbe marig købig køn cha, pirø muba kuimburab warønrrai” (Hechos 17:26). “Tiusbe møilane ørømara katøganelandø tab inchimøtø lata isubig kuin kui. Misaamera nørrø pønrrabig chu pirausreeløtøgucha nun køriibala marøb, sølgandø tabig marøbigwane Tiusbe kashmíig køn cha” (Hechos 10:34, 35).

NAMUI PIRØWAN UNTAKTØKA ASHIP

“Incha Jehová Tiusbe møwan pera arrua, tru Edén ellmarin tulyu kørrømarøbig køn, pirøwan kwallib ashib tsunrrai” (Génesis 2:15). Tius “pirøwan mindishib pinishibelangucha pinisamig puin køn” cha” (Apocalipsis 11:18).

TSALØ ASHIP CHINCHIP MØRØP PARØ ASILAN MØKELØPA ISHUMPURMERAPA CHIKØPENTØ TRØMPØIK MARILAN

“—Ø indamigwane treenchimønrrab ashiptø kuy cha. Kaguende kan møg øsig kømibe chi nørrø tøgagúinug pasrømíig køn— cha” (Lucas 12:15). “Ñimbe ñimui utube, møgueløba, ishumburmeraba chigøben trømbøig maramigwanba, katø chinetø køsøngønrrapteelanba, katø chiwandøgucha ke chinchimmørø inchib parø indamigwanba, øyeelane mørøguen wamincha mørmumig køn, Tiuswei misaamera kuig køppe” (Efesios 5:3).

CHIYUTØKUCHA SØLWAN MARØP MUR KUALLIP

“Katø chiyutøgucha nambe tabig marøb melønrrab isua meler” (Hebreos 13:18). “Nilaptiig købiibe yandø mas nilømøta. Masken treeg inchimøtø, ñui tasiitøga chigøben tabig maramigwan mar” (Efesios 4:28).

PALAIK MELAPELAN PURUKUP

“Katø køriiteelane treetø melømønrrai waminchib, katø chiyugøben purø kullaguelane purugub, mayeelanba larrø tammay inchurrunrrigay cha” (1 Tesalonicenses 5:14). “Usri møskai, peta kwailanba, kelø peta kwailanba chigøben isuig meløben isua ashchab ambub, katø yu pirau kaig trømbøig arrubiitøga chillig incha pønrrømøwei indamig [køn]” (Santiago 1:27).

Biblape iløtø kømø eshkapik køn, masken nam øsik amønainuk ilan møra martrai kusrenanan. Tiuswaiwan mas misakmera møra marimpe, isuintelø amøñimupsruintrun, ¿cierto? Møin kualømmerawankucha Bibliayu tap wammerape purø nu purukupik køn. Inchentø, ¿ñuimpuraptø Bibliape chi martrera?

¿BIBLIAPE ÑUNE MANTØ PURUKUNTRERA MØIN KUALØMMERAWAN?

Metrapsrønkutri møyankatik kan møk mas latrø kusrepik trentaik køn: “Inchendø mu møkken nebua isumgaig Tius marøb pasraibe nui mariiløtøga treeg kuitamab ashchai tørgandø kenamaran— chibig køn” (Mateo 11:19). ¿Cierton kømuitatru? Kan kørøsraik tapik kui nepua ashchappe øsik uninuk nam maramik køn incha tapik kui nepua ashchun. Treekkutri, chi kalø kømøn ñi paya mørikpe: “Bibliape cierton purukupene, ¿nai øsik uninuk tap wammerape tamarilø køntrai purukuntrauta? ¿Chiyukøpen isuintik wainuk purukuntrauta ke yantø tamaran?”. Kan purayaikwan ashkun.

Dianapeb utø yainkeik chi isumø kaskrak uñipik køn, kan piap lataitø purayan chi isuimíik: nui nimpasr unø kuan, tru kømnetø itøtø atrik køn kekpe tarømisren ankucha kaapen. Nøtøwai eshkapik køn: “Chishtø trupisha, nai nimpasrwan nai kekwan yakeik pasramisra, øyeek puraipen chi maramken kømuik waik køn; trutø kømøtø øsik uninuk kasrak kømikwan trupishar, mur pasramik patsøpen, tapelø puntrai tamappe muniramur”.

Dianape nøtøwai ik tap wammeran ciertonik kui nepua asik køn: “Namui øsik amønaikpe setenta pilamera katiktø køn; møilø køpen kuchi mureløpe ochentakatik warøntrun. Katøkanpurappe pilamørik øsik warainuk kailø isuintelø pupik køn; pilamera latrø maya purayan trektøwai namkucha” (Salmo 90:10).

Dianape isuntelø purayailøyukutri wepintrap Biblia purukuntrai lapik køn, purø tapik kui nepua asamik. Ik pønkatø pøriløyu nepua ashchun, misakmerape Bibliayupe tap wammerape ciertonik kui nepua asan, øsik amønainuk chiyukøpentø isuintelø meløpen metrap wepamtrai purukupik kui ikpe purø tapik køn. Nømtøwai cuenta penan Bibliape latrø yanailan wetøtrai latailø kui, tru srøtø wentau pølpasrøyu wamintiløyu nøtrø asin kilkamerape yantø yana pilamera puraipen usrø pusrilø pesannailø køtrømisrøpik køn. Treek kuik køpene, ¿Biblia asin kilkape ketrikupe pekmay kø chintera? ¿Bibliane Tius pørtrai karuik kø chintera møkelø kømø? (1 Tesalonicenses 2:13).

Inchippape, ñikucha isuintre øsik unikpe ka ratøintø kui incha amønainuk chikøpentø kailø pupik køn. Chikøpentø isumtelø pupen, ¿mun lapik kuku purukuntrai tap wammera kettrai?

Ashkun pønkatø Bibliayukutri mantø purukutashchap øsik amønainuk.

Ilø kusrenantrun:

1. Ñuimpuraptø chikøpentø isumtelø pumøntraimpe tarømisramik.

2. Kailø pupen metrap wepampamik.

3. Øyeelø pupen yunømarankeilane kullaramø metraptø ampamik.

Ik pønkatøwan aship puraamtrap yu pøriløyu (yu pørinuk pønkatøwan aship puraamtrap).